Read Toraja-Sa'dan YOHANES 12 Bible Online

YOHANES 12 - Toraja-Sa'dan bible

YOHANES 12

¹Annanpa allona namane pa’gauran Pasa, saemi tu Yesu lako Betania nanii Lazarus, tu Napamalimbangun Yesu dio mai to’ to mate.

²Natoratumi dio tu Yesu, na Marta ma’parakai; iatu Lazarus iamo misa’ Nasolan Yesu unno’ko’ kumande.

³Naalami Maria sangkatti tu minna’ pandere’ narawastu massang, masuli’ allinna, nabolloi tu lentekna Yesu, napa’dii beluakna. Tipamaen-maenmi tu baunna lan banua.

⁴Apa nakua tu anak gurunNa misa’, tu Yudas Iskariot, tu umpa’peturoanNi undinna:

⁵Ma’apari anna tang dibalukanra limangpulo nna’pa’ ringgi’ tu pandere’, nadipa’kamasean lako to mase-mase?

⁶Ia sia nama’kada susito, tae’ kumua diona to mase-mase natiroan, sangadinna belanna to bokoan, sia ia untoei tu inan doi’, naala bangi tu mai doi’ dipatama.

⁷Nakuami Yesu: Popa’elo’nai ia, nanannanNa’ tu pandere’ sae lako allo kadipeliangangKu.

⁸Belanna iatu to mase-mase tontong siakomi sisola, apa iate Aku te tae’ Kutontong misisolan.

⁹Budami to Yahudi unnissanni kumua inde to dio tu Yesu; saemi, tae’ kumua Yesu manna natungkanan, sangadinna la untiro dukai tu Lazarus, tu mangka Napamalimbangun dio mai to’ to mate.

¹⁰Nasituru’imi pangulu to minaa, la umpatei dukai tu Lazarus,

¹¹tu belanna iamora anna buda tu to Yahudi male, naumpatongan Yesu.

¹²Iatonna masiang to tonna rangii to buda tu sae umpakarua’ pa’gauran kumua sae dio Yerusalem tu Yesu,

¹³pada unnalami palapa koroma nalao untammui sia unnarrak-arrak nakua: Hosana, kurre sumanga’Na tu saeNa umpotete sanganNa Puang. Iamotu datunna to Israel!

¹⁴Iatu Yesu tonna lambi’i tu keledai mangura misa’, Nasakeimi, susitu mangka disura’, kumua:

¹⁵Da mumataku’, e anak dara Sion. Tiromi tu Datummu sae ussakei misa’ anak keledai!

¹⁶Dolona tae’ naissanni anak gurunNa tu iannato; apa iatonna dipakala’bi’ tu Yesu, maneri ta’ka’ lan penaanna kumua iatu ianna to mangkamo disura’ tu diona Ia, sia mangkamo napogau’ lako Kalena.

¹⁷Nakatottongimi to buda, tu nasisolanna Yesu, tonna tambai tu Lazarus lan mai liang sia Napamalimbangun dio mai to’ to mate.

¹⁸Iamoto anna lao tu to buda untammui, belanna narangi kumua Napadenmo Yesu tu tanda kalle-kallean iato.

¹⁹Nakuami tu pada to Farisi sipa’- kada-kada: Mikitamo kumua tae’ bang bua’na tu tangnga’mi; tiromi mintu’na issinna lino sangundiammo urrundu’I.

²⁰Denmi ba’tu pira-pira to Yunani lan tu mintu’nato sae menomba tonna pa’gauran iato.

²¹Saemi lako Filipus to Betsaida dio tana Galilea tu tau iato mai, anna palakui nakua: O tuang, la moraikan untiro Yesu.

²²Saemi napokada Filipus tu iannato lako Andreas, nasae tu Andreas sola Filipus umpokadai lako Yesu.

²³Mebalimi Yesu sia Nakua ungkuanni tinde mai tau: Nalambi’mo attunna tu Anak rampan dilino la dipakala’bi’.

²⁴Tonganna tongan Kukua mati’: Iatu gandung sanglise’ ke tae’i natobang rokko padang namate, tontong bang sanglise’; apa iake matei, memba’ka’ tu buanna.

²⁵Minda-minda untiroan katuoanna, iamo la kapa’dean katuoanna, sia minda-minda ussa’biangan katuoanna lan te lino, iamo ungkaritutui landa’ tama katuoan sae lakona.

²⁶Iake den tau mengkaola lako Kaleku, la undi urrundu’Na’, sia iatu inan Kunii, inde dukamoto la nanii tu taungKu. Iake den tau mengkaola lako Kaleku, iamo Napamala’bi’ Ambe’.

²⁷Totemo te lendu’ rossona tu penaangKu; apara la Kupokada? la Kukuaraka: O Ambe’, karimmanniNa’ dio mai te attu iate! Tae’, apa iari to angKu lambi’i te attu iate.

²⁸O Ambe’, pakala’bi’i tu sangamMi! Denmi tu gamara dao mai langi’ ma’kada nakua: Kupakala’bi’mo sia la Kupakala’bi’ pole’pa.

²⁹Nakuami tu to buda, tu ke’de’ inde to dio sia urrangii tu gamara iato: Guntu’ ia to; den pole’o tu kumua: Den malaeka’ umpa’kadaI.

³⁰Mebalimi tu Yesu Nakua: Tangia belanna Aku anna den tu gamara iato, sangadinna belanna kamu.

³¹Totemo rampomo tu kapangra’tasan lako te lino; totemo la dialai lako salian tu pangulunna lino.

³²IangKu dipakendekmo diong mai te lino, la Kupatilao nasang tu penaanna tau, anna sae lako Kaleku.

³³Ia sia Napokadai te, la Nanii umpasomboi tumba tu kamateanNa.

³⁴Nakuami mebali tu to buda lako: Kirangimo lan mai sura’ Sukaran aluk, kumua iatu Mesias tuo sae lakona, ma’apai amMi ma’kada kumua tae’ nasalai tang dipakendek tu Anak rampan dilino. Mindara pale’ tu Anak rampan dilino?

³⁵Nakuami Yesu ungkuanni tinde mai tau: Sattu’mora tu arrang la misisolan; malemokomi su’ding denpi tu arrang misisolan da ammi kalillinan. Minda-minda tu lumingka lan kamalillinan, tae’ naissanni tu naolainna.

³⁶Su’ding denpi tu arrang misisolan, patonganni tu arrang iato, ammi dadi anak arrang. Susimoto tu Napokada Yesu, namane male membuni umpasere Kalena dio mai tau iato mai.

³⁷Moi anna buda tongan tanda kalle-kallean Napogau’ Yesu dio tingayona tinde mai tau, apa tae’ duka napatonganNi,

³⁸kumua anna sundun tu kadanna nabi Yesaya tu napokada kumua: O Puang mindamora umpatonganni tu kareba kipa’peissanan? sia mindamora dinii umpapayanni tu limanNa Puang?

³⁹Iamoto natae’ nabelai tu tau ma’patongan, belanna nakua pole’o tu kadanna nabi Yesaya:

⁴⁰Napabuta Puang Matua tu matanna tau iato mai sia Napamakarra’ tu penaanna, kumua da anna pakita tu matanna sia mangingaran tu penaanna namengkatoba’, angKu pamalekei.

⁴¹Iamote tu napokada nabi Yesaya, belanna natiromo tu kamala’biranNa anna pokadai tu a’ganNa.

⁴²Moi anna susito, buda tu mai pangulu umpatonganNi, apa belanna to Farisi, tae’mi namangaku, kumua da naditassu’i lan mai banua pa’kombongan.

⁴³Belanna nabudanan iatu napakala’bi’ tolino na iatu Napamala’bi’ Puang Matua.

⁴⁴Napemanduimi Yesu ma’kada Nakua: Minda-minda tu umpatonganNa’, tae’ kumua Aku napatongan, sangadinna iatu To ussuaNa’;

⁴⁵sia minda-minda tu ungkitaNa’, iamo ungkitai tu To ussuaNa’.

⁴⁶Aku te saeNa’ tama lino butung misa’ arrang, kumua anna minda-minda umpatonganNa’ tae’ natorro lan malillinna.

⁴⁷Sia iake denni tau umperangii tu KadangKu, apa tae’ nakaritutui, tae’ na Aku urra’ta’i tu diona to, belanna tae’ Kusae urra’ta’i tu diona issinna te lino, sangadinna la ungkarimmanni.

⁴⁸Minda-minda tu untumpuNa’ sia tang untarima kadangKu, den sia Misa’ dio la urra’ta’i: iatu kada Kupokada, iamo la umpasalai ke allo katappurannai lino.

⁴⁹Belanna tangia kumua lalan inaangKu kalena angKu ma’kada-kada, sangadinna Ambe’ ussuaNa’, mangkaMo’ Napokadan pepasan tu sipatunna la Kupokada sia Kupa’pangadaran.

⁵⁰Sia Kuissan kumua iatu pepasanNa iamo katuoan tontong sae lakona. Iamoto iatu Kupokadanna, susi bangsiamo tu Napokadanna Ambe’ lako kaleku, ten dukamoto tu Kupokada.