Read Toraja-Sa'dan YOHANES 5 Bible Online

YOHANES 5 - Toraja-Sa'dan bible

YOHANES 5

¹Undinnato denmi allo kapuana to Yahudi; malemi tu Yesu langngan Yerusalem.

²Dio Yerusalem sikandappi’ babangan Domba den misa’ limbong, iake basa Ibrani disanga Betesda; inde to dio den lima lantang.

³Lan lantang iato lendu’ budanna to masaki mamma’, to buta sia to sondo’ sia to kupi’, umpeagi nasang uai limbong tise’go’.

⁴Belanna den sipissan-pissan namengkalao malaeka’ rokko limbong iato nase’go’i tu uainna; minda-minda tu bunga’na mengkalao rokko tu limbong, ke mangkai tise’go’ tu uai, maleke moi nasaki apa unnalai.

⁵Denmi dio misa’ tu to masaki tallungpulomo ngkarua taunna.

⁶Iatonna tiroi Yesu mamma’, sia Naissan, kumua padamo masainna masaki to, Nakuami ungkuanni: Morairokoka maleke?

⁷Nakuami tinde to masaki mebali lako: O Puang, tae’ dikka’ tau umbaana’ rokko te limbong, ke tise’go’i uainna, apa iangku male, nadoloimo’ to senga’ mengkalao rokko.

⁸Nakuami Yesu ungkuanni: Millikmoko mualai tu ampa’mu mumale ma’lingka.

⁹Ta’pa malekemi tinde tau, naalai tu ampa’na namale ma’lingka. Iato allo iato, allo katorroan.

¹⁰Iamoto anna kua to Yahudi lako tu to dipamaleke: Allo iate allo katorroan, tae’ nasipatu la mubaa tu ampa’mu.

¹¹Mebalimi lako tinde tau nakua: Na tu To umpamalekena’, Iamo ungkuanna’ kumua: Alami tu ampa’mu, mumale ma’lingka’.

¹²Mekutanami tinde tau lako nakua: Mindara tu tau iato, tu ungkuangko kumua: Alai mumale ma’lingka?

¹³Apa tae’ natandai tinde to dipamaleke kumua mindara to, belanna malemo tu Yesu, apa lendu’ budanna tau inde to dio.

¹⁴Undinnato sitammumi Yesu dio to’ Banua Kabusungan, Nakuami ungkuanni: Tiromi, malekemoko; damo mupogau’ kasalan, da naruako tu kadakena pissan.

¹⁵Malemi tinde tau umpa’peissananni lako to Yahudi, kumua iatu To umpamalekei iamotu Yesu.

¹⁶Iamoto napakario-rioI to Yahudi tu Yesu tu belanna Napogau’ tu iannato lan allo katorroan.

¹⁷Nakuami Yesu mebali lako tinde tau: Iatu Ambe’Ku mengkarang sae lako totemo sia Aku mengkarang dukaNa’.

¹⁸Iamoto nasaundaka’-daka’na tanga’ tu to Yahudi la morai umpatei, tae’ kumua untengkai mannai atoranna allo katorroan, sangadinna tu belanna Nakua Ambe’ misanNa tu Puang Matua, umpapada Puang Matua Kalena.

¹⁹Mebalimi tu Yesu sia nakua ungkuanni tu tau: Tonganna tongan Kukua mati’: Moi misa’ apa tae’ Nama’inaanna tu Anak umpogau’i ke tae’i Natiroi Napogau’ Ambe’; belanna apa-apa tu Napogau’ Ambe’, ten dukato Napogau’ Anak.

²⁰Belanna Napakaboro’ Ambe’ tu Anak sia Napakitan tu apa Napogau’; ontongpi la Napakitan tu pengkarangan ondong kapuana na iate, kumua ammi mangnga.

²¹Belanna susi Ambe’ umpamalimbangun to mate anNa patuoi, ten dukamoto tu Anak umpatuoi minda-minda tu Naporai.

²²Belanna iatu Ambe’ moi misa’ tau tae’ Napaolai pangra’ta’, sangadinna mangka nasangmo Nasorong lako Anak tu pangra’ta’,

²³kumua anna mintu’ tau umpangke’I tu Anak susitu kaumpangkeranna Ambe’. Minda-minda tang umpangke’I tu Anak, tae’ duka napangke’I tu Ambe’ ussuaI.

²⁴Tonganna tongan Kukua mati’: Minda-minda umperangii tu kadangKu sia umpatonganNi tu To ussuaNa’, iamo la ungkabu’tui katuoan tontong sae lakona sia tae’ nakannai ukungan, sangadinna lumengka’mo dio mai kamatean lako katuoan.

²⁵Tonganna tongan Kukua mati’: La sae tu attunna sia den dukamo totemo, kumua mintu’nato mate la urrangi gamaranNa AnakNa Puang Matua, na iatu to urrangii la tuo.

²⁶Belanna susitu Ambe’ den katuoan lan Kalena, ten dukamoto Napa’kamasean lako Anak naden katuoan lan Kalena.

²⁷Sia Naben kakuasan lako la umpogau’i tu pangra’ta’, belanna Iamotu Anak rampan dilino.

²⁸Da mimangnga tu iannato, belanna la sae tu attunna to ke mintu’nato lan liang urrangi tu gamaranNa,

²⁹anna sun; mintu’na tu to umpogau’ kameloan la malimbangun natama katuoan tontong sae lakona, sia mintu’na tu to umpogau’ kakadakean la malimbangun natama ukungan.

³⁰Moi misa’ tae’ Kuma’din ma’inaanna Kalena umpogau’i; sangadinna Kupalalo tu pangra’ta’ susitu Kuranginna, na iatu pangra’ta’Ku malambu’ tongan; belanna tangia pa’poraiangKu Kutuntun, sangadinna pa’poraianNa tu To ussuaNa’.

³¹Iake Kaleku Kukatottongi, tae’ natongan tu Kukatottonginna.

³²Den senga’na tu ungkatottongi tu diona Aku, na Kuissan kumua tonganna tu apa Nakatottongi diona Aku.

³³Iate kamu te inang ussuakomi tau lako Yohanes anna katottongi tu tonganna.

³⁴Apa Aku te tae’ Kutuntunni tu nakatottonginna tolino, iari Kupokadai te, kumua ammi makarimman.

³⁵Iatu Yohanes iamo misa’ palita dukku sia parrang; apa kamu te sattu’rokomi la umpasende penaammi lan arrangna.

³⁶Apa iatu dikatottonginna diona Aku ondong Ia kapuanna na iatu nakatottonginna Yohanes; belanna mintu’na tu pengkarangan tu Nasorong Ambe’Ku lako Kaleku, kumua angKu pasundunni, mintu’namo tu pengkarangan iato, tu Kupogau’, iamoto tu ungkatottongi tu diona Aku, kumua Ambe’Ku tu ussuaNa’.

³⁷Na iatu Ambe’ ussuaNa’, Ia kalenamo mangka ungkatottongi tu diona Aku. Tae’pa mirangi lenni gamaranNa ba’tu untiroi rupanNa,

³⁸sia iatu kadanNa tae’ mikanannangi lan penaammi; belanna iatu To Nasua, tae’ mipatonganNi.

³⁹Minannung tu lanna Sura’ Madatu, belanna misanga lan mai la minii ungkabu’tui katuoan tontong sae lakona; anna ia duka tu Sura’ iato ungkatottongi tu diona Aku.

⁴⁰Apa tae’ mimorai sae lako Kaleku, kumua ammi kabu’tui katuoan.

⁴¹Iatu kadibilangan dio mai tolino tae’ Kutuntunni;

⁴²apa Kuissankomi, kumua tae’ miampui kamamaliran lako Puang Matua lan penaammi.

⁴³Aku te saeNa’ umpotete sanganNa Ambe’Ku, apa tae’ mitarimaNa’; iake to senga’ misa’ sae na sanganna kalena napotete, inang la mitarima.

⁴⁴Umba la mikua ma’patongan, ke sipa’tuntunangkomi kadibilangan, natae’ mituntun kadibilangan dio mai Puang Matua?

⁴⁵Da misangai kumua Kupa’parampoangkomi dio oloNa Ambe’. Iatu to umparapa’komi iamotu Musa to mirannuan.

⁴⁶Belanna iake mipatonganni tu Musa, inang la mipatongan dukaNa’, belanna ia ussura’i tu diona Aku.

⁴⁷Apa iake tae’i mipatonganni tu Sura’na, umba la mikua umpatonganni tu kadangKu?