Read Toraja-Sa'dan YOHANES 20 Bible Online

YOHANES 20 - Toraja-Sa'dan bible

YOHANES 20

¹Iatonna allo bunga’na lan minggu iato tonna melambi’ tae’pa bongi, saemi tu Maria Magdalena lako to’ liang iato, natiroi mangkamo dilentenni tu batu dio mai baba liang.

²Ma’dondo-dondomi sae lako Simon Petrus sia lako tu anak gurunNa senga’, tu Napakaboro’na Yesu, anna kua lako: Naalaimo tau lan mai liang tu Puang, na tae’ kiissanni ba’tumba napannii.

³Malemi tu Petrus sola tu anak gurunNa senga’, narampo lako to’ liang.

⁴Ma’dondo-dondomi sola duai, apa didoloi tu Petrus, matira’ ia tu solana, nadolo rampo lako to’ liang.

⁵Messurrukmi mentiro tama, natiroi dipatorro bangmo tu pebalun, apa tae’ nalao tama.

⁶Undimi tu Petrus dio mai boko’na namale tama liang, natiroi tu pebalun dipatorro bangmo,

⁷na iatu sampin dipadao ulunNa, tae’ nadiong sola sampin pebalun, sangadinna dilu’pi’ nadipatorro senga’.

⁸Namane tama tu anak gurunNa senga’ tu dolona rampo lako to’ liang, natiroi anna patonganni.

⁹Belanna tae’pa natandai battuananna tu kada lan Sura’ Madatu kumua inang la malimbangun dio mai to’ to mate.

¹⁰Sulemi lako banuanna.

¹¹Apa iatu Maria ke’de’ dio salian sikandappi’ liang, tumangi’. Iatonna tumangi’ messurrukmi mentiro tama liang;

¹²nakitami tu malaeka’ da’dua ma’pakean mabusa unno’ko’, misa’ dao to’ naninna mennulu namisa’ diong to’ lentekna tonna lanpa tu batang rabukNa Yesu.

¹³Nakuami lako: E baine, ma’apai ammu tumangi’? Nakuami Maria lako: Belanna naalamo tau tu Puangku, natae’ kuissanni ba’tumba napanii.

¹⁴Iatonna mangka ma’kada susito, menggirikmi nakitaI tu Yesu ke’de’, apa tae’ natandai kumua Iamo.

¹⁵Nakuami Yesu lako: E baine, ma’apari ammu tumangi’? Mindara mudaka’? Belanna nasanga Maria to ma’kampa pa’lak, nakuami mebali lako: O tuang, iake kamu umpalelei male, pokadanna’ umbara Mipannii, angku lao unnalaI.

¹⁶Nakuami Yesu lako: E Maria. Menggirikmi tu Maria sia nakua lako ma’basa Ibrani: Rabbuni! battuananna: Guru.

¹⁷Nakuami Yesu lako: Da mukaka’Na’ mai, belanna tae’pa Kukendek langngan Ambe’; apa laomoko lako mintu’ siulu’Ku, sia pokadanni kumua: La kendekNa’ langngan Ambe’Ku sia Ambe’mi, PuangKu sia Puangmi.

¹⁸Malemi tu Maria Magdalena umpa’peissananni lako anak gurunNa kumua natiromo tu Puang sia kumua Napokadamo lako kalena tu mintu’nato.

¹⁹Iatonna makaroenmo tonna allo bunga’na lan minggu iato, disalli’ bangmo tu ba’ba banua nanii anak gurunNa torro belanna mataku’ lako to Yahudi, pakalan Nata’pa sae bangmo bendan lan tangnga-tangngana tinde tau tu Yesu sia Nakua ma’kada lako: Siriakomi kamarampasan!

²⁰Tonna mangka ma’kada susito, Napa’pekitanammi lako tinde tau tu limanNa sia la’pekNa. Parannumi tu anak gurunNa tonna tiroi tu Puang.

²¹Natole pole’omi Yesu umpokadai lako tinde tau kumua: Siriakomi kamarampasan! Tumba tu Ambe’ mangka ussuaNa’, ten dukamoto tu Aku ussuakomi.

²²Iatonna mangka umpokadai susito, Napamurru’mi lako tinde tau sia Nakua: Tarimami tu Penaa Masallo’.

²³Minda-minda mipagarri’ tu kasalanna, masero tu kasalanna, sia minda-minda mipasisurung kasalanna, la sisurung kasalanna.

²⁴Iatu Tomas, iamo misa’ tu anak gurunNa sangpulo dua, tu disanga duka Didimus, tae’ nasisola tinde tau tonna sae tu Yesu.

²⁵Nakuami tinde anak gurunNa senga’ lako Tomas: Kikitamo tu Puang. Apa nakua Tomas lako: Iake tae’pi kutiroi tu lalan paku dio limanNa sia kuului rakka’ku tama, sia ke tae’pi kuului tu limangku tama la’pekNa, tae’pa kupatonganni.

²⁶Karua allona mangkanna to sirampunomi tu anak gurunNa Yesu lan banua lan dukamo sola tu Tomas. Iatonna tisalli’mo tu ba’ba banua, saemi tu Yesu bendan lan tangnga sia Nakua: Siriakomi kamarampasan!

²⁷Namane ma’kada lako Tomas, Nakua: Patadomi mai tu rakka’mu, tiromi tu limangKu, sia patadomi mai tu limammu muului tama tu la’pekKu, da mutang ma’patongan, sangadinna katappa’i.

²⁸Mebalimi Tomas sia nakua lako: O Puangku sia Kapenombangku.

²⁹Nakuami Yesu lako: Tu belanna mukitaMo’, dadi ma’patongan dukamoko; maupa’ tu to ma’patongan, moi anna tae’ nakitai.

³⁰Moi anna buda tu tanda kalle-kallean senga’ tu Napogau’ Yesu dio tingayona anak gurunNa tu tang disura’na lan te sura’;

³¹apa iate iannate mangkamo disura’, ammi katappa’i kumua iatu Yesu Iamo Mesias, tu AnakNa Puang Matua, sia kumua diona kapatonganammi mipotuoi tu sanganNa.