Read Toraja-Sa'dan PA’TOLE 27 Bible Online

PA’TOLE 27 - Toraja-Sa'dan bible

PA’TOLE 27

¹Attu iato napepasanan Musa sia pekaamberanna to Israel lako to buda nakua: Karitutui tu mintu’ pepasan, tu kupapassanangkomi allo iate.

²Iake mangkamokomi ullamban Yordan lako tondok tu la Nabenko PUANG, Kapenombammu la mupabendan ba’tu pira-pira batu kapua, sia musapu’ kapu’.

³Sia iake ullambanmoko salu, la musura’ dao tu mintu’ kada Sukaran aluk iate, — kumua ammu rampo tama tondok, tu la Nabenko PUANG, Kapenombammu, iamotu tondok sebo pangandu’ sia tani’ enoan, susitu mangka Naallurangko PUANG, Kapenombanna nene’ to dolomu.

⁴Iake mangkamokomi ullamban Yordan, la mipabendan te mai batu, susitu kupepasanan lako kalemi totemo, dao buntu Ebal sia la musapu’ kapu’.

⁵Sia la mupabendan duka dio tu misa’ inan pemalaran, la dinii memala’ lako PUANG, Kapenombammu, iamotu misa’ inan pemalaran dio mai batu tu tang dibassii,

⁶iamotu batu tang dipa’ la mubangunanni tu inan pemalaranNa PUANG, Kapenombammu, sia dao la munii umpennoloan pemala’ ditunu pu’pu’ lako PUANG, Kapenombammu.

⁷Sia la mutunu duka tu pemala’ kasalamaran, ammu kandei dio sia parannurannuko dio oloNa PUANG, Kapenombammu.

⁸Mangkato la musura’ dao batu iato tu mintu’ kada Sukaran aluk iate, mupemaseroi sia mupamaleso tongan.

⁹Ma’kada dukami tu Musa sia to minaa to Lewi lako mintu’ to Israel, nakua: Ma’pakappako e to Israel, sia perangii. Allo iate dadimoko taunNa PUANG, Kapenombammu.

¹⁰Iamoto la muperangii tu gamaranNa PUANG, Kapenombammu, sia Karitutui tu pepasanNa sia aluk Napondok tu kupapassanangko allo iate.

¹¹Allo ia dukato Napasanmi Musa tu to buda, nakua:

¹²Iake milambanni tu Yordan, dao buntu Gerizim la nanii tunannang tu Simeon, Lewi, Yehuda, Isakhar, Yusuf na Benyamin la umpassakke to buda.

¹³Sia dao buntu Ebal la nanii tunannang tu Ruben, Gad, Asyer, Zebulon, Dan na Naftali la ma’tampak ropu.

¹⁴Attu iato ia tu to Lewi la umpekapuai gamaranna umpamanassai lako mintu’ muane lan Israel, nakua:

¹⁵Tampak ropu lako muane, tu manggaraga rapang-rapang dipodeata dipa’ ba’tu dipati’no’, iamotu misa’ apa Nakagalli PUANG, panggaraga lima to pande, sia membuni bang umpabendanni. Anna mintu’ bangsa mebali nakua: Amin.

¹⁶Tampak ropu lako to umpamatuna ambe’na ba’tu indo’na. Anna mintu’ bangsa mebali nakua: Amin.

¹⁷Tampak ropu lako to umpalele katonan padangna solana. Anna mintu’ bangsa mebali nakua: Amin.

¹⁸Tampak ropu lako to umpapusa to buta dio lu lalanna. Anna mintu’ bangsa mebali nakua: Amin.

¹⁹Tampak ropu lako to umpasepang patu borongna to sae, pia biung sia baine balu. Anna mintu’ bangsa mebali nakua: Amin.

²⁰Tampak ropu lako to sangampa’ bainena ambe’na, belanna ungkillang sambu’na ambe’na. Anna mintu’ bangsa mebali nakua: Amin.

²¹Tampak ropu lako to ungkaromok olo’-olo’. Anna mintu’ bangsa mebali nakua: Amin.

²²Tampak ropu lako to sangampa’ anak daranna, tu sangambe’ ba’tu sangindo’. Anna mintu’ bangsa mebali nakua: Amin.

²³Tampak ropu lako to sangampa’ matusanna baine. Anna mintu’ bangsa mebali nakua: Amin.

²⁴Tampak ropu lako to umpongko buni solana. Anna mintu’ bangsa mebali nakua: Amin.

²⁵Tampak ropu lako to ungkande pappe’, la umpongko tau, iamotu to tang kasalan. Anna mintu’ bangsa mebali nakua: Amin.

²⁶Tampak ropu lako to tang umbilang kada Sukaran aluk iate, belanna tae’ naturu’i. Anna mintu’ bangsa mebali nakua: Amin.