Read Toraja-Sa'dan YOHANES 1 Bible Online

YOHANES 1 - Toraja-Sa'dan bible

YOHANES 1

¹Tempon mulanna naden tu Bisara, na iatu Bisara siayoka Puang Matua, sia iatu Bisara Ia bangsia Puang Matua.

²Inang denmo Ia tonna tipamulanna sola Puang Matua.

³Mintu’na angge maritik dipadadimo tete dio Kalena, iake tae’i na Ia tae’ duka misa’ dadi tu mintu’na dadinnamo.

⁴Ia oto’na katuoan, anna iatu katuoan iamo arrangna tolino.

⁵Parrang lan kamalillinan tu arrang iato, anna tae’ nataloi kamalillinan.

⁶Saemi misa’ tu to Nasua Puang Matua, disanga Yohanes.

⁷Iamo sae umpamanassai, la ungkatottongi tu diona arrang, kumua anna ma’patongan tu mintu’ tau belanna Ia.

⁸Tangia kumua iamotu arrang, sangadinna la ungkatottongiri tu diona arrang.

⁹Iatu manassana arrang tu unnarrang mintu’ tau, mane sae tama lino.

¹⁰Lanmo lino sia mangka Napadadi te lino, apa tae’ natandai lino.

¹¹Saemo umpellambi’i apanNa, apa to Napotau ia tu ungkanokaI.

¹²Apa padami tau untarimaI, iamo Naben kuasa la mendadi anakNa Puang Matua, tu to ungkanappa’i tu sanganNa;

¹³tu kombong tang lu dio mai rara sia tang lu dio mai kasikamaliranna kale sia tang lu dio mai kamoraianna muane, sangadinna lu dio mai Puang Matua.

¹⁴Mentolinomo tu Bisara, sia tongkon tau matamo tasisolan sia kitiromo tu kamala’biranNa, susi kamala’biranNa Anak misa dio mai Ambe’, ponno kamaturu-turuan sia kamanapparan.

¹⁵Nakatottongimi Yohanes sia metamba-tamba nakua: Iamora te tu mangka kupokada a’ganNa kumua: Iatu undinna sae na aku, Iamo undoloina’, belanna inang dolo Ia den na aku.

¹⁶Belanna dio mai kala’bianNa, anta timba tang tore pa’kamasean sola nasang.

¹⁷Belanna napa’benganmo Musa tu Sukaran aluk, apa iatu kamaturu-turuan sia kamanapparan Napaombo’ Yesu Kristus.

¹⁸Iatu Puang Matua moi misa’ duka tau tae’pa untiroi; anNa Anak misa, tu diong bantananNa Ambe’, Ia umpa’pepayananNi.

¹⁹Inde sia tu nakatottongi Yohanes, tonna ussua to minaa sia to Lewi tu to Yahudi dio mai Yerusalem la lao umpekutananni lako, kumua: Mindarakomi?

²⁰Mangakumi sia tae’ nameongan; mangaku kumua: Tae’ aku na aku te tu Mesias.

²¹Mekutanami tinde tau lako kumua: Iake susito, mindakomi kamu? Kamumoraka Elia? Nakuami: Tae’. Kamumoraka tu nabi? Nakuami mebali: Tae’.

²²Nakuami tinde tau lako: Na mindakomi kamu? Angki issanni mebali lako tu to ussuakan. Umbara mikua umpokadai tu kalemi?

²³Nakuami: Akumote tu gamaranna to metamba-tamba dio padang pangallaran kumua: Ranteimi tu batattaNa Puang, susitu mangka napokada nabi Yesaya.

²⁴Iatu to disua, to Farisi.

²⁵Mekutanami lako sia nakua ungkuanni: Iake tangiakomi Mesias, sia tangia Elia sia tangia tu nabi, ma’apai ammi dio’ tau?

²⁶Mebalimi Yohanes lako, nakua: Aku te uai bangri kupa’dioran, apa lan tangnga-tangngami bendanmo tu To tang mitandai.

²⁷Iamoto tu undi sae na aku, na moi ulang lapik lentekNa tang sipatuna’ la umbukai.

²⁸Mintu’na tu iannato dadimo dio Betania, dio lamban lianna salu Yordan tu nanii Yohanes undio’ tau.

²⁹Tonna masiang to nakitami tu Yesu sae lako kalena nakuami: Tiromi tu Anak dombaNa Puang Matua, tu ussarapai kasalanna issinna lino.

³⁰Iamora te tu kupokada a’ganNa kumua: Undinna na aku la sae misa’ tu To undoloina’, belanna inang dolo Ia den na aku.

³¹Dolona tae’ kutandai; apa dikua anNa dipa’pepayanan lako to Israel, iamoto angku sae umpa’dioran uai.

³²Nakatottongimi Yohanes nakua: Kukitamo tu PenaanNa Puang Matua songlo’ dao mai langi’ susi bu’ku’, unta’pai.

³³Aku tae’ duka kutandai, apa Ia tu To ussuana’ umpa’dioran uai, mangka umpokadanna’ kumua: Minda-minda mutiro Nanii songlo’ tu Penaa anna torroi, Iamoto tu umpa’dioran Penaa Masallo’.

³⁴Kukitamo angku katottongi kumua Iamo te tu AnakNa Puang Matua.

³⁵Iatonna masiang to, bendan pole’omi inde to dio tu Yohanes sola anak gurunna da’dua.

³⁶Iatonna kitami tu Yesu sumalong-malong, nakuami: Tiromi tu Anak dombaNa Puang Matua.

³⁷Tonna rangi tinde anak gurunna Yohanes sola duai ma’kada susito, undimi urrundu’ Yesu.

³⁸Messailemi tu Yesu; iatonna kitai undi urrundu’I, Nakuami ungkuanni: Apara tu midaka’? Nakuami mebali: O Rabi! — ke dipallemba’i battuananna Guru — : umbara Minii torro?

³⁹Nakuami lako tinde tau: Maimokomi untiroi! Laomi natiro tu Naninna torro, anna torro sola Yesu to allo iato. Tonna iato agi-agi te’te’ a’pa’ makaroen.

⁴⁰Iatu Andreas, siulu’na Simon Petrus, iamo misa’ to tau da’dua, tu urrangi dio mai Yohanes, anna undi urrundu’ Yesu.

⁴¹Bunga’na sitammumi Andreas tu Simon, siulu’na, nakuami lako: Kikabu’tuimo tu Mesias, ke dipallemba’i battuananna Kristus.

⁴²Nasolammi lako Yesu. Napatontongimi mata Yesu Nakua: Iko te Simon, anakna Yohanes, la disangamoko Kefas, ke dipallemba’i battuananna Petrus.

⁴³Iatonna masiang to la malemi lako Galilea; Nasiappa’ Filipus. Nakuami ungkuanni: Undiko urrundu’Na’.

⁴⁴Iatu Filipus to Betsaida, sangtondok Andreas na Petrus.

⁴⁵Siappa’omi Filipus tu Natanael, nakuami lako: Kikabu’tuimo tu nasura’ Musa lan Sukaran aluk tu diona a’ganNa sia mintu’ nabi, Iamotu Yesu, anakna Yusuf, to Nazaret.

⁴⁶Nakuami Natanael lako: Ma’dinraka tu Nazaret nanii bu’tu melona? Nakuami Filipus: Maimoko mutiroi!

⁴⁷Nakitami Yesu tu Natanael sae lako Kalena, Nama’kada umpokadai tu a’ganna Nakua: Tiromi tu misa’ to Israel tongan, tu tae’ tangnga’ kadake dio kalena!

⁴⁸Nakuami Natanael lako: Umbara Mikua untandaina’? Nakuami Yesu mebali lako: Tae’pa natambaiko Filipus, tommu dio to’ ara angKu kitamoko.

⁴⁹Nakuami Natanael mebali lako: O Rabi, Kamumo tu AnakNa Puang Matua! Kamumo tu Datunna to Israel!

⁵⁰Mebalimi Yesu sia Nakua ungkuanni: Ma’patonganrokoka, tu belanna Kukua mati’: Kukitako dio to’ kayu ara? La mukita tu ondong kapuanna na iate iannate.

⁵¹Sia Nakua lako: Tonganna tongan Kukua mati’; la mikita tu langi’ tibungka’, sia mintu’na malaeka’Na Puang Matua sisula’ sirrin songlo’ lako Anak rampan dilino.