Read Toraja-Sa'dan PA’TOLE 33 Bible Online

PA’TOLE 33 - Toraja-Sa'dan bible

PA’TOLE 33

¹Inde sia tu pa’passakke, tu nanii Musa, to Natonno’ Puang Matua umpassakke to Israel tonna tae’pa namate.

²Ma’kadami nakua: Iatu PUANG mengkalao dao mai Sinai sia bu’tu unnarrangi tu tau iato dio mai Seir; sombomi parrang dao mai ma’buntunna Paran sia rampomo bu’tu lu dio mai ma’pulo-pulo sa’bunna to masero pindan. Dio kananNa natiro tu api dukku.

³Tonganna Nakamasei tu mai bangsa iato; mintu’ to maserona — lan nasang limamMi, matindo dio to’ lentekMi sia untarima pirang-pirang buku kadamMi.

⁴Napasanmoki’ Musa tu Sukaran aluk, tu napoapa kombonganna Yakub.

⁵Puangmo dadi Datu dio lu Yesyurun, tonna sirampun tu mai pangulunna bangsa sola mintu’ sukunna Israel.

⁶Natuomora tu Ruben, da namate, sangadinna la tontong tang pira tu bilanganna.

⁷Inde sia tu diona Yehuda. Ma’kadami tu Musa nakua: Perangiimi, o PUANG, tu gamaranna Yehuda, amMi solanni lako bangsana; iatu limanna umpararianni, na Puangmora tu Patunduanna unneai tu ualinna.

⁸Iatu diona Lewi ma’kada nakua: Iatu TumimMi sia UrimMi napoapa tu to naala penaamMi, tu Mitoba dio Masa, tu Miposigaga dio to’ uainna Meriba;

⁹tu napokada diona ambe’na sia indo’na kumua, tae’ kutiroi; iatu siulu’na tae’ natandai sia iatu mai anakna tae’ naissanni. Belanna ungkaritutui kadamMi sia ungkanannangi basseMi.

¹⁰Naada’imi tu Yakub diona atoramMi sia Israel diona sukaran alukMi; natunumi tu dupa, amMi udukki sia napatorro tu pemala’ ditunu pu’pu’ dao inan pemalaramMi.

¹¹Pamasakkemi, o PUANG, tu kamatotoranna sia popaimanni tu pentoeanna. Sanggangmi tu aakna tu to umbali sia iatu to ungkabiri’i, naurungan tang nakullemo bendan.

¹²Iatu diona Benyamin ma’kada nakua: Iatu to Nakamasei PUANG, tu la torro marampa’ Narondong Puang. Puang tontong unnonganni sia torro lan alla’na buntu mennaa’na.

¹³Iatu diona Yusuf ma’kada nakua: Napamasakkemira PUANG tu tondokna, anNa kamasei pamengan mala’bi’ tongan dao mai langi’ sia ambun, sia kalimbuang lu diong mai posi’na padang,

¹⁴sia pamengan mala’bi’ tongan, tu napabu’tu mata allo, sia pamengan mala’bi’ tongan tu napabu’tu bulan;

¹⁵sia sanda maelo napakendek buntu sipuli padang sia pamengan mala’bi’ tongan napalangngan tanete sangkarapoi itana,

¹⁶sia pamengan mala’bi’ tongan diong mai kuli’na padang situang kaseboanna; sia kanaalanna penaanNa Puang, tu ma’dioren lan to’ duri; narampomora tu iannato dao botto ulunna Yusuf sia toppo’ dao passaronganna to dipilei langsa’ dio lu to massiulu’.

¹⁷Iatu bunga’na sapinna unnampui kamala’biran sia iatu tandukna iamo tanduk sapi laki lampung; iamo la natandukanni tu mai bangsa, mintu’ randan langi’. Iamote tu ma’pulo-pulo sa’bunna Efraim sia iamote tu ma’sa’bu-sa’bunna Manasye.

¹⁸Iatu diona Zebulon ma’kada nakua: Parannuko, e Zebulon, diona kalingkammu, sia iko, e Isakhar, diona tendamu.

¹⁹La natambai langngan buntu tu mai bangsa; inde to la nanii umpemalaran pemala’ unturu’ tonganna, belanna napasusu kaseboanna tasik tu tau iato mai sia apa ballo tu kabunian dio biring tasik.

²⁰Iatu diona Gad ma’kada nakua: Mintu’ kadipudian lu langngan Puang, tu umpamalona’ pa’padanganna Gad; matindomo diong susito singa birang, anna le’to-le’toi tu mai takia’, ondongpi untesse-tessei tu kararo ulu.

²¹Naalan kalena tu taa ma’iringanna, belanna inde to nanii membuni tu taana to ma’parenta; rampo lako pangulunna bangsa iato; napalalo tu kamaloloanNa PUANG sia ukunganNa sola to Israel.

²²Iatu diona Dan ma’kada nakua: Iatu Dan susito anak singa, tu mekkondong tassu’ dio mai Basan.

²³Iatu diona Naftali ma’kada nakua: Iatu Naftali dipedia’i kamasokanan sia dipakabu’i kamasakkean lu dio mai PUANG; alami tu tasik mupoapai sia iatu rampe Lo’na lu.

²⁴Iatu diona Asyer ma’kada nakua: Namaupa’mora tu Asyer dio lu mintu’ pia muane; nakaboro’imira siulu’na sia naotonmira tu lentekna tama to’ minna’.

²⁵Na bassimora sia tambaga muposalliran, nakamatotorammumora la pada lambe’ sunga’mu.

²⁶Moi misa’ tau tae’ sangtende’na Puang Matua, e Yesyurun; tu ma’kareta dao langi’ butung to patunduammu, sia situang kapasareongananNa dao lu salebu’.

²⁷Puang Matua matontongan mupopentionganan sia tontong urrande pala’ko. Belanna mangkamo unnula’ ualimmu dio tingayomu sia ma’kada Nakua: Pisanni!

²⁸Iamoto natorro marampa’ Israel, sia mata uainna Yakub tang dipatumba lan tondok, tu nanii gandung sia uai anggoro’ ba’ru; ondongpi iatu langi’na umpato’doanni ambun.

²⁹Maupa’ko, e to Israel; mindara susimmu? Iamotu misa’ bangsa Nalendokan PUANG, tu balulang patunduammu sia pa’dang kamatandeammu. Iamoto na iatu ualimmu unna’ga to mengkanorong bangmo kalena lako kalemu, sia mulese tu padang madaona.