Read Toraja-Sa'dan PA’TOLE 28 Bible Online

PA’TOLE 28 - Toraja-Sa'dan bible

PA’TOLE 28

¹Iake muperangii tonganni tu gamaranNa PUANG, Kapenombammu, sia mukaritutui tu mintu’ pepasanNa, tu kupapassanangko allo iate, la Napamadaoangko PUANG, Kapenombammu, na mintu’ bangsa lan lino.

²Inde sia tu mintu’ kamasakkean la urrampoiko sia la mupotaa, ke muperangii tu gamaranNa PUANG, Kapenombammu,

³iamotu la masakkeko lan kota sia la masakkeko dao lu padang.

⁴La masakke tu rianna pa’tambukammu, bura padangmu sia memba’ka’ tu patuoammu, iamotu anak sapimmu sia anak dombamu sia bembe’mu.

⁵La masakke tu mai bakamu sia palungan rotimmu.

⁶La masakkeko lan torro ke’de’mu.

⁷Iatu PUANG la ussorong ualimmu, tu unneako, dio tingayomu, ammu taloi. Sangbambari tu lalan la nanii sae unneako, apa pitu tu lalan nanii mallai tu tau iato dio mai tingayomu.

⁸Iatu PUANG la umpasonglo’ kamasakkean lako kalemu lan alangmu sia lan mintu’ apa mutoe; la Napamasakkeko lan tondok, tu la Nabenko PUANG, Kapenombammu.

⁹Iatu PUANG la umpatontongko, ammu dadi to maseroNa Puang, susitu Napalaoan sumpa unnallurangko, ke mukaritutui tu pepasanNa PUANG, Kapenombammu, sia muturu’ tu lalanNa.

¹⁰Iake susito iatu mintu’ bangsa dao kuli’na padang la untiroi, kumua disa’burammoko tu sanganNa PUANG, anna mataku’ tu tau iato lako kalemu.

¹¹PUANG dukamo la ungkamaseiko kameloan sebo, lan rianna pa’tambukammu sia kamemba’karan patuoammu sia bura padangmu — lan tondok, tu Napalaoan sumpa PUANG unnalluranni nene’ to dolomu, kumua la Nabenko.

¹²Iatu PUANG la umbungkarangko pangannan tang kapu’duranNa, iamotu langi’ la umpasaean uran padangmu, ke attunnai sia la umpamasakke mintu’ pentoeammu, muurungan umpaindanni ba’tu pira-pira bangsa, apa iko kalena tae’ mumangindan.

¹³PUANG la umpadadiko ulu, tangia ikko’, sia salangngan-langngannako, tae’ musarokko-rokkona, podo ke muperangii tu pepasanNa PUANG, Kapenombammu, tu kupapassanangko allo iate, ammu karitutui tonganni,

¹⁴sia iake tae’ musepang dio mai mintu’ pepasan, tu kubenko allo iate, lako kanan ba’tu lako kairi, ke unturu’ko kapenomban senga’ sia mupenombai,

¹⁵apa iake tae’i muperangii tu gamaranNa PUANG, Kapenombammu, sia tae’ mukaritutui tonganni tu mintu’ pepasanNa sia iatu aluk Napondok, tu kupapassanangko allo iate, manassa la narampoiko sia naruako te mintu’ pa’tampak ropu,

¹⁶iamotu la tampakan ropuko lan kota sia la tampakan ropuko dio lu padang.

¹⁷La tampakan ropu tu mai bakamu sia palungan rotimmu.

¹⁸La tampakan ropu tu rianna pa’tambukammu, bura padangmu, anak sapimmu sia iatu mai anak dombamu sia bembe’mu.

¹⁹La tampakan ropuko lan torro ke’de’mu.

²⁰Iatu PUANG la umparampoangko tampak ropu, kamarukkan sia pa’pagarrak lan mintu’ apa mutoe sia apa mukarang, muurungan disabu’i sia disanggangi madomi’ natumang tu kakadakeanna penggaurammu, belanna mangkaMo’ mutampe.

²¹PUANG la umpata’paiko ropu, naurungan umpisanniko lan mai tondok, tu la muala mupoapa.

²²PUANG la umpata’paiko saki rangke, lalla’, lassu, kele sia baloke’, kamalangkoan, kamalayuan sia pasian; iamoto tu la urrampoiko, ammu mangsan.

²³Iatu langi’ mududung la susi tambaga sia iatu padang mulese la susi bassi.

²⁴Iatu PUANG la umpasae bungin sia barra’-barra’ dio lu tondokmu; la songlo’ dao mai langi’ urrampoiko, ammu sanggang.

²⁵PUANG la ussorongko lako ualimmu, ammu talo. Sangbambari tu lalan la munii sae unneai, apa pitu tu lalan la munii mallai dio mai tingayona, muurungan dadi misa’ katirambanan lako mintu’ kadatuan lan lino.

²⁶Iatu batang rabukmu la napokande mintu’ manuk-manuk dao langi’ sia mintu’ olo’-olo’ dao kuli’na padang, namoi misa’ tau tae’ unnula’i.

²⁷PUANG la umparampoiko pasi Mesir, bundang, kele sia re’pe’, tu tang dampi-dampian.

²⁸PUANG la umpabomboangko, sia umpabagako sia umpamaro-maroko,

²⁹muurungan kasalappa-lappa, ke tangngai allo susito buta lan kamalillinan; tae’ mula maupa’ dio lu lalanmu, apa tontong bangko dipakario-rio sia dipangrampai, namoi misa’ tau tae’ urrampanangko.

³⁰La sikampako misa’ baine, apa to senga’ la ussangamparanni. La umbangunko misa’ banua, apa tae’ mutorroi. La untananniko pa’lak anggoro’, apa tae’ mula ungkandei tu buanna.

³¹Iatu sapimmu la direre’ dio tingayomu, apa tae’ mula ungkandei. Iatu keledaimmu la dirampa dio mai tingayomu, sia tae’mo nasule lako kalemu. Iatu dombamu sia bembe’mu la disorong lako ualimmu, namoi misa’ tau tae’ sae untunduiko.

³²Iatu anakmu muane sia anakmu baine la disorong lako bangsa senga’, anna iko kalena untiroi sia mukamali’ tu’tu’ allo, apa tang mukulle umpogau’ misa’ apa.

³³Iatu bura padangmu sia bura rangka’mu la nakande misa’ bangsa tang mutandai; tontong bangko dipakario-rio sia dilullu’.

³⁴La bomboangko, napobua’ mintu’ apa natiro matammu.

³⁵La Napata’paiko PUANG kele malua’ dio guntu’mu sia dio pupummu, tu tang dampi-dampian — randuk dio mai pala’ lentekmu sae langngan botto ulummu.

³⁶Iatu PUANG la ussolangko sola datummu, tu muangka’ la undatuiko, lako misa’ bangsa, tu tang mutandai, la iko la nene’ to dolomu; inde to dio la munii umpenombai kapenomban senga’, iamotu kayu sia batu.

³⁷La dadiko misa’ apa napomagiang tau, sia napoparumbasan sia napotellean mintu’ bangsa, tu tondokna, Nanii PUANG ussolangko lako.

³⁸La mubaa tu banne buda lako pa’lak, apa sidi’ri tu mupupu, belanna pura nakande batik.

³⁹La mutananni tu pa’lak anggoro’mu sia la mubaai, apa tae’ muiru’i ba’tu munanna tu uai anggoro’na, belanna nakande ulli’.

⁴⁰La muampui tu kayu saitun lan mintu’ lili’mu, apa tae’ muminnakanni kalemu, belanna iatu buanna la rondon.

⁴¹La den anakmu muane sia baine, apa tang la mupoanak, belanna la male dirampa.

⁴²Iatu mintu’ to’ kayummu sia bura padangmu la napoapa batik.

⁴³Iatu to sae dio musisolan samasai-sainna iamo la untongloiko, ammu sarokko-rokkona iko.

⁴⁴Iamo la umpaindanniko, apa tae’ mupaindanni. Iamo la ulu anna iko ikko’.

⁴⁵Iate mintu’ pa’tampak ropu la urrampoiko sia la urrundu’ko sia unta’paiko, ammu mangsan, belanna tae’ muperangii tu gamaranNa PUANG, Kapenombammu, sia tae’ mukaritutui tu mintu’ pepasan sia aluk Napondok, tu mangka Napapassanangko.

⁴⁶Iatu mintu’nato la dadi tanda kalle-kallean sia tanda mangnga dio lu kamu sia dio lu bati’mu sae lakona.

⁴⁷Belanna tae’ muparannu sia sende umpengkaolai PUANG, Kapenombammu, napobua’ mintu’ kaseboanna kameloammu,

⁴⁸iamoto la napotauko mintu’ ualimmu, tu Napake’de’ PUANG ullaoiko, ammu tangdia’ sia ma’rang sia ma’kambelang sia kapu’duran mintu’ apa; Puang la umpapassanni ayoka bassi dao sokkongmu, anNa pisanniko.

⁴⁹PUANG la umpasae misa’ bangsa ullaoiko, tu sae dio mai tondok mambela, dio mai randan langi’, susito langkan maega mettia’, iamotu misa’ bangsa tae’ mitandai basana,

⁵⁰misa’ bangsa matampo, tu tang ungkasayangi to ubanan sia tang ungkamasei pia;

⁵¹tu la ungkandei tu anak patuoammu sia bura padangmu, sae lako purammu mangsan; tang natampeammoko gandung, uai anggoro’ sia minna’, sia anak sapimmu sia anak dombamu sia bembe’mu, sae lako purammu namangsanni bangsa iato.

⁵²La naparampoiko kapussakan lan mintu’ kotamu, sae lako rondon tu tembo’ tambakuku malangka’, tu muposande’ lan mintu’ tondokmu. Manassa la naparampoiko kapussakan lan mintu’ kotamu, lan mintu’ tondok tu la Nabenko PUANG, Kapenombammu.

⁵³Lan kamandasammu sia kapussakammu, nanii ualimmu la umpabuyu’ko, iamoto ammu kandei tu rianna pa’tambukammu, iamotu mai duku’na anakmu muane sia anakmu baine, tu la Nabenko PUANG, Kapenombam- mu.

⁵⁴Iatu mai muane masannang tongan sia tarru’ kaboro’ dio lu kamu la nalessekki mata tu siulu’na ba’tu bainena ba’tu iatu mai anak torronapa,

⁵⁵anna tae’ namorai umpa’benganni lako moi misa’ tau tu duku’ anakna, tu la nakande, belanna iatu ualimmu moi misa’ apa tae’mo natampeanni lan kamandasan sia kapussakan, tu nanii la umpabuyu’ko lan mintu’ kotamu.

⁵⁶Iatu mai baine masannang sia kaboro’ dio lu kamu, tu ungkasayangi tu pala’ lentekna anna tang silese padang, belanna kamasannanganna sia kakaborosanna, la nalessekki mata tu muanena sia anakna muane sia anakna baine, anna tae’ namorai umpa’benganni moi misa’ apa,

⁵⁷moi iatu toninna ba’tu anak sun dikalena tae’ duka, belanna kapu’duranmo mintu’ apa, iamoto nakande bunii tu iannato, napobua’ kamandasan sia kapussakan, nanii ualimmu la umpabuyu’ko lan kotamu.

⁵⁸Iake tae’i mukaritutui tonganni tu mintu’ kada Sukaran aluk, tu disura’ lan te sura’, sia iake tae’i mukataku’i te Sanga mala’bi’ sia metakuran, iamotu PUANG, Kapenombammu,

⁵⁹manassa la Napandasa masang tonganko PUANG, sia tang ka’tu umparampoiko kadipakario-rioan megiangan sia saki kapua.

⁶⁰La Naparampoi pole’ko mintu’ saki Mesir, tu mukataku’, naurungan le’ke’ lako kalemu.

⁶¹Sia ia duka tu mai saki sia kamandasan, tu tang tisura’ lan sura’ Sukaran aluk iate, la Naparampoiko PUANG, sae lako purammu mangsan.

⁶²La sidi’morokomi torro, moi ammi mangkamo buda susi bintoen dao langi’ — belanna tae’mo muperangii tu gamaranNa PUANG, Kapenombammu.

⁶³Susi kanaalanna penaanNa PUANG umpogau’ melona lako kalemi sia la umpamakambankomi, susi dukamoto la naala penaanNa PUANG la ussanggangkomi sia ummangsannikomi; sia la unnali’komi lan mai tondok, tu muala mupoapa.

⁶⁴PUANG la umpatisambo’-sambo’ko dio lu mintu’ to sangpetayanan, randuk dio mai randan langi’ sae lako randan langi’; inde to dio la munii umpenombai, kapenomban senga’, tu tae’ mutandai la iko la iatu mai nene’ to dolomu, iamotu kayu sia batu.

⁶⁵Tae’ mula unnappa’ karapasan sia inan kapelayoanna pala’ lentekmu, belanna iatu PUANG la umbenko penaa ma’parondo dio, sia matammu ponno kamailuan sia bonnong tu penaammu.

⁶⁶Iatu katuoammu naluang bang kasanggangan; iake bongi sia iake allo la tirambanko sia iatu katuoammu tang manassa.

⁶⁷Ianna masiang la ma’kadako mukua: A’a, kenna bongiomora; sia iake bongi la ma’kadako mukua: a’a kenna masiangomora — napobua’ kamatakuran, tu umponnoi penaammu, sia napobua’ apa nata’pai matammu.

⁶⁸La Napopa’kappala’ko PUANG sule lako Mesir dio lu lalan, tu mangka Kupokada lako kalemu, kumua: Tae’mo mula untiro lenni; la dibaakomi dibalukan lako ualimmi la dipokaunan muane, sia dipokaunan baine, apa tae’ tau unnallikomi.