Read Toraja-Sa'dan PA’TOLE 6 Bible Online

PA’TOLE 6 - Toraja-Sa'dan bible

PA’TOLE 6

¹Inde sia tu pepasan, inde sia tu apa dipondok sia atoran, tu mangka Napa’parentan PUANG, Kapenombammi, la diadarangkomi, la mituru’ lan tondok, tu la minii male lako, la miala mipoapa,

²kumua ammu kataku’i tu PUANG, Kapenombammu, ke mukaritutui tu mintu’ aluk Napondok sia pepasan, tu kupapassanangko, la iko la anakmu sia ampomu lan mintu’ allo katuoammu sia anna malambe’ tu sunga’mu.

³Iamoto perangii, e to Israel, sia karitutui tonganni, kumua ammu malaga’-laga’ sia kumua ammu marapuan, susitu mangka Naallu’ PUANG, Kapenombanna nene’ to dolomu, lako kalemu lan tondok sebo pangandu’ sia tani’ enoan.

⁴Perangiimi, e to Israel: Iatu PUANG Iamo Kapenombanta; iatu PUANG misari!

⁵La ponno penaammu sia mintu’ deatammu sola mintu’ kamatotorammu la ungkamali’ PUANG, Kapenombammu.

⁶Iatu apa kupepasanan lako kalemu allo iate, la torro lan penaammu,

⁷la muadaran mintu’ anakmu sia la mupokada tu iannato, ke unno’ko’ko lan banuammu, sia iake dioko lu lalan, sia iake matindoko, sia iake millikko.

⁸Sia la mupemporian duka dio limammu la dipotanda sia la mupentalian dio kidemu dio kasitammuan matammu,

⁹sia la musura’ dio ampang ba’ba banuammu sia dio babanganmu.

¹⁰Iake Nasolammoko PUANG, Kapenombammu tama tondok, tu Napalaoan sumpa unnallu’i lako nene’ to dolomu, Abraham, Ishak na Yakub, la Nasorong lako kalemu — iamotu ba’tu pira-pira kota kapua sia melo, tu tangia iko umpabendanni,

¹¹tu ba’tu pira-pira banua tu nanii ponno ianan, tu tangia iko umponnoi, sia iatu ba’tu pira-pira bubun batu, tu tangia iko umpa’i, ba’tu pira-pira pa’lak anggoro’ sia kayu saitun, tu tangia iko untananni — sia iake mangkami mukande sadia’mu.

¹²Attu iato kanandai tu kalemu, da mukalupai tu PUANG, tu ussolangko tassu’ lan mai tondok Mesir, lan mai inan minii dipokaunan.

¹³Iatu PUANG, Kapenombammu, la mukataku’ sia la mupengkaolai sia la umpalaoko sumpa tete dio sanganNa.

¹⁴Da mituru’i sia umpenombai kapenomban senga’, ba’tu pira-pira tu mai deatanna bangsa untikuikomi,

¹⁵belanna iatu PUANG, Kapenombammu, Iamo Kapenomban manoka ditimba oloNa dio lu kamu, kumua na iatu kare’dekan ara’Na PUANG, Kapenombammu, da nadukku ullaoiko sia da Nasabu’iko dao mai kuli’na padang.

¹⁶Da mitobai tu PUANG, Kapenombammi, susitu mangka mipogau’ dio Masa.

¹⁷La mikaritutui tongan tu pepasanNa PUANG, Kapenombammi, sia mintu’ tu apa Napamanassa sia aluk Napondok, tu mangka Napapassanangko.

¹⁸La mupogau’ tu apa malolo sia melo dio pentiroNa PUANG, kumua ammu malaga’-laga’ sia tamako tondok melo, tu mangka Naallu’ PUANG lako nene’ to dolomu Napalaoi sumpa sia la muala mupoapa,

¹⁹ke muula’i tu mintu’ ualimmu dio tingayomu, susitu mangka Napokada PUANG.

²⁰Iake nakutanaiko anakmu undinna, kumua: Matumbari tu apa dipamanassa sia aluk dipondok sia atoran, tu mangka Napapassanangkomi Kapenombanta?

²¹La ma’kadako lako anakmu kumua: Iatonna dolona kaunannaki’ Firaun lan Mesir, apa mangkamoki’ Nasolan PUANG tassu’ lan mai Mesir tete dio lima mawatang.

²²Napogau’mo PUANG tu tanda sia tanda mangnga dio pentirota, tu kalle-kallean sia mesanggangan lako Mesir sia lako Firaun sia mintu’ to lan banuanna.

²³Apa Nasolanmoki’ tassu’ lan mai, anna baaki’ tama tondok Naalluran nene’ to dolota Napalaoi sumpa anNa benki’.

²⁴Iatu PUANG umpasanki’ la ungkaritutui mintu’ te aluk dipondok sia la ungkataku’i tu PUANG, Kapenombanta, kumua anta tontong malaga’-laga’, sia anNa karimmanniki’, susitu a’ganta allo iate.

²⁵Iamote tu la tapomalolo, ke takaritutui tonganni te mintu’ pepasan dio oloNa PUANG, Kapenombanta, susitu mangka Napepasanan lako kaleta.