Read Toraja-Sa'dan PA’TOLE 34 Bible Online

PA’TOLE 34 - Toraja-Sa'dan bible

PA’TOLE 34

¹Attu iato kendekmi tu Musa diong mai padangna Moab langngan buntu Nebo, bottona Pisga, tu sitingoan Yerikho, anNa patiroanni PUANG tu mintu’ tondok iamotu dio mai Gilead sae lako Dan,

²sia mintu’ lili’na Naftali, tondokna Efraim sia Manasye, sia mintu’ tondokna Yehuda sae lako tasik dio lu rampe matampu’;

³sia tondok rampe Lo’na lu sia Padang, sia iatu lombok Yerikho, iamotu tondok nanii koroma sae lako Zoar.

⁴Sia ma’kada tu PUANG lako Nakua: Inde sia tu tondok, tu mangkaNa’ umpalao sumpa lako Abraham, Ishak na Yakub, Kukua: la Kukamasean bati’mu. Mangkamoko Kupatiroan dio pentiromu, apa tae’ mula lamban lako.

⁵Pakalan matemi tu Musa, taunNa PUANG, dio, lan tondok Moab, susitu kadanNa PUANG.

⁶Nalamunni Puang diong misa’ lombok lan tondok Moab, sitingoan Bet-Peor, sia moi misa’ tau tae’ untandai tu lamunanna sae lako allo iate.

⁷Iatu Musa saratu’ duangpulomo taunna, tonna mate. Iatu matanna tae’pa namaraun sia iatu kamatotoranna tae’pa namoro’.

⁸Iatu to Israel umbatingi Musa dio padang Moab tallungpulo allona, sae lako tappunna tu mintu’ allo passanda bolongan lako Musa.

⁹Iatu Yosua, anakna Nun, nakabu’mo penaa kakinaan, belanna mangkamo naremme’i Musa. Iamoto naperangii to Israel tu kadanna sia napogau’ susitu mangka Napepasanan PUANG lako Musa.

¹⁰Tae’mo nabi tunannang dio to Israel susi Musa, tu Natandai PUANG sia sitiro lindo —

¹¹napobannang den tu mintu’ tanda kalle-kallean sia tanda mangnga, tu Nasua PUANG umpogau’i lan tondok Mesir lako Firaun sia lako mintu’ to mase’ponna sia lako mintu’ tondokna,

¹²sia napobannang umpa’petiroan mintu’ kuasa sia mintu’ penggauran mepatiramban tongan, tu mangka napogau’ Musa dio pentirona mintu’ to Israel.