Read Toraja-Sa'dan YOHANES 4 Bible Online

YOHANES 4 - Toraja-Sa'dan bible

YOHANES 4

¹Tonna issanmi Yesu, kumua narangimo to Farisi tu diona Yesu buda Ia tau Napadadi anak gurunNa sia buda Ia tau Nadio’ anna Yohanes,

²— moi anna tae’ na Yesu kalena undio’ tau, sangadinna anak gurunNa ia tu ma’dio’ —

³Natampemi tu tana Yudea, Nake’de’ sule lako Galilea.

⁴Apa inang la unnola lako tana Samaria.

⁵Rampomi lako misa’ tondok dio Samaria, disanga Sikhar sikandappi’ padang mangka napa’bengan Yakub lako Yusuf anakna, pirambongi’.

⁶Indemoto tu bubunna Yakub. Belanna mata’ka’ lumingka tu Yesu, unno’ko’ bangmi dio to’ bubun iato, agi-agi te’te’ sangpulo dua tangnga allo.

⁷Saemi misa baine to Samaria la untimba uai; Nakuami Yesu lako: Benna’ uai Kuiru’i.

⁸Belanna iatu anak gurunNa malemo tama tondok unnalli kande.

⁹Nakuami tinde baine to Samaria lako: Ma’apai na to YahudiKomi amMi palakuina’ uai Miiru’ anna baine to Samariana’ aku? (Belanna tae’ nasikambaroan to Yahudi tu to Samaria.)

¹⁰Mebalimi Yesu Nakua ungkuanni: Iakemmu tandai tu pa’kamaseNa Puang Matua sia minda tu umpa’kadaiko, kumua: benNa’ uai Kuiru’i, tae’ mutang malakumo lako, sia mangkamoko Naben tu uai marendeng.

¹¹Nakuami tinde baine lako: O Puang, tae’ bang apa iti’ la Mipa’timban anna mandalan rokko te bubun; naumbara la Minii unnalai tu uai marendeng?

¹²Kamuraka la ondong na iatu Yakub, nene’ to doloki, tu mangka umbenkanni te bubun, na ia kalenamo unniru’i, sia anakna sia mintu’ patuoanna?

¹³Mebalimi Yesu Nakua lako: Minda-minda unniru’i te uai iate, la ma’rang bangsia sule.

¹⁴Apa minda-minda unniru’i tu uai la Kubenni, tae’ nala ma’rang len sae lakona, belanna iatu uai Kubenni la mendadi kalimbuang lan kalena natikula’dak-la’dak sae lako katuoan tontong sae lakona.

¹⁵Nakuami tinde baine lako: O Puang, benmo’ tu uai iato, da angku ma’rang len, sia da kumanggi’ sae indete untimba uai.

¹⁶Nakuami ungkuanni: Loomoko untambai tu muanemu, mumane sae indete.

¹⁷Mebalimi tinde baine nakua: Tae’ aku kukemuane. Nakuami Yesu lako: Tonganna tu kadammu, kumua: tae’ aku kukemuane.

¹⁸Belanna limamo tu tau mangka mupomuane, na iatu diona kalemu totemo, inang tangia ia muanemu to. Tonganna tu kadammu.

¹⁹Nakuami tinde baine lako: O Puang, kusanga inang la nabiKomi.

²⁰Naniimo nene’ to doloki menomba dao te buntu iate, Mikuami Kamu, Yerusalem ia tu sipatu nanii tau menomba.

²¹Nakuami Yesu ungkuanni: E baine, patonganNa’, kumua la sae tu attunna, to ke mipenombaimi tu Ambe’, tang daora buntu iate sia tang dio dukara Yerusalem.

²²Manassa kamu te umpenombaikomi apa tang mitandai; kami kami umpenombaikan apa kitandai; belanna iatu kadikarimmanan lu dio mai to Yahudi.

²³Apa la sae tu attunna, na nalambi’mo totemo, kumua mintu’na tu to menomba tongan la menomba lan ia penaa langngan Ambe’ tu tonganna; belanna iari Nadaka’ Ambe’ tu to menomba susito.

²⁴Iatu Puang Matua Penaa Ia: dadi iatu to umpenombai, sipatu la menomba lan ia penaa tu tonganna.

²⁵Nakuami tinde baine lako: Kuissan sia kumua la sae tu Mesias, tu disanga Kristus; ianNa sae, la Napa’peissanan lako kaleki tu mintu’nato.

²⁶Nakuami Yesu ungkuanni: Aku bangsiamote musipa’kadan.

²⁷Tonna iato saemi anak gurunNa; mangngami, belanna sipa’ulelean baine tu Yesu. Apa tae’ bangi misa’ mekutana kumua: La ma’aparoKomi? ba’tu Apara tu Mipokada lako?

²⁸Natampemi tu bussona tinde baine, namale tama tondok sia nakua lako tau:

²⁹Maimokomi, den ia tau inde dio misa’ umpokadanna’ tu mintu’ penggaurangku. Ba’tu tang Iamo Kristus?

³⁰Sangsunammi tu tau lan mai tondok naloo umpellambi’I.

³¹Tonna iato natambaimi anak gurunNa, nakua: O Rabi, kumandemoKomi.

³²Apa Nakua ungkuanni: Den sia kande inde la Kukande, tu tang miissanna.

³³Sipa’kada-kadami tu anak gurunNa nakua: Dendaka tau umbanNi kande?

³⁴Nakuami Yesu ungkuanni: Iatu kandeKu, iamotu umpogau’ pa’poraianNa To ussuaNa’, sia ussundunni pengkaranganNa.

³⁵Tang mikuaraka: Patang bulanpa napeparean? Tonganna tongan Kukua mati’: Bangunanni tu matammi, tiromi tu mintu’ bela’; belanna matasak nasangmo totemo, pepareannamo.

³⁶Na iatu to mepare unnalamo sarona, sia urrampun bura padang tama katuoan tontong sae lakona, kumua anna pada-pada parannu nala to mangambo’ nala to mepare.

³⁷Belanna iatu ianna te tonganna bangmo tu dipoparumbasan kumua: Senga’ tau mangambo’, laen tau mepare.

³⁸Aku ussuakomi lao umpeparei tang mikara’ta’ina; nakara’ta’imo tau ammi alai tu kara’tasanna.

³⁹Budami tu to Samaria lan tondok iato umpatonganNi tu Yesu, belanna kanakanassainna tinde baine nakua: Napokadamo lako kaleku tu mintu’na mangkanna kupogau’.

⁴⁰Iatonna sae lako Yesu tu to Samaria, napalakumi, kumua anNa torro sola; torromi dio duang allo.

⁴¹Sabuda-budannami tau ma’patongan belanna narangi kalenamo tu kadanNa Yesu.

⁴²Nakuami tu tau lako tinde baine: Totemo ma’patonganmokan tangia kumua diona manna kadammu, sangadinna kirangi kalenamo sia kiissan kumua iate Tau iate tonganna to Pakarimmananna te lino.

⁴³Duang allo lendu’nato ke’de’mi tu Yesu dio mai Namale lako Galilea,

⁴⁴belanna Ia Kalena umpokadai, kumua misa’ nabi tae’ nadibilang lan tondokna.

⁴⁵Iatonna rampo lako Galilea, natammuimi to Galilea, belanna nakitamo tu mintu’na Napogau’na dio Yerusalem tonna allo kapua; belanna loo duka tu tau iato umpakarayai tu allo kapua.

⁴⁶Ma’tole pole’omi sae dio Kana, tana Galilea, tu Naninna umpopennanggoro’ uai. Denmi misa’ to untoe parea dio datu, dio Kapernaum, masaki tu anakna muane.

⁴⁷Iatonna rangi kumua saemo tu Yesu dio mai tana Yudea lako Galilea, loomi napellambi’I, napalakuI anNa loo rokko umpamalekei tu anakna, belanna la mate mannamo.

⁴⁸Nakuami Yesu ungkuanni: Ianna tae’ mitiro tanda kalle-kallean sia tanda mangnga, tae’ mima’patongan.

⁴⁹Nakuami lako tinde to untoe parea dio datu: MaimoKomi talao rokko su’ding tae’ siapi namate tu anakku.

⁵⁰Nakuami Yesu lako: Laomokomi, tuo ia tu anakmi. Napatonganmi tinde tau tu kada Napokadanni Yesu, namale.

⁵¹Apa solo’ bangsia rokko, nasitammumo kaunanna umbaa kareba kumua tuo sia ia tu anakna.

⁵²Mekutanami lako tinde tau kumua: te’te’ pira anna melo nasa’ding? Nakuami lako: Te’te’ misa’ iongi’ napa’de tu kula’na.

⁵³Naissanmi tinde ambe’na tu pia, kumua te’te’ ia duka bangsiamoto anNa kua lako tu Yesu: Tuo ia tu anakmi; ma’patonganmi sola tu mintu’ to lan banuanna.

⁵⁴Iamote tu tanda kalle-kallean ma’penduanna Napogau’ Yesu tonna lu dio mai tana Yudea Nasae lako Galilea.