Read Toraja-Sa'dan YOHANES 16 Bible Online

YOHANES 16 - Toraja-Sa'dan bible

YOHANES 16

¹Mintu’ te ianna te Kupokada lako kalemi, kumua da napotipipa’i penaammi.

²La natassu’ikomi lan mai banua pa’kombongan. Ontongpi la sae tu attunna, to kumua minda-minda tu umpateikomi la nasanga napopenomba langngan Puang Matua.

³Mintu’ tu iannato napogau’, belanna tae’ natandai tu Ambe’ sia Aku.

⁴Apa mintu’na te kupokada lako kalemi, dikua ianna lambi’i attunna ma’dinmo mikilalai, kumua mangkamo Kupokada lako kalemi susito. Mintu’nate iannate tae’pa Kupokadai lako kalemi tempon dio mai mulanna, belanna denPa’ misisolan.

⁵Apa totemo la maleMo’ lako To ussuaNa’, natae’ bangkomi misa’ tu mekutana lako Kaleku kumua: Umbara la Miola?

⁶Iamira tu Kupokadamo lako kalemi tu mintu’nato, anna ponnomo lan penaammi tu kamasussan.

⁷Apa iate Aku te tonganna tu Kupokadangkomi kumua: Den gai’na lako kalemi, ke maleNa’; belanna iake tae’i Kumale, tae’ nasae lako kalemi tu Panglalan; apa iake maleNa’ la Kusua sae lako kalemi.

⁸IanNa sae Iamo la umpamanassai lako issinna te lino tu diona kasalan sia kamaloloan sia ukungan;

⁹iatu diona kasalan, belanna tae’ napatonganNa’ tau;

¹⁰diona kamaloloan, belanna maleNa’ lako Ambe’ natae’mo mikitaNa’;

¹¹diona ukungan, belanna ra’ta’mo la diukung tu pangulunna te lino.

¹²Budapa tu la Kupokada lako kalemi, apa tang la mikullepa te totemo te.

¹³Apa ianNa sae Ia, Iamotu Penaa Kamanapparan la Nalalankomi lako mintu’na kamanapparan belanna tae’ Nama’inaanna kalena ma’kada-kada, sangadinna iatu Naranginna ia dukamo Napokada; sia Napa’peissanan lako kalemi tu mintu’na apa la dadi.

¹⁴Ia la umpakala’bi’Na’, belanna la Naala dio mai apangKu, anNa pa’peissananni lako kalemi.

¹⁵Mintu’na tu apanna Ambe’, ia dukamo apangKu; iamoto angKu kua: Naala dio mai apangKu, anNa pa’peissananni lako kalemi.

¹⁶Sattu’mora anna tae’mo mikitaNa’, sia tae’ dukamora nasangapa mikitaMo’.

¹⁷Sipa’kada-kada misami ba’tu pira-pira tu anak gurunNa nakua: Apara battuananna tu Napokadannaki’ kumua: Sattu’mora anna tae’mo mikitaNa’, sia tae’ dukamora nasangapa mikitaMo’? sia iatu kumua: La maleNa’ lako Ambe’?

¹⁸Ma’kadami nakua: Apara ia battuananna tu Napokada kumua: Sattu’mora? Tae’ kita taissanni tu Napokadanna.

¹⁹Naissanmi Yesu kumua la morai mekutana lako, Nakuami, ungkuanni: Misitimbang-timbangi misaraka tu iannato, tu Kukua: Sattu’mora anna tae’mo mikitaNa’, sia tae’ dukamora nasangapa mikitaMo’?

²⁰Tonganna tongan Kukua mati’, kumua la tumangi’komi sia umbating, apa iatu issinna te lino parannu; iate kamu te la masussakomi, apa iatu kamasussammi la membali kaparannuan.

²¹Iato ke mangurea’i tu baine, masussa nasa’ding, belanna nalambi’mo attunna; apa ianna dadiammi tu pia, tae’mo nakilalai tu kamaparissan iato, belanna kaparannuanna, apa denmo tau misa’ dadi tama lino.

²²Susi kamu inang masussa misa’ding totemo te; apa la Kusitiroan pole’komi, anna parannu penaammi, na moi misa’ tau tae’ umbelai unnalai dio mai kalemi tu kaparannuammi.

²³Sia iake allo iato moi misa’ tae’mo mipekutanan lenni lako Kaleku. Tonganna tongan Kukua mati’, iake umpalakukomi ba’tu apa-apa lako Ambe’, la Napa’kamasean lako kalemi tete dio sangangKu.

²⁴Sae lako te totemo tae’ bangpa mipalaku apa tete dio sangangKu. Palakumi, ammi appa’i, nasundun tu kaparannuammi.

²⁵Mintu’na tu iannato Kupokadamo lako kalemi Kualan pa’pasusian; apa la sae tu attunna tu tang la Kuninnamo unnala pa’pasusian ma’kada lako kalemi, sangadinna la Kupamanassa pissan bangmo Kupa’peissanan lako Kalemi tu diona Ambe’.

²⁶Allo iamoto ammi la umpalakui tete dio sangangKu, sia tae’ Kuma’kada lako kalemi kumua Aku la umpalakuangkomi lako Ambe’,

²⁷apa Ambe’ kalena umpakaboro’komi, tu belanna kamu te mikamaseiNa’, sia belanna mipatonganmo kumua Aku te lu dioNa’ mai Puang Matua.

²⁸Lu dioMo’ mai Ambe’, angKu sae tama te lino; undinna la Kutampeo sule te lino angKu male lako Ambe’.

²⁹Nakuami anak gurunNa lako: Tiromi, totemo te Mipamanassa pissan bangmo tu kadamMi, tae’mo Miala pa’pasusian ma’kada.

³⁰Totemo kiissan kumua mintu’ apa Mitandai sia tae’mo namanggi’ tau mekutana lako Kalemi; Iamoto angki patonganni kumua lu dioKomi mai Puang Matua.

³¹Nakuami Yesu mebali lako: Ma’patonganmorokomika totemo?

³²Tiromi, attunnamo, ontongpi nalambi’mo attunna, kumua la dipasisarak-sarak simisa’komi lako to’ inanmi ammi sitampeiNa’ misa-misa; apa tae’ angKu misa-misa, belanna NarondongNa’ Ambe’.

³³Mintu’nate kupokada lako kalemi, kumua misiria kamarampasan ussisolanNa’. Lan te lino umperasaikomi kamaparrisan; apa pabatta’komi penaammi, belanna Aku te mangkaMo’ untaloi te lino.