Read Toraja-Sa'dan YOHANES 21 Bible Online

YOHANES 21 - Toraja-Sa'dan bible

YOHANES 21

¹Undinnato umpa’pekitanan pole’omi Kalena tu Yesu lako anak gurunNa dio randan tasik Tiberias. Susite tu kaumpa’pekitananNa Kalena.

²Iatu Simon Petrus dio ren sola Tomas, tu disanga duka Didimus, na Natanael dio mai Kana dio tana Galilea, na anakna Zebedeus na da’duapa anak gurunNa senga’ nasisolan.

³Nakuami Simon Petrus lako tinde tau: La laona’ mebale. Nakuami tinde tau mebali lako: La lao dukakan urrundu’ko. Malemi ma’lopi; iato bongi iato tae’ bang misa’ apa nakabu’tui.

⁴Tonna tibaanmo masiang ke’de’mi tu Yesu dio randan tasik; apa tae’ natandai anak gurunNa kumua Iamo Yesu.

⁵Mekutanami tu Yesu lako, Nakua: E pia, denraka pa’kandean iti’? Nakuami mebali: Tae’.

⁶Nakuami ungkuanni: Buangi tu dalla’mi rokko sa’de kananna lopi, manassa la miala. Nabuangmi tu dalla’na, na belanna lendu’ budanna bale lan, tang nabelami urriu’i.

⁷Nakuami tu anak guru Napakaboro’ Yesu lako Petrus: Iamo Puang tu. Iatonna rangii Simon Petrus kumua Iamo Puang to, napotambeke’mi tu sambu’na, belanna tae’ namessambu’, namekkondong rokko tasik.

⁸Apa iatu anak gurunNa senga’ ma’lopi sae, belanna tae’ nasangapa mambelanna dio mai gantanan, agi-agiri limangpulo da’pana, nariu’i tu dalla’ ponno bale lan.

⁹Iatonna kendekmo langngan gantanan, nakitami tu ruaya, nanii bale dao sia den duka roti.

¹⁰Nakuami Yesu lako tinde tau: Baai mai pira tu bale mane miala.

¹¹Kendekmi langngan lopi tu Simon Petrus, nariu’i tu dalla’ langngan karangkeanna, ponno bale sikapua, saratu’ limangpulo ntallu budanna. Na moi pada budanna to, tae’ duka naserek tu dalla’.

¹²Nakuami Yesu lako tinde tau: Maimokomi kumande. Apa tae’ bangi misa’i tu anak gurunNa barani mekutana lako kumua: Mindarokomi te? Belanna inang naissanmo kumua: Iamo Puang.

¹³Saemi Yesu urreke’i Naalai tu roti Natadoanni lako, sia ia duka tu bale.

¹⁴Iamote tu ma’pentallunna Yesu umpa’pekitanan Kalena lako anak gurunNa tonna malimbangunmo dio mai to’ to mate.

¹⁵Iatonna mangkamo kumande, Nakuami Yesu lako Simon Petrus: E Simon, anakna Yohanes, mupakaboro’ tonganRa’ka na iate tau iate mai? Nakuami Petrus lako: O Puang, inang Miissan bangmo, kumua aku te kukamali’Komi. Nakuami Yesu lako: Kaduttu’i tu mintu’ anak dombaKu.

¹⁶Natoleomi ma’kada lako nakua: E Simon, anakna Yohanes mupakaboro’ tonganRa’ka? Nakuami Petrus lako: O Puang inang Miissan bangmo kumua aku te kukamali’Komi. Nakuami Yesu lako: Kambi’i tu mintu’ dombaKu.

¹⁷Natole pole’omi ma’kada lako Nakua: E Simon, anakna Yohanes, mukamali’Ra’ka? Masussami tu Petrus tu belanna ma’pentallun maro’mo ma’kada lako kumua: Mukamali’Ra’ka? Nakuami lako: O Puang, mintu’na angge maritik Miissan nasang, Miissan duka kumua aku te kukamali’Komi. Nakuami Yesu lako: Kaduttu’i tu mintu’ dombaKu.

¹⁸Tonganna tongan Kukua mati’: Iatommu mangura, iko kalena ma’tambeke’ ammu male umba-umba nii muporai; apa iake matuamoko, la umpatadoko limammu, anna to senga’ umpatambeke’iko, anna baako umba-umba nii tu tang muporainna.

¹⁹Ia sia Nama’kada susito, la Nanii umpasomboi kumua kamatean tumbara la nanii Petrus umpakala’bi’ Puang Matua. Iatonna mangka umpokadai te, Nakuami lako Petrus: Undiko urrundu’Na’.

²⁰Messailemi tu Petrus: Nakitai tu anak guru Napakaboro’ Yesu undi urrundu’I, iamotu sissare lako barangkangNa Yesu tonna kumande bongi sia ma’kada kumua: O Puang, mindara tu la umpa’peturoangKomi?

²¹Iatonna kitai Petrus tu anak guru iato, nakuami lako Yesu: O Puang, la ma’patumbai undinna te tau iate?

²²Nakuami Yesu ungkuanni: Iake Kukamorai anna torro bang te tau iate sae lako kasaeangKu, na ikoora iko la umpoissanni! Undiko urrundu’Na’.

²³Iamoto anna tiseno-seno te kada iate lako mintu’ to sangsiuluran kumua: Tae’ nala mate tu anak guru iato; apa tae’ Nakua Yesu lako kumua tae’ nala mate sangadinna Nakua: Iake Kukamorai anna torro bang te tau iate sae lako kasaeangKu, na ikoora iko la umpoissanni!

²⁴Iamotu anak guru iato tu ungkatottongi te mintu’nate, sia mangka untonoranni te mintu’nate; sia taissan kumua iatu nakatottonginna tonganna tongan.

²⁵Budapa senga’na tu Napogau’ Yesu; na iake la disura’ simisa’i tu mintu’nato, kusanga iate lino tae’ nala tama tu mintu’ sura’ dinii ussura’i.