Read Toraja-Sa'dan YOHANES 10 Bible Online

YOHANES 10 - Toraja-Sa'dan bible

YOHANES 10

¹Tonganna tongan Kukua mati’: minda-minda tu tang lu dio mai ba’ba natama bontong domba, sangadinna metteka’ lu dio mai senga’na, iamo ia to boko ba’tu pa’gora’.

²Apa iatu unnola tamanna ba’ba, iamo ia to mangkambi’ domba.

³Iate tau iate nabungkaran ba’ba to ma’kampa ba’ba, sia narangi domba tu gamaranna, natambai nasangi tu dombana siamo nasa’bu’ simisa’ sanganna, anna pasunni.

⁴Ianna mangkamo umpasun nasangi tu dombana, dolomi nasangundian tu domba urrundu’i, belanna natandai tu gamaranna.

⁵Apa iatu to senga’ manoka undi urrundu’i, sangadinna mallai dio mai, belanna tae’ natandai tu gamaranna.

⁶Iamote tu pa’pasusian Napokada Yesu lako tu tau; apa tae’ naissanni tu Napokadanna lako.

⁷Nakua pole’omi Yesu: Tonganna tongan Kukua mati’, Akumote tu ba’ba domba.

⁸Na ia tu mintu’nato dolo sae na Aku, iamoto tu to boko sia pa’gora’, apa manoka tu domba umperangii tu tau iato.

⁹Akumote tu ba’ba. Iake denni tau unnolaiNa’, iamo makarimman sia lu tama lu lan mai naungkabu’tui kande.

¹⁰Iatu to boko sae manna ia la boko sia parere’ sia pasanggangan, Aku te saeNa’, dikua anna kabu’tui kala’bian katuoan tu domba.

¹¹Akumo tu to mangkambi’ masokan; iatu to mangkambi’ masokan ussorong penaanna ussondai tu mintu’ domba.

¹²Apa iatu to sumaro tangia to mangkambi’, sia iatu domba tangia apanna, ianna tiroi tu guruk sae, natampemi tu mai domba namale umpallaian kalena, naalai guruk tu domba sia napasisarak-sarak.

¹³Belanna to disaro bangri ia, natae’ pole’napoinaai tu domba.

¹⁴Akumo tu to mangkambi’ masokan; Kutandai tu mai pangkambi’Ku, sia natandai dukaNa’ tu pangkambi’Ku,

¹⁵susitu Ambe’ untandaiNa’, sia Aku untandai tu Ambe’; angku sorong penaangKu belanna mintu’ tu domba.

¹⁶Den dukapa dio KaleKu tu domba senga’ tu tang lanna bontong domba iate; mintu’nato sipatu duka Kubaa, sia la narangi tu gamarangKu, anna sita’pa mendadi sangtuntunan, sia misamora to mangkambi’na.

¹⁷Iamoto anNa kamaseiNa’ Ambe’Ku, belanna ussorongNa’ penaangKu, kumua angKu alai sule.

¹⁸Moi misa’ tau tae’ unnalai dio mai Kaleku, apa inaangku Aku ussorongi. KuasaNa’ ussorongi sia kuasa dukaNa’ unnalai sule; iate parenta iate Kutarima lu dio mai Ambe’Ku.

¹⁹Sita’gen pole’omi tu to Yahudi tu belanna kada iato.

²⁰Budai tu kumua: Nataba deata masussuk nabomboan, ma’apai kamu ammi perangii?

²¹Den pole’o tu kumua: Tae’ ia nakadanna to natamai deata te. Ma’dinraka tu deata masussuk umpamillik mata to buta?

²²Tonna attu iato, pa’gauran umba’rui Banua Kabusungan dio Yerusalem, sia iatonna attu iato attu kamadinginan.

²³Sumalong-malongmi tu Yesu lan Banua Kabusungan lan serambinna Salomo.

²⁴Natalimbung tamami to Yahudi sia nakua lako: Sangapapara la Minii unnempai bang lalan penaangki? Iake Kamumo Mesias, pokadan pissan bangmokan.

²⁵Nakuami Yesu mebali lako tinde tau: Mangkamokomi Kupokadan, anna tae’ mipatonganni; mintu’na tu penggauran Kupogau’ tete dio sanganNa Ambe’Ku, iamoto tu ungkatottongi tu a’gangKu.

²⁶Apa iate kamu tae’ mipatonganni, belanna tae’ misangbilangan dombaKu.

²⁷Mintu’na tu dombaKu urrangi gamarangKu, sia Kutandai, sia sangundian urrundu’Na’,

²⁸sia Aku umbenni katuoan tontong sae lakona, dadi tae’ nala sanggang sae lakona, sia moi misa’ tau tae’ umbelai urrampai dio mai Kaleku.

²⁹Iatu Nasorongan Ambe’Ku lako Kaleku, ondong mala’bi’na na iatu mintu’ angge maritik; moi misa’ tau tae’ umbelai urrampai dio mai Ambe’Ku.

³⁰Iatu Aku na Ambe’ misa’ bangsiari.

³¹Unnala pole’omi batu tu to Yahudi la natumbuanNi.

³²Nakuami Yesu mebali lako tinde tau: Budamo tu penggauran melo dio mai Ambe’Ku Kupa’pekitanan lako kalemi, umbannamora tu penggauran iato tu la minii untumbuiNa’ batu?

³³Nakuami tu to Yahudi mebali lako: Iatu penggauran melo tae’ ia na ia la kinii untumbuiKomi batu, apa iari tu umpa’kada solangiKomi Puang Matua, sia iatu to linoKomi amMi papada Puang Matua KaleMi.

³⁴Nakuami Yesu mebali lako tinde tau: Tang disura’raka lan Sura’ Sukaran alukmi susite: Mangkamo’ ma’kada kumua: kamumo tu deata?

³⁵Iake disa’bu’ deatai tu mai to mangka dinii umparampo kadanNa Puang Matua sia tae’ nama’din dipaleluk tu lanna Sura’ Madatu,

³⁶sipaturaka la mikua lako tu To Napamaindan Ambe’ sia Nasua tama te lino, kumua: Umpa’kada solangiKomi Puang Matua, tu belanna Kukua: Aku te, AnaknaNa’ Puang Matua?

³⁷Iake tae’i Kupogau’i tu pengkarangan Natuntun Ambe’Ku, da’ ammi patonganNa’.

³⁸Apa iake kupogau’i, patonganni tu pengkarangan iato, moi natae’ mipatonganNa’, anna sakerangngan-rangnganna miissan sia mikatonganni kumua lan KaleKu tu Ambe’ sia Aku lan Ambe’.

³⁹La morai pole’omi untingkanNi, apa tilendok dio mai limanna tau iato mai.

⁴⁰Male pole’omi lian sambalinna lu Yordan tu inan nanii Yohanes randuk undio’ tau, Natorro inde to dio.

⁴¹Budami tau sae lako Kalena sia nakua: Inang tae’ ia tanda kalle-kallean misa’ Napogau’, apa mintu’na tu apa napokada diona te Tau iate, tonganna bang.

⁴²Budami tau umpatongan Yesu inde to dio.