Read Toraja-Sa'dan YOHANES 19 Bible Online

YOHANES 19 - Toraja-Sa'dan bible

YOHANES 19

¹Iatonna mangkato napesuammi Pilatus unnalai tu Yesu, sia umbambaI ulang.

²Naampinniranni surodadu sa’pi’ duri napasa’pi’i, napaluangi bayu lango-lango;

³saemi lako Kalena nakua: Tabe’ Datu to Yahudi! sia nasala’pa len tu lindoNa.

⁴Sun pole’omi tu Pilatus sia nakua lako tau iato mai: Tiromi, kubaamo sun lako kalemi, ammi issanni kumua moi misa’ tae’ kuappa’ tu salaNa.

⁵Sunmi tu Yesu ma’sa’pi’ duri sia ma’bayu lango-lango. Nakuami Pilatus lako tu tau sola nasangi: Tiromi te tau iate!

⁶Iatonna kitami mintu’ pangulu to minaa sia mintu’ solana, rambanmi metamba nakua: A’ta’I Ia tu, a’ta’I Ia tu! Nakuami Pilatus ungkuanni tu tau: Alami kamu, mia’ta’I! Belanna tae’ aku kukabu’tui tu salaNa.

⁷Nakuami tu to Yahudi mebali lako: Iatu kami den atoran sukaran alukki, na iake dituntunni tu atoran iato sipatu la dipatei belanna ussanga Kalena AnakNa Puang Matua.

⁸Iatonna rangii Pilatus tu kada iato, samandu-mandunnami mataku’;

⁹male pole’omi tama banua pangra’tasan kara-kara, sia nakua lako Yesu: To bu’tu umbaroKomi nii? Apa tae’ Napebalii Yesu lako.

¹⁰Nakuami Pilatus lako: ManokaroKomika ussipa’kadanna’? Tae’raka Miissanni kumua kuasana’ urrampanangKomi sia kuasa dukana’ unna’ta’Komi?

¹¹Nakuami Yesu mebali: Moi misa’ tae’ mibelai ungkuasaiNa’, ke tae’i nalu Dao mai; iamoto iatu to ussorongNa’ lako kalemi, iamo kapuanna kasalanna.

¹²Randuk tonna iato naundaka’ lalan tu Pilatus la urrampananNi, apa ramban tu to Yahudi metamba, nakua: Iake mirampananNi te Tau iate, tae’mo misisangmane datu kapua; minda-minda tu unnangka’ datu kalena, iamo unnea datu kapua.

¹³Iatonna rangii Pilatus te kada iate, nabaami lako salian tu Yesu, naunno’ko’ dao kadera biasa nanii unno’ko’ mangra’ta’ kara-kara, tu inan disanga Sali batu, ke basa Ibrani disanga Gabata.

¹⁴Iato allo iato allo dinii umpasakka’ Pa’pasa, agi-agi te’te’ sangpulo dua tangnga allo. Nakuami Pilatus lako to Yahudi: Tiromi tu datummi!

¹⁵Apa ramban tu tau metamba nakua: Tombonni lao, tombonni lao! a’ta’I Ia tu! Nakuami Pilatus ungkuanni: Sipaturaka la kua’ta’ tu datummi? Nakuami mintu’ pangulu to minaa mebali: Tae’ kami datungki senga’na, ia manna tu datu kapua.

¹⁶Nasorongmi lako tu Yesu kumua naa’ta’I.

¹⁷Naalami tau tu Yesu; Nasun umpassan Kalenai tu kayu pea’ta’Na ma’palulako inan disanga Inan ma’kararo ulu, ke basa Ibrani disanga Golgota.

¹⁸Indemoto nanii unna’ta’I sola to senga’ da’dua dio patomalinNa, nalan tangnga tu Yesu.

¹⁹Napesuammi Pilatus ussura’i tu tandana, nadipale’ke’ dao tampak kayu pea’ta’, nakua lan tu sura’: Yesu, to Nazaret, Datunna to Yahudi.

²⁰Iatu passura’ iato buda to Yahudi umbasai, belanna iatu dinii unna’ta’ Yesu sikandappi’ kota, anna disura’ basa Ibraniomi sia basa Romawi sia basa Yunani.

²¹Nakuami pangulu to minaanna to Yahudi lako Pilatus: Da misura’i kumua: Datu to Yahudi, sangadinna la susiri tu Napokadanna kumua: Akumo tu Datu to Yahudi.

²²Nakuami Pilatus mebali: Ianna mangka disura’, mangka bangsiamo!

²³Iatu surodadu tonna mangkamo unna’ta’I tu Yesu, naalami tu pakeanNa napa’a’pa’i, napantan unnalai sangtaan ke misa’i, sia ia duka tu bayu lanna lu; iatu bayu tae’ dasi’na, sangadinna sangkalae bang tempon dao mai sae rokko.

²⁴Nakuami sipa’kada-kada: Da anta serekki, melo ke tasire’tekki, ba’tu mindanta umpotaai, kumua anna sundun tu kada lan Sura’ Madatu tu nakua: Mangkamo nataa-taa tu pakeangKu sia iatu bayu lanKu lu mangkamo nasire’tekki. Ten dukamoto tu napogau’ tinde surodadu.

²⁵Iatu indo’Na bendan sikandappi’ kayu pea’ta’na Yesu sola sangbainena, Maria bainena Klopas, na Maria Magdalena.

²⁶Iatonna tiroi Yesu tu indo’Na sia iatu anak guru Napakaboro’na, ke’de’ nasikandappiran, Nakuami lako indo’Na: E baine, tiroi tu anakmi!

²⁷Namane kumua lako anak gurunNa iato: Tiroi tu indo’mu! Randuk tonna attu iato nasolanni lako banuanna nakurinni.

²⁸Undinnato, belanna Naissan Yesu kumua sundun nasangmo, kumua anna sundun tu kada lan Sura’ Madatu, Nakuami: Ma’rangNa’.

²⁹Denmi busso inde to dio ponno sukka anggoro’; nabatangimi tau supa tu lumu’ batu nanii ponno sukka lan, napadundui lako pudukNa Yesu.

³⁰IatonNa lepa’i Yesu tu sukka, Nakuami: Sundunmo! Tukkumi, Naussorong penaanNa.

³¹Belanna allo iato allo dinii ma’pasakka’, saemi tu to Yahudi lako Pilatus, kumua da nadio bang kayu pea’ta’ lan allo katorroan, belanna allo iato allo katorroan dipakala’bi’. Napalakui la ulle’toi tu lette’na sia unnalai dao mai.

³²Saemi surodadu, nale’toi tu lette’na tu misa’ namane senga’na tu Nasolanna dia’ta’.

³³Apa iatonna sae lako Yesu, natiroi matemo, tae’mi nale’toi tu lette’Na,

³⁴sangadinna den misa’ surodadu untobokki dokena tu la’pekNa Yesu, nata’pa sun tu rara sola uai.

³⁵Iatu to mangka untiroi to, iamo ungkatottongi, na iato nakatottonginna tonganna; sia naissan kumua tonganna tu napokada, dikua ammi ma’patongan duka.

³⁶Belanna iatu iannato dadimo, kumua anna sundun tu kada lan Sura’ Madatu nakua: Moi misa’ bukunNa tae’ la dile’to.

³⁷Sia den duka kada lan Sura’ Madatu: La natiro tau iato tu Tau mangka natobok.

³⁸Undinna loomi tu Yusuf to Arimatea, ia dukamo misa’ anak gurunna Yesu, apa nabuni bang belanna mataku’ lako to Yahudi, umpalakui lako Pilatus la umpopengkalaoi tu batang rabukNa Yesu; naelorammi Pilatus. Malemi, napopengkalaoi tu batang rabukNa Yesu.

³⁹Iatu Nikodemus, tu mangka lao umpellambi’i bongi Yesu, sae duka umbaa muru dipasirau garu, agi-agi sangtangnga pekulu’.

⁴⁰Naalami tu batang rabukNa Yesu, nabalunni sampin pebalun mangka napalakoi pebangki’, susitu biasa nagauran to mate to Yahudi.

⁴¹Den misa’ pa’lak sikandappi’ tu dininna unna’ta’ Yesu, nalan pa’lak iato den misa’ liang ba’ru, tae’ bangpa tau dipeliang tama.

⁴²Indemo to nanii umpannii tu batang rabukNa Yesu tu belanna allo naniimo to Yahudi ma’pasakka’, namandappi’ sia tu liang.