Read Toraja-Sa'dan YOHANES 18 Bible Online

YOHANES 18 - Toraja-Sa'dan bible

YOHANES 18

¹Iatonna mangka Yesu ma’kada susito, sunmi Namale sola anak gurunNa lian nabala salu’-salu’ disanga Kidron; inde to dio den misa’ pa’lak; malemi tu Yesu sola anak gurunNa tama.

²Iatu Yudas, tu umpa’peturoanNi, natandai duka tu inan iato, belanna pembudamo tu Yesu sirampun sola anak gurunNa inde to.

³Nasolammi Yudas tu surodadu sangtuntunan sia pa’ronda’na pangulu tominaa sia to Farisi, nasae lako sibaa lantera sia bia’ sia pa’buno.

⁴Belanna Naissan Yesu tu mintu’ apa la dadi lako Kalena, sunmi sia Nakua lako tau iato mai: Mindara mindaka’?

⁵Nakuami tu tau mebali lako: Yesu to Nazaret. Nakuami lako tau iato mai: Akumote. Iatu Yudas, tu umpa’peturoanNi ke’de’ dio sola tu tau.

⁶Iatonna kua tu Yesu: Akumote, sorong boko’mi tu tau nasongka rokko padang.

⁷Mekutana pole’omi lako tau iato mai, Nakua: Mindara midaka’? Nakuami tu tau: Yesu to Nazaret.

⁸Nakuami Yesu mebali: Mangkamokomi Kupokadan kumua Akumote; iamoto, iake Aku midaka’, da’ito namalemo te tau.

⁹Iatu iannato kumua anna sundun tu kada Napokada Nakua: Iatu mintu’ to Misorong lako Kaleku, moi misa’ tae’ Kupa’dean.

¹⁰Iatu Simon Petrus sitakin la’bo’, nanonokmi tu la’bo’, naba’tai tu kaunanna Tominaa Kapua, natantang tu talinga kananna. Iatu kaunan iato disanga Malkhus.

¹¹Nakuami Yesu ungkuanni tu Petrus: Pasibanuai tu la’bo’mu. Ma’apai angKu tang la unniru’i tu lanna irusan NatadoanNa’ Ambe’?

¹²Untingkanmi Yesu tinde surodadu sangtuntunan sia pangulu pa’barani sia pa’ronda’ to Yahudi, napungoI;

¹³nabaami dolo lako Hanas belanna iamo matusanna Kayafas, tu tominaa kapua tonna taun iato.

¹⁴Iamora tu Kayafas umpa’petimbanganni lako to Yahudi kumua, den gai’na ke matei misa’ tau ussonda pa’tondokan.

¹⁵Iatu Simon Petrus sola misa’ anak gurunNa senga’, undi urrundu’ Yesu. Iatu anak gurunNa iato natandai Tominaa Kapua, malemi sola Yesu tama sa’de banuanna Tominaa Kapua;

¹⁶apa iatu Petrus, ke’de’ dio salian, dio to’ babangan. Sunmi tinde anak gurunNa senga’ tu natandainna tominaa kapua nasipa’kada tu baine ungkampai babangan nasolanni tama tu Petrus.

¹⁷Nakuami tinde kaunan ungkampai babangan lako Petrus: Tang ikomoraka misa’ tu anak gurunNa tu Tau iatu? Nakuami mebali: Tae’ aku.

¹⁸Indeto dio bendan ba’tu pira-pira tu kaunan sia pa’ronda’ tu mangka umpadukku api, belanna attu kamadinginan namendarang; iatu Petrus ke’de’ duka dio sola namendarang.

¹⁹Nakutanaimi Tominaa Kapua tu Yesu diona anak gurunNa sia diona pangadaranNa.

²⁰Nakuami Yesu mebali lako: Aku te Kupopempayan bang tu kadangKu lako issinna lino; tontong bangNa’ mangada’i lan banua passambayangan sia lan Banua Kabusungan, tu naninna mintu’ to Yahudi sirampun, natae’ bang misa’ Kupokada buni.

²¹Ma’apai na Aku mikutanai? Kutanai tu to mangka urrangii tu Kupokadanna lako; manassa naissan tu Kupokadanna.

²²IatonNa mangka umpokadai te, denmi misa’ tu pa’ronda’ ke’de’ dio ussala’pai tu lindoNa sia nakua: Susimoraka pebalimMi lako tominaa kapua to?

²³Nakuami Yesu mebali lako: Iake salai tu kadangKu, pokadanNa’ tu salana; apa iake tonganni, ma’apai musala’paNa’?

²⁴Napesuammi Hanas lao umpopennolo situang pungoI lako Kayafas, tominaa kapua.

²⁵Iatu Simon Petrus diopa ke’de’ mendarang. Nakuami tau ungkuanni: Tang iko dukaraka tu misa’ anak gurunNa? Meonganmi nakua: Tae’ aku.

²⁶Nakuami misa’ tu kaunanna Tominaa Kapua, tu sisampunna tu to natantangi Petrus talinganna: Tang kukitarokoka sisola lan pa’lak?

²⁷Meonganomi tu Petrus; unnonimi tu manuk to attu iato.

²⁸Nabaami tau tu Yesu dio mai Kayafas lako banua pangra’tasan kara-kara, to melambi’ iato. Iatu to Yahudi tae’ nalao tama banua pangra’tasan kara-kara, kumua da nakasambanan, sangadinna la ma’din duka ungkande Pa’pasa.

²⁹Iamoto anna sun tu Pilatus lako sia nakua: Apara miparapasanni te tau iate?

³⁰Nakuami tinde mai tau mebali lako: Iake la tang to kadakei te tau iate, tae’ duka kila ussorongi lako kalemi.

³¹Nakuami Pilatus lako: Alami, ammi paolai pangra’ta’ susitu natuntunna atoran sukaran alukmi! Nakuami tu to Yahudi lako: Tae’ kami kikuasa la umpatei tau, moi misa’ duka.

³²Kumua anna sundun tu kadanNa Yesu, tu Napokada la umpa’peissananni tumba tu kamateanNa.

³³Iatonna malemo sule tu Pilatus tama banua pangra’tasan kara-kara, natambaimi tu Yesu anna mekutana lako nakua: Kamumoraka tu datu to Yahudi?

³⁴Nakuami Yesu mebali: Tuo lu dioraka mai kalemi te kadammi te, ba’tu to senga’raka umpokadangkomi tu diona Aku?

³⁵Nakuami Pilatus mebali: To Yahudira’ka te? BangsaMi Kamu sia mintu’ pangulu to minaa tu ussorongKomi lako kaleku. Apara tu Mipogau’?

³⁶Nakuami Yesu mebali: Iatu kadatuangKu tangia kadatuan lan lino; iake la kadatuan lan lino, inang la mangea mintu’ solaKu, da angKu disorong lako to Yahudi; apa totemo iatu kadatuangKu tangia kadatuan lan lino.

³⁷Nakuami Pilatus lako: Datu dukaroKomika pale’? Nakuami Yesu mebali: Tonganna susitu kadammi, kumua Aku te datuNa’. Iamo patunna to angKu dadimo, sia iamo patunna to angKu saemo tama te lino, kumua angKu katottongi tu kamanapparan. Minda-minda tu bu’tu lu dio mai kamanapparan iamo umperangii kadangKu.

³⁸Nakuami Pilatus lako: Apara tu kamanapparan iato? Iatonna ma’kada susito, sunomi nalao lako to Yahudi, nakuami lako: Tae’ kukabu’tui tu salaNa.

³⁹Apa iatu biasanna atorammi to ke allo Pasa kurampananangkomi tau misa’; miporairaka kurampananangkomi tu datu to Yahudi?

⁴⁰Rambanomi tu tau nakua: Da’ na Ia tu, iamo ia tu Barabas. Iatu Barabas to ma’pamarukka sia papatean.