Read Toraja-Sa'dan YOHANES 11 Bible Online

YOHANES 11 - Toraja-Sa'dan bible

YOHANES 11

¹Denmi misa’ to masaki disanga Lazarus to Betania, dio mai tondokna Maria sola sangbainena, disanga Marta.

²Iamo Maria iato tu umbolloi minna’ pandere’ Puang, sia umpa’dii beluakna tu lentekNa tu umpoanak muanei tu Lazarus masaki.

³Mesuami tu to massiulu’ sola duai lako Yesu nakua: O Puang, iatu to Mipakaboro’, masaki.

⁴Apa iatonna rangii Yesu to, Nakuami: Tae’ ia nala umpomatei tu saki iato, sangadinna la Napomala’bi’ Puang Matua, kumua anNa dipakala’bi’ tu AnakNa Puang Matua diona to.

⁵Iatu Marta sia sangbainena na iatu Lazarus Napakaboro’ Yesu.

⁶Iatonna rangii kumua masaki tu Lazarus, torromi duang allopa inde to dio.

⁷Undinnato Nakuami ungkuanni tu anak gurunNa: Maimokomi tasule lako tana Yudea.

⁸Nakuami tu anak gurunNa lako: O Rabi, mane mangka bang tu to Yahudi la morai untumbuiKomi batu, na totemo la suleomoKomi lako?

⁹Nakuami Yesu mebali: Tang sangpulo duaraka diang lan sangallona? Iake lumingka alloi tu tau, tae’ natitodo, belanna untiro maserona te lino.

¹⁰Apa iake denni tau lumingka bongi, titodo, belanna tae’ maserona lan kalena.

¹¹Susimoto tu kadanNa; namangka to Nakuami ungkuanni tinde tau: Mamma’mo tu sangmaneta Lazarus, apa la laoNa’ untundanni.

¹²Nakuami anak gurunNa lako: O Puang, iake mamma’ bangsiari, tang la bangunorika ia.

¹³Iatu Napokada Yesu diona ia kamateanna, apa nasanga tinde tau kumua diona kalupianna mamma’ tu Napokada.

¹⁴Ma’kadami tu Yesu umpokadan pissanni Nakua: Matemo tu Lazarus.

¹⁵Sia parannuNa’ belanna kamu, tu tae’ Kudio, kumua ammi ma’patongan; apa maimokomi talao lako.

¹⁶Nakuami tu Tomas, disanga duka Didimus lako padanna anak guru: Maikomi duka talao, da’ito tapada mate.

¹⁷Iatonna rampo tu Yesu, Nakarampoimi patang allomo lanna liang.

¹⁸Iatu Betania sikandappi’ Yerusalem, agi-agi tallu kilo mambelanna dio mai.

¹⁹Budamo tu to Yahudi sae lako Marta sola Maria umpakatanai tu diona siulu’na.

²⁰Iatonna rangii Marta karebanna kumua sae tu Yesu, laomi natammui; apa iatu Maria torro bang ia unno’ko’ dio banua.

²¹Nakuami Marta lako Yesu: O Puang, iakemMi inde, tae’ namate tu siulu’ku.

²²Apa moi totemo kuissan kumua, mintu’na tu Mipalaku langngan Puang Matua, NabenKomi Puang Matua.

²³Nakuami Yesu ungkuanni: La malimbangun ia sule tu siulu’mu.

²⁴Nakuami Marta lako: Kuissan sia, kumua la malimbangun ke allo kamalimbangunan, ke katappurannai lino.

²⁵Nakuami Yesu lako: Akumote tu kamalimbangunan sia katuoan; minda-minda tu umpatonganNa’, moi anna mate, la tuo;

²⁶sia minda-minda tu tuo sia umpatonganNa’, tae’ nala mate tontong sae lakona. Mupatonganraka te?

²⁷Nakuami Marta mebali lako: O Puang, aku te kupatongan kumua Kamumo tu Mesias, AnakNa Puang Matua, tu sipatu sae tama te lino.

²⁸Iatonna mangkamo ma’kada susito, laomi natambai kamama’ tu Maria, siulu’na, nakua: Saemo tu Guru sia Natambaiko.

²⁹Iatonna rangimi tu iannato, tikara-karami ke’de’ nalao lako Yesu.

³⁰Apa tae’pa nalao tama tondok tu Yesu, sangadinna dio bangsia tu Naninna sitammu Marta.

³¹Iatu mai to Yahudi tu nasolan Maria unno’ko’ lan banua sia umpakatanai, tonna tiroi tu Maria tikara-kara ke’de’ nasun, sangundiammi urrundu’i, belanna nasanga kumua la lao lako to’ liang umbating dio.

³²Iatonna sae Maria lako tu Naninna Yesu, natiroI, tukkumi malinguntu’ diong to’ lette’Na sia nakua lako: O Puang, iakemMi inde, tae’ namate tu siulu’ku.

³³Iatonna tiroi Yesu tu Maria tumangi’, sia iatu mai to Yahudi nasolan sae tumangi’ duka, tu’dangmi ara’Na sia lendu’ mamassengNa untiroi,

³⁴sia nakua: Umbara mipannii? Nakuami tu tau lako: O Puang, maimoKomi untiroi.

³⁵Tumangi’mi tu Yesu.

³⁶Nakuami tu to Yahudi: Tiromi tumba ia Napakaboro’na!

³⁷Apa denno pira tu kumua: To buta Napamillikmo matanna, nala tae’oraka Nala kuasa umpogau’i da’ namate te tau iate?

³⁸Tu’dang pole’omi ara’Na tu Yesu tonna sae lako to’ liang. Iatu liang iato lo’ko’, nabatu tu dipalaparanni.

³⁹Nakuami Yesu: Berui te batu. Nakuami Marta siulu’na tinde to mate: O Puang, bosimo, belanna patang allomo.

⁴⁰Nakuami Yesu ungkuanni: Tang mangkamoraka Kukua mati’, iake ma’patonganko la untiroko kamala’biranNa Puang Matua?

⁴¹Naberumi tau tu batu. Mentingarami tu Yesu anNa ma’kada Nakua. O Ambe’, ma’kurre sumanga’Na’ mati’, belanna MiperangiiNa’.

⁴²Inang Kuissanmo kumua tontongKomi umperangiiNa’, apa belanna iari te to buda bendan untalimbungNa’, angKu pokadai te, anna patonganni kumua Kamu ussuaNa’.

⁴³Iatonna mangka umpokadai to, metambami Nakua: E Lazarus, sunko mai!

⁴⁴Sunmi tinde to mate, manda’ bangsia bimbinna tu limanna sia lentekna, sia iatu lindona nabungku’ passapu. Nakuami Yesu ungkuanni tu tau: Bukai, da’ito namale.

⁴⁵Budami tu to Yahudi sae unno’ko’ sola Maria, umpatongan Yesu tonna kitai tu penggauran Napogau’.

⁴⁶Apa den pira tu male lako to Farisi, napokadanni tu apa Napogau’ Yesu.

⁴⁷Iamoto anna rampunni pangulu to minaa sia to Farisi tu mai to diala Ada’ lompo, anna kua: Umbamora tu tangnga’ la tapogau’, belanna buda bangmo tu tanda kalle-kallean Napogau’ tu Tau tu?

⁴⁸Iake la tapopa’elo’na bangi susi to, inang la mintu’ tau umpatonganNi, anna sae tu to Roma unnii tu inanta sia umpa’dei tu katongananta lako bangsata.

⁴⁹Denmi misa’ tinde tau, iamotu disanganna Kayafas, tu Tominaa Kapua tonna taun iato, ma’kada lako tinde tau kumua: Tae’ bang kamu apa miissan,

⁵⁰tae’ duka bang misuka’i kumua den gai’na lako kalemi, ke denni tau misa’ mate ussonda pa’tondokan, ke da duka namintu’ bangsa la sanggang.

⁵¹Apa iari napokadai to, tae’ kumua tuo lu dioi mai kalena, sangadinna belannari ia Tominaa Kapua to taun iato, anna ma’nubua’ kumua Yesu tu la mate ussondai tu bangsa iato.

⁵²Sia tae’ kumua la ussonda mannai bangsa iato, sangadinna kumua anNa pasirampunni tu mai mintu’ anakNa Puang Matua tu sisarak-sarak bangmo anNa pamisa’i kombongan.

⁵³Randukmi to allo iato nasituru’i la umpatei Yesu.

⁵⁴Iamoto anna tae’ Napa’pepayanan Kalena tu Yesu loo sola to Yahudi, sangadinna umpasere Kalena inde to dio mai lako padang sikandappi’ padang pangallaran, lako misa’ tondok disanga Efraim, indemo to Nanii torro sola anak gurunNa.

⁵⁵Tonna iato mandappi’mo tu allo pa’gauran Pasana to Yahudi, sia buda tu to inde to dio mai umpadoloi male lako Yerusalem ke tae’pi nalambi’i tu pa’gauran Pasa, kumua nalao umpemaseroi kalena.

⁵⁶Nadaka’mi tu Yesu sia sipa’kada-kada nake’de’ lan Banua Kabusungan nakua: Umbara misanga? Tae’raka nala sae umpellindoi te pa’gauran iate?

⁵⁷Apa iatu mai pangulu to minaa sia to Farisi mangkamo umpasun parenta kumua, iake denni tau unnissanni tu nanii torro Yesu, napa’peissananni, kumua anna ma’din untingkanNi.