Read Toraja-Sa'dan PA’TOLE 31 Bible Online

PA’TOLE 31 - Toraja-Sa'dan bible

PA’TOLE 31

¹Pakalan malemi tu Musa umpokadai lako mintu’ to Israel te kada iate;

²ma’kadami lako nakua: Iate aku saratu’ duangpulomo taun kadadiangku; tae’mo kuma’din lu tama lu lan mai sia ma’kadamo tu PUANG lako kaleku Nakua: Tae’ mula ullambanni te Yordan.

³PUANG, Kapenombammumo, la undoloangko male; iamo la urrambai sia la ussanggangi tu mai bangsa iato dio tingayomu, muurungan ma’din unnalai tu tondokna mupoapai; Yosua la undoloangko lamban, susitu mangka Napepasanan PUANG.

⁴Sia PUANG la umpogauranni tu tau iato, susi Napogau’ lako Sihon sia Og, datu to Amori, tu Nasabu’i, sia lako tondokna.

⁵PUANG la ussoronganni lako kalemi tu tau iato sia la mipogau’ lako tau iato, susitu mintu’ pepasan, tu mangka kupa’bengan lako kalemi.

⁶La matoto’komi sia barani, da mimataku’ sia ma’parondo lako tau iato, belanna PUANG, Kapenombammumo, Kalenamo ussolangko; tae’ Nala ussa’biangangko sia tae’ Nala untampeko.

⁷Attu iato natambaimi Musa tu Yosua sia nakua ungkuanni dio tingayona mintu’ to Israel, nakua: Matoto’ko sia barani, belanna ikomo la rampo tama tondok sola te bangsa iate, tu mangka Naallu’ PUANG lako nene’ to dolona tau iato Napalaoi sumpa, kumua la umbenni sia la umpaketaa mana’i tu tau iato.

⁸Belanna PUANG Kalenamo la male undoloangko sia Iamo la musisolan. Tae’ Nala ussa’biangangko Puang sia tae’ Nala untampeko; da mumataku’ sia da mutiramban.

⁹Iatonna mangkamo Musa ussura’i tu Sukaran aluk iate, napa’bengan lako to minaa, iamotu bati’na Lewi, tu umbulle patti basseNa PUANG, sia lako mintu’ pekaamberanna to Israel.

¹⁰Sia mepasan tu Musa lako tau iato nakua: Iake ganna’mi pitung taun, ke attu dipamanassa lan taun kamaseroan indan, iamotu allo kapua Pekalumban,

¹¹iake male nasangi tu to Israel mennolo lako PUANG, Kapenombammu, dio inan, tu la Napilei, attu iato la mubasa te Sukaran aluk dio pa’peranginna mintu’ to Israel.

¹²Tambaimi tu to buda sirampun, la muane, la baine, la iatu mai pia, sia iatu to sae, tu torro lan kotamu, anna perangii sia napelada’i ungkataku’ PUANG, Kapenombammi, sia ungkaritutui tonganni tu mintu’ kada Sukaran aluk iate,

¹³sia iatu mai anakna tau iato, tu tang untandaipi, la umperangii sia umpelada’i ungkataku’ PUANG, Kapenombammi — lan mintu’ attu, minii tuo lan tondok, tu la miala mipoapa, ke mangkamokomi ullamban Yordan.

¹⁴Ma’kadami tu PUANG lako Musa, Nakua: Mandappi’mo tu sunga’mu; iamoto tambaimi tu Yosua, mimale mibendan sola lan Tenda Kasitammuan, angKu benni parenta. Attu iato malemi tu Musa sola Yosua tama Kema Kasitammuan anna bendan lan.

¹⁵Payanmi tu PUANG lan tenda lan lentong gaun, na iatu lentong gaun bendan dio to’ ba’ba tenda.

¹⁶Ma’kadami tu PUANG lako Musa, Nakua: Manassa la malemoko tama batu dilobang dipasola nene’ to dolomu, na iatu bangsa iate la male unturu’ kapenomban senga’na tondok, tu nanii tama, susito pasandak salu lako rampanan kapa’ sia la umboko’iNa’ sia umpoka basseKu, tu mangka Kutanan sola.

¹⁷Allo iato la re’dek ara’Ku unta’pai, angKu boko’i sia Kubunian lindoKu, anna pisan tu tau iato sia buda kamandasan sia kapussakan urrampoi. Allo iato la ma’kada nakua: Tangiaraka napobannang to tu kamandasan urrampoiki’, belanna tae’ tu Kapenombanta tasisolan?

¹⁸Apa allo iato la Kubunian tongan lindoKu natumang mintu’ kakadakean tu mangka napogau’, belanna male sumepang lako kapenomban senga’.

¹⁹Iamoto sura’i te sengo, ammu adaranni to Israel sia pamalutei dio pudukna, kumua, nasengo iate Kuposa’bi umpasala to Israel.

²⁰Belanna la Kusolan tu tau iato mai lako tondok, tu mangka Kuallu’ lako nene’ to dolona Kupalaoi sumpa, tondok sebo pangandu’ sia tani’ enoan. La kumande sadia’na sia ma’pelompo, apa la sumepang lako kapenomban senga’ sia napengkaolai. Na iatu Aku la napamatuna sia iatu basseKu la napoka.

²¹Iake narampoi buda kamandasan sia kapussakan tu tau iato, manassa iate sengo la sa’bi umpasalai tu tau iato, belanna tae’ nala tore len nasa’bu’ bati’na. Belanna Kutandai tu pa’inaanna tu lan penaanna allo iate, tongKu tang ussolampi lako tondok, tu mangka Kuallu’ lako tau iato mai Kupalaoi sumpa.

²²Pakalan nasura’mi Musa te sengo iate sia naadaran to Israel.

²³Sia Napasan Puang tu Yosua, anakna Nun, nakua: La matoto’ko sia barani, belanna ikomo la ussolanni tu to Israel tama tondok, tu mangka Kualluranni Kupalaoi sumpa, sia Aku la urrondongko.

²⁴Iatonna mangka Musa ussura’i tu mintu’ kada Sukaran aluk iate lan misa’ sura’ sae lako tappunna,

²⁵napasanmi lako to Lewi, tu umbulle patti basseNa PUANG, nakua:

²⁶Alami te sura’ Sukaran aluk sia patorroi dio la’pek patti basseNa PUANG, Kapenombammi, kumua nainde to la sa’bi umpasalako.

²⁷Belanna kutandai tu kapabali-baliammu sia kamatoroammu. Inde tuo siapa’ ussisolangkomi, mibali-balimo tu PUANG, ondong pole’pi, ke matemo’!

²⁸Tambaimi tu mintu’ pekaamberanna sukummi sia mantari’mi sirampun lako kaleku, angku pokadai te mintu’ kada dio pa’peranginna sia la kutambai tu langi’ sia padang la ussa’bii umpasalai tu tau iato.

²⁹Belanna kutandai, kumua, iangku matemo, la umpagau’komi kabulitukan tongan sia sumepangkomi dio mai lalan tu mangka kupepasanan lako kalemi. Iamoto la narampoikomi kasanggangan undinna, ke mipogau’i tu apa kadake dio pentiroNa PUANG sia mipamapa’di’ tu penaanNa diona panggaraga limammi.

³⁰Attu iato nasa’bu’mi Musa dio pa’peranginna mintu’ kombonganna to Israel tu kada sengo iate sae lako tappunna.