Read Toraja-Sa'dan PA’TOLE 24 Bible Online

PA’TOLE 24 - Toraja-Sa'dan bible

PA’TOLE 24

¹Iake den misa’ tau umpobaine misa’ baine, ianna tae’ nakamali’i, belanna nakabu’tui dio kalena tu sayuanna, sia nasurasan sura’ kasitantangan, anna tadoanni, namane ussuai tassu’ lan mai banuanna;

²sia iake ke’de’mi lan mai banuanna, anna male lao napobainemi to senga’,

³sia iake nakagi’gi’mi muane undinna, anna surasanni misa’ sura’ kasitantangan, natadoanni sia nasua tassu’ lan mai banuanna; ba’tu iake matemi tu muane undinna, tu umpobainei,

⁴manassa iatu muane bunga’na, tu ussuai male, tae’ nama’din umpobaine pole’i, tu mangka urruttakki kalena, belanna iatu apa iate misa’ apa megallian dio pentiroNa PUANG da muparampoi kasalan tu tondok la Nabenko PUANG, Kapenombammu, mupomana’.

⁵Iake den misa’ tau mane kebaine, tae’ nala tassu’ messurodadu sia da napapassanni tau tanggungan. Lan sangtaun nanii lappa’ la umposara’ tananan dapo’na, anna popaimanni baine, tu mangka narampanni kapa’.

⁶Da natoei tau tu pangrissoan ba’tu batu pangrissoan daona lu, belanna ke den tau ma’gau’ susito natoe tu dakaran kandena tau.

⁷Iake den misa’ tau diappa’, anna rampai misa’ tau, misa’ dio mai sangmuanena, dio mai to Israel, sia napokaunan anna balukanni, manassa la dipongko tu to boko iato. Susimoto la munii ussapui tu kadakena dio mai kamu.

⁸Palanni penaa tu diona golen, ammu karitutui tonganni tu mintu’na apa naadarangko to minaa to Lewi; apa mangka kupepasanan lako kalena, la nakaritutui tongan.

⁹Kilalai tu apa Naparampo PUANG, Kapenombammu, lako Miryam, dio lu kalingkammi, tommi tassu’ lan mai Mesir.

¹⁰Iake mupaindanni apa-apa lako padammu ma’rupa tau, da mutama banuanna, la unnala apanna mutoe.

¹¹Sangadinna la dio bangko salian, na iatu to kaindanan la tassu’ umbaangko tu napa’pentoean.

¹²Iake to kaasi-asi da mupennammu’i, ke mamma’ko, tu apa napa’pentoean lako kalemu.

¹³Sangadinna la mupasulean tu apa napa’pentoean, ke lambunni allo, kumua napennammu’i tu bayu lamba’na, ke mamma’i, anna passakkeko. Iamoto tu la mupomalolo dio oloNa PUANG, Kapenombammu.

¹⁴Da mupandasai tu to sumaro, tu kaasi-asi sia kalala’, la iatu mai siulu’mu, la iatu to sae, tu torro lan tondokmu, lan kotamu.

¹⁵Allo ia dukato la mubaya’ tu sarona, ke tae’pi nalambun allo, belanna to kalala’ sia narannuammo — kumua da nasumarro lako PUANG diona gau’mu ammu kasalan.

¹⁶Iatu mai ambe’ tae’ nala dipatei natumang anakna; susi dukato tu anak tae’ nala dipongko natumang ambe’na; pantan la dipongko natumang kasalanna kalena.

¹⁷Da mupakelokki tu katongananna to sae sia pia biung; sia da duka muala pakeanna baine balu la mutoe.

¹⁸Sangadinna la mukilalai kumua mangkamoko kaunan lan Mesir, sia Narampanammoko PUANG, Kapenombammu, lan mai; iamoto kupasanko umpogau’i tu ianna te.

¹⁹Iake mupegandungi tu pa’lakmu ammu tang ungkilalai sanguyun, da musule unnalai; iamoto tu la napotaa to sae, pia biung sia baine balu, — anNa pamasakkeko PUANG, Kapenombammu, lan mintu’ pentoeammu.

²⁰Iake muta’bai tu bua saitunmu, da muparessa pole’i tu tangkena; iamoto tu la napotaa to sae, pia biung sia baine balu.

²¹Iake mupupui tu bua anggoro’mu da mupupu pole’i; iamoto tu la napotaa to sae, pia biung sia baine balu.

²²La mukilalai, kumua mangkamoko kaunan lan tondok Mesir, iamoto kupasanko la umpogau’i tu ianna te.