Read Toraja-Sa'dan YOHANES 13 Bible Online

YOHANES 13 - Toraja-Sa'dan bible

YOHANES 13

¹Tae’ bangsia nalambi’i tu pa’gauran Pasa, tonna issanmi Yesu, kumua nalambi’mo attunNa la lumele lan mai te lino lako Ambe’, Napasundunmo sae lako ma’katampakanna tu kamamaseanNa lako mintu’ taunNa lan te lino, tu Nakamaseinna.

²Iatonna katumimburan bongi, tonna mangka deata bulituk umpatudui lan penaanna tu Yudas Iskariot, anakna Simon, la umpa’peturoan Yesu,

³moi anNa issanni Yesu, kumua mangka nasangmo Nasorong Ambe’ tu mintu’ angge maritik lako Kalena, sia Ia lu dio mai Puang Matua sia sule lako Puang Matua,

⁴tonna la kumandemo ke’de’mi, Naalai tu bayu lamba’Na, Naalai tu sampin Napotambeke’i.

⁵Namangka to Natua’mi tu uai rokko loyang, Naparandukki umbasei tu lentekna anak gurunNa, Napa’dii sampin Napotambeke’.

⁶Namane sae lako Simon Petrus. Nakuami tu Petrus lako: O Puang, ma’apai anna Kamu la umbasei lentekku?

⁷Mebalimi Yesu sia Nakua ungkuanni: Iatu Kupogau’na tae’ muissanni totemo, apa undinnapi mumane unnissanni.

⁸Nakuami Petrus lako: Da’ maro’ anna Kamu umbasei tu lentekku. Nakuami Yesu mebali lako: Iake tae’i Kubaseiko, tae’ Kusisolangko keba’gi.

⁹Nakuami Simon Petrus lako: O Puang, da’ora na ia manna tu lentekku, sangadinna ia duka tu limangku sia ulungku.

¹⁰Nakuami Yesu lako: Minda-minda tu mangkamo mendio’, tae’mo namanggi’ dibasei, ia mannamo tu lentekna, belanna inang maseromo; kamu te maseromo apa tae’ mimintu’.

¹¹Belanna inang Naissanmo tu to la umpa’peturoanNi; iamoto anNa kua: Tae’ ammi mintu’ masero.

¹²Iatonna mangkamo umbasei tu lentekna anak gurunNa sia umpelluang bayu lamba’Na, unno’ko’mi sule sia Nakua ungkuanni: Mitandairaka te Kupogau’ lako kalemi?

¹³Kamu te misa’bu’ GuruNa’ sia Puang, natonganna tu kadammi, belanna Aku tonganmo.

¹⁴Iake Aku Puang sia Guru mangka umbasei lentekmi, sipatu dukakomi la sibasean lentekmi.

¹⁵Belanna mangkamokomi Kuben passangkaran, kumua mipogau’ dukai susitu Kupogau’na lako kalemi.

¹⁶Tonganna tongan Kukua mati’: misa’ kaunan tae’ namadoan anna Puangna sia misa’ to disua tae’ namadaoan anna iatu to ussuai.

¹⁷Iake mitandai tu mintu’nate, maupa’komi, ke mipogau’i.

¹⁸Ia sia Kuma’kada tangia diona kamu sola nasang, belanna Aku te Kutandai minda tu Kupilei. Apa dikuari anna sundun tu lanna Sura’ Madatu, tu Nakua: Iatu to Kusolan kumande, untitti kambutu’na unneaNa’.

¹⁹Totemote Kupokadammokomi tu iannato su’ding tae’pi nadadi, ammi patonganni ke dadii, kumua Aku tonganmo.

²⁰Tonganna tongan Kukua mati’: Minda-minda tu untammui to Kusua, iamo untammuiNa’; sia minda-minda untammuiNa’, iamo untammui tu To ussuaNa’.

²¹IatonNa ma’kada susito tu Yesu, lendu’mi tu’pena penaanNa, anNa katottongi Nakua: Tonganna tongan Kukua mati’, kumua denkomi misa’ tu la umpa’peturoanNa’.

²²Sisaile lenmi sola nasangi tu anak gurunNa, tae’ nakapang lenni mindanna tu Nasanga.

²³Denmi misa’ tu anak gurunNa iamo Napakaboro’na, sissare lako barangkangNa.

²⁴Nako’bi’mi Simon Petrus nakua ungkuanni: Pokadangkan tu Nasanganna.

²⁵Ta’pa umpati’pingmi kalena lako barangkangNa Yesu, nama’kada nakua: O Puang, mindara ia?

²⁶Nakuami Yesu mebali: Na tu to Kuotonan sangsuakan, Kutadoanni. Naotonmi sangsuakan, Naalai Natadoanni Yudas, anakna Simon Iskariot.

²⁷Iatonna mangkamo Yudas untarimai tu sangsuakan, tamami deata bulituk lan penaanna. Nakuami Yesu ungkuanni: Iatu mupogau’na, pogau’mi madomi’.

²⁸Apa tae’ bangi misa’i tinde tau sola nasang tu Nasolan unno’ko’ kumande untandai apa patunna Nama’kada lako susito.

²⁹Apa den tu ussangai kumua, belanna ia untoe doi’ tu Yudas, butung-butungmi to la Nakua ma’kada lako tu Yesu: Alliammiki’ tu apa la tapasakka’na lan pa’gauran, ba’tu kumuaraka la naben ba’tu apa-apa lako tu to mase-mase.

³⁰Iatonna mangka Yudas ungkarangii tu sangsuakan, ta’pa sunmi; tonna iato la bongimo.

³¹Iatonna sunmo tu Yudas, Nakuami Yesu: Totemote dipakala’bi’mo tu Anak rampan dilino, sia Puang Matua dipakala’bi’ dukamo lan AnakNa.

³²Iake dipakala’bi’i tu Puang Matua lan AnakNa, la Napakala’bi’ duka Puang Matua lan Kalena, ontongpi ta’pa Napakala’bi’.

³³E anakKu, sattu’mora la Kunii ussisolangkomi, ammi daka’Na’, sia susitu mangkanna Kupokada lako to Yahudi kumua: Iatu Kuninna male, tae’ mibelai ullambi’i, susi dukamoto Kupokada lako kalemi totemo.

³⁴Misa’ parenta ba’ru Kubenkomi, iamotu: la sipakaboro’komi susi Aku umpakaboro’komi, dikua ammi sipakaboro’ duka.

³⁵Iamotu iannate la nanii untandai mintu’ tau, kumua anak gurungKukomi, to ke siala masekomi.

³⁶Nakuami Simon Petrus lako: O Puang, umbara la Minii lao? Nakuami Yesu mebali lako: Iatu la Kuninna lao, tae’ mubelai la undi urrundu’Na’ totemo; apa undinna la undiko urrundu’Na’.

³⁷Nakuami Petrus lako: O Puang, ma’apari angku tang la umbelai undi urrundu’Komi totemo? La ussorongna’ penaangku belanna Puang.

³⁸Nakuami Yesu mebali: Morairokoka ussorong penaammu belanna Aku? Tonganna tongan Kukua mati’: tae’pa naunnoni manuk, mupeonganniMo’ pentallun.