Read Toraja-Sa'dan PA’TOLE 26 Bible Online

PA’TOLE 26 - Toraja-Sa'dan bible

PA’TOLE 26

¹Iake tamako tondok, tu la Nabenko PUANG, Kapenombammu, la mupotaa mana’, sia muala la mupoapa sia munii ma’tondok,

²manassa la muala dio mai bunga’na mintu’ bura padang, tu murampun dio mai padang, tu la Nabenko PUANG, Kapenombammu, sia la mupatama baka, mumale lako inan tu la Napilei PUANG, Kapenombammu, la umpannii sanganNa dio.

³Iake rampomoko lako to minaa tu den attu iato, la ma’kadako lako mukua: Umpa’peissananna’ totemo lako PUANG, Kapenombammi, kumua rampomo’ lan tondok, tu Napalaoan sumpa PUANG unnallu’i lako nene’ to dolota, kumua manassa la Nabenki’.

⁴La natarima to minaa tu baka musoronganni, anna patorroi dio tingayona inan pemalaranNa PUANG, Kapenombammu.

⁵Mumane ma’kurre sumanga’ dio oloNa PUANG, Kapenombammu, mukua: Iatu ambe’ku misa’ to Aram salamba salao; ke’de’ lako Mesir sola to tang pira, anna torro dio susito sae, apa dadi misa’ bangsa makamban, makuasa sia marapuan.

⁶Iatonna pandasakan to Mesir sia napakario-rio sia napapassannikan pa’diaman magasa tongan,

⁷metambamokan lako PUANG, Kapenombanna nene’ki, anNa perangii PUANG tu gamarangki sia Natiro tu kamandasangki sia kamasussangki sia kadipakario-rioangki.

⁸Pakalan Nasolammokan PUANG lan mai Mesir tete dio lima matoto’ sia takia’ tie’te’ sia apa metakuran tongan sia tete dio tanda kalle-kallean sia tanda mangnga.

⁹Nasolammokan sae inde te inan sia Nabenmokan te tondok, misa’ tondok sebo pangandu’ sia tani’ enoan.

¹⁰Totemo, manassa kusorong tu bunga’na bura padang, tu mangkamo’ Mikamasean, PUANG. La mupatorro dio oloNa PUANG, Kapenombammu, te baka, ammu tukku menomba dio oloNa PUANG, Kapenombammu,

¹¹sia la mupoparannu tu mintu’ kameloan mangka Nasorong PUANG, Kapenombammu, lako kalemu sia to lan banuammu; la iko la to Lewi sia to sae tu misisolan.

¹²Iake tappumi murampun mupatorro senga’ tu mintu’ taa sangpulona dio mai bura padangmu lan taun ma’pentallun, iamotu disanga taun taa sangpulona, attu iato la musorong lako to Lewi, to sae sia pia biung sia baine balu, anna kandei sia napa’pediaran lan kotamu.

¹³Ammu ma’kada dio oloNa PUANG, Kapenombammu, mukua: Kualamo te apa marimbangan lan mai banua; kuben dukamoto Lewi, to sae, pia biung sia baine balu, mintu’nato situru’ tu pepasan Misorong lako kaleku. Moi misa’ pepasanMi tae’ kutengkai ba’tu kukalupai.

¹⁴Iatongku ma’pote dibolong tae’ kukandei sia tae’ kualai moi misa’ tu apa tongku maruttak, sia tae’ kusorongi tu misa’ apa lako pa’tomatean, sangadinna kuperangii tu gamaranNa PUANG, Kapenombangku, sia kupogau’ unturu’i tu mintu’na apa Mipasan lako kaleki.

¹⁵Pemarangai dao mai isungan maindanMi, dao mai suruga, sia pamasakkei tu taumMi Israel, sia tondok tu mangka Misorong lako kaleki, — susitu Miallu’ Mipalaoi sumpa lako nene’ to doloki — iamotu misa’ tondok sebo pangandu’ sia tani’ enoan.

¹⁶Totemo Napa’parentan PUANG, Kapenombammu, lako kalemu, unturu’i te mintu’ aluk dipondok sia atoran; la ponno penaammu sia kalebu deatammu ungkaritutui tonganni.

¹⁷Allo iate mupekaioimo tu kadanNa PUANG, kumua Iamo Kapenombammu sia muturu’ tu lalanNa sia la mukaritutui tu mintu’ aluk Napondok sia pepasanNa sia atoranNa, ammu perangii tu gamaranNa.

¹⁸Allo iate Napasiola PUANG tu kadammu, kumua ikomo tu taunNa, susitu Napokadangko, sia la mukaritutui tu mintu’ pepasanNa.

¹⁹Iamoto la Napalayukko, ammu kapudian sia kalelean sia kamala’biran untongloi mintu’ bangsa, tu Nakombong Puang sia la dadiko misa’ bangsa maseroNa PUANG, Kapenombammu, susitu mangka Napokada.