Read Toraja-Sa'dan YOHANES 17 Bible Online

YOHANES 17 - Toraja-Sa'dan bible

YOHANES 17

¹Susimoto tu kadanNa Yesu, Namentingara langngan langi’ anNa ma’kada, Nakua: O Ambe’, nalambi’mo attunna, pakala’bi’mi tu AnakMi, anNa pakala’bi’komi AnakMi.

²Susitu Kamu mangkamo umpa’kamasean kuasa lako Kalena umparentai tu mintu’ tolino, kumua na Ia pole’o umpapantanni katuoan tontong sae lakona tu Misorongna lako Kalena.

³Inde sia tu katuoan tontong sae lakona, ke natandaiKomi, o Puang tu misari sia tongan, sia iatu Yesu Kristus tu mangka Misua.

⁴MangkamoKomi Kupakala’bi’ lan lino angKu pasundunni tu pengkarangan Misorong lako Kaleku la Kupogau’.

⁵Na totemo o Ambe’, pakala’bi’Mo’ dio oloMi susitu kamala’biran inang diomo kaleKu MisiayokanNa’ tonna tae’pa naden te lino.

⁶Kusomboammo tu sangamMi lako tu to mangka Misorong lako Kaleku lan mai te lino; tau iato taumMi, amMi sorongi lako Kaleku, sia nakaritutuimo tu kadamMi.

⁷Totemo nakanassamo, kumua mintu’na tu mangka Mipa’kamasean lako Kaleku, lu dio nasang mai Kalemi.

⁸Belanna mintu’na tu kada Mipokada lako Kaleku, iamo Kuparampo lako tu tau sia natarimamo, sia naaku tonganmo kumua lu dioNa’ mai Kalemi, sia napatongan kumua Kamumo tu ussuaNa’.

⁹Kupassambayangan tu tau iato, tangia mintu’ issinna lino Kupassambayangan, sangadinna mintu’ tu to Misorong lako Kaleku, belanna tau iato taumMi.

¹⁰Mintu’ apangKu iamo apamMi, sia iatu apamMi ia dukamo apangKu, sia dipakala’bi’Na’ diona tau iato.

¹¹Tae’mo Kulan lino, apa tau iato lan lino, na Aku te saeNa’ lako Kalemi, o Ambe’ masero, karimmanni tu tau iato umpoparinding sangamMi, tu mangka Mipa’kamasean lako Kaleku, kumua anna mendadi misa’ susi Kita.

¹²IatongKu sisolapa, Kukarimmanni umpoparinding sangamMi, tu mangka Mipa’kamasean lako Kaleku, sia mangkamo Kurinding pala’, na moi misa’i tae’ sanggang sangadinna iatu anak taa kasanggangan, dikua anna sundun tu lanna Sura’ Madatu.

¹³Apa totemo saeNa’ lako Kalemi; Kupokadamo tu iannate tongKu lanpa lino, dikua anna sundun tu kaparannuangKu napoparannu lan penaanna.

¹⁴Kuparampomo tu kadamMi lako; anna kabiri’i issinna lino, belanna tae’ naalai bilangan lan te lino, susi Aku tae’ naalaNa’ bilangan lan te lino.

¹⁵Tae’ra Kupalakui kumua Mialai lan mai te lino, sangadinna kumua Mirinding pala’i dio mai deata bulituk.

¹⁶Tae’ ia naalai bilangan lan te lino, susi Aku tae’ naalaNa’ bilangan lan te lino.

¹⁷Pamaindanni umpoparinding kamanapparan; Kadammi iamo kamanapparan.

¹⁸Susi Kamu ussuaNa’ tama te lino, susi dukamoto tu Aku ussuai tama lino.

¹⁹Sia belanna iari angKu pamaindan Kaleku, kumua anna dipamaindan duka umpoparinding kamanapparan.

²⁰Tangia kumua ia manna tu Kupassambayangan, sangadinna mintu’na duka tu to umpatonganNa’ belanna pangadaranna;

²¹kumua anna mendadi misa’ sola nasangi, susi Kamu lan Kaleku, o Ambe’, sia Aku lan Kalemi, anna mendadi misa’ duka lan Kaleta, anna patonganni issinna te lino, kumua Kamu ussuaNa’.

²²Sia Kusorongmo lako kalena tu kamala’biran mangka Mipa’kamasean lako Kaleku: kumua anna mendadi misa’ duka, susi Kita misa’ri.

²³LanNa’ kalena sia Kamu lan Kaleku, kumua anna sundun kasiturusanna; anna issanni issinna te lino kumua kamumo tu ussuaNa’, sia umpakaboro’i tu tau iato susi Aku Mipakaboro’.

²⁴O Ambe’, Kuporai ke sisolaNa’ tu to mangka Misorong lako Kaleku umba-umba Kunii, anna kitai tu kamala’birangKu tu mangka Mipa’kamasean lako Kaleku, belanna Mipakaboro’Na’ tempon dio mai tonna tang dikombongpa te lino.

²⁵O Ambe’ malolo, moi anna tae’ natandaiKomi issinna te lino, apa Aku KutandaiKomi, sia naissanmo te tau iate kumua Kamu tu ussuaNa’.

²⁶Sia mangkamo Kupa’petandan tu sangamMi lako sia la Kupa’petandampa, anna lan kalena tu pa’kaboro’ susi pa’kaboro’Mi lako Kaleku, sia angKu lan duka kalena.