Read Toraja-Sa'dan YOHANES 2 Bible Online

YOHANES 2 - Toraja-Sa'dan bible

YOHANES 2

¹Ma’duang allo lendu’nato, denmi pa’maruasan to ma’kapa’ dio Kana, tana Galilea, sia iatu indo’Na Yesu dio ren.

²Iatu Yesu sola anak gurunNa ditambai duka lako tu pa’maruasan to ma’kapa’.

³Iatonna tang silasamo tu uai anggoro’, nakuami indo’Na Yesu lako: Tae’mo uai anggoro’na te tau.

⁴Nakuami Yesu lako: E baine, apamora la mituntun dio mai Kaleku? natae’pa nalambi’i attungKu.

⁵Nakuami indo’Na ungkuanni tu mintu’ to ma’paraka: Apa-apa Nakuangkomi, pogau’i.

⁶Indeto dio den balubu batu annan, dinii membase susitu biasanna atoranna to Yahudi; iatu balubu, siduang busso[1] ba’tu sitallung busso uai tama.

⁷Nakuami Yesu ungkuanni tu tau: Patamai nasangi uai te balubu. Naponnoimi tau sae langngan babana.

⁸Nakuami ungkuanni tu tau: Siokmi totemo, ammi baai lako to umpana’ta’ pa’maruasan. Nabaami.

⁹Iatonna lae’mi tinde to umpana’ta’ pa’maruasan tu uai menanggoro’mo, — tae’ naissanni umba nanii sae, apa naissan ia tu to ma’paraka, tu ussiokki tu uai — natambaimi tinde to umpana’ta’ pa’maruasan tu muane diparampo,

¹⁰nakuami ungkuanni: Biasanna ia napa’pairusan tau dolo tu anggoro’ mammi’, nabossapi tu tau unniru’i, namane dipa’pairusan tu tangkanna mammi’; anna mipalumpunni bang kamu tu mammi’na sae lako totemo.

¹¹Iamo te tu bunga’na tanda kalle-kallean tu Napogau’ Yesu dio Kana tana Galilea, sia umpa’pekitanan kamala’biranNa; napatonganmi anak gurunNa.

¹²Upu’ to malemi tu Yesu rokko Kapernaum sola indo’Na sia siulu’Na na anak gurunNa; apa tae’ napirang allo torro dio.

¹³Mandappi’mo allo Pasa to Yahudi, Nake’de’ tu Yesu langngan Yerusalem.

¹⁴Nalambi’mi lan Banua Kabusungan tu to ma’baluk tedong sapi sia domba sia bu’ku’ sia to ussapi’ doi’, unno’ko’ dio.

¹⁵Nagaragami tu pebamba ulang, Narambai nasangi tu tau lan mai Banua Kabusungan, sia ia duka tu mintu’ domba sia tedong sapi; sia Nabolloan tu doi’na to massapi’ doi’, sia Nabalittua’ tu medana.

¹⁶Nakuami ungkuanni tu to ma’baluk bu’ku’: Alai nasangi lao te apa iate, da mia’ga pa’balukanni te banuanNa Ambe’ku.

¹⁷Tilanta’mi lan penaanna anak gurunNa tu mangka disura’ kumua: Kamakaritutuan lako banuamMi la umpapuru’ penaangKu.

¹⁸Mebalimi tu to Yahudi nakua lako Yesu: Apara tu tanda la Mipakitangkan, kumua ma’dinKomi umpogau’i susito?

¹⁹Nakuami Yesu mebali lako: Rondonnimi te Banua Kabusungan, angKu pabendanni sule lan tallung allo.

²⁰Nakuami tu to Yahudi: Patangpulo nnannan taunna nanii tau umpabendanni te Banua Kabusungan, anna tallung allori Kamu la Minii umpabendanni?

²¹Apa ia tu Banua Kabusungan Napokada, Kalena Ia.

²²Iamira tonna malimbangunmo dio mai to’ to mate, namane ungkilalai anak gurunNa kumua mangkamo Napokada te; napatonganmi tu Sura’ Madatu sia iatu kada mangka Napokada Yesu.

²³Tonna diomo Yerusalem, tonna allo kapua dinii Ma’pasa, budami tau umpatonganni tu sanganNa, belanna nakitamo tu tanda kalle-kallean Napogau’.

²⁴Apa iatu Yesu tae’ Namatappa’ lako tau iato mai umpamanassa kalena, belanna Natandai nasang tu penaanna.

²⁵Sia belanna tae’ Naanga’ misa’ duka tau la ungkatottongi tu diona tolino, belanna Ia kalena unnissanni tu lanna penaanna tolino.