Read Toraja-Sa'dan YOHANES 7 Bible Online

YOHANES 7 - Toraja-Sa'dan bible

YOHANES 7

¹Undinnato malemi tu Yesu ullelei tana Galilea, belanna tae’ namorai ullelei tu tana Yudea, apa undaka’ tangnga’ tu to Yahudi la morai umpatei.

²Anna mandappi’mo tu allo kapuana to Yahudi, tu allo kapua Pekalumban.

³Nakuami tu mai siulu’Na lako: Ke’de’moKo inde te, amMu male lako tana Yudea, anna tiro dukai to unturu’Ko tu penggauran Mupogau’.

⁴Belanna tae’ tau misa’ umpogau’ buni apa, ke la morai kalelean. TakkalamoKo umpogau’i tu iannato, pasombo pissanni tu Kalemu lako issinna te lino.

⁵Belanna iatu mai siulu’Na tae’ duka napatonganNi.

⁶Nakuami Yesu ungkuanni: Tae’pa nalambi’i attungKu, apa iatu attummi tontong bang kamu den.

⁷Tae’ nabelai tu issinna te lino la ungkabiri’komi, apa nakabiri’Na’ Aku, belanna Kukatottongi tu a’ganna, kumua kadake tu penggauranna.

⁸Laomokomi kamu umpellindoi tu pa’maruasan allo kapua. Tae’pa Aku Kula lao umpellindoi tu pa’maruasan allo kapua, belanna tae’pa nalambi’i attungKu.

⁹Torromi dio Galilea tonna mangka ma’kada lako susito.

¹⁰Apa iatonna malemo tu mai siulu’Na umpellindoi tu pa’maruasan allo kapua, male dukami, apa tae’ Napa’pepayanan Kalena, sangadinna male kamama’ bang.

¹¹Nasidaka’-daka’Imi to Yahudi tonna allo kapua iato nakua: Umbamira?

¹²Budami kadanna tau unnuleleanNi dio pa’budan tau; den tu tau kumua: To masokan Ia, nakuaomi tu pira’: Tae’, umpapusa ria to buda.

¹³Apa tae’ misa’ tau tu barani ma’kada-kada unna’tikanni tu diona Yesu, belanna mataku’ lako to Yahudi.

¹⁴Iatonna matangngamo tu pa’gauran kendekmi tu Yesu langngan to’ Banua Kabusungan anNa mangada’i.

¹⁵Mangngami tu to Yahudi nakua: Umba Ia nakua te Tau te untarru’i tu mai Sura’ anna tae’ Namelada’?

¹⁶Mebalimi Yesu lako tu tau sia Nakua: Iatu pangadarangKu tae’ natuo dio Kaleku, sangadinna lu dio mai tu To ussuaNa’.

¹⁷Iake den tau morai umpogau’ pa’poraianNa Puang Matua, la natandai te pangadaran iate, kumua lu dioraka mai Puang Matua, ba’tu tuo lu dio bangraka mai Kaleku.

¹⁸Minda-minda tu umpasun kada tuo dio kalena, iamo untuntun kadibilangan, apa minda-minda tu untuntunanNi kadibilangan tu To ussuai, iamo ia tonganna to sia tae’ naden kakelokan Dio.

¹⁹Tang mangkamorokomika naben Sukaran aluk Musa? Natae’ bangkomi misa’ umpengkaolai tu Sukaran aluk. Ma’apari ammi daka’ra lalan la umpateiNa’?

²⁰Nakuami mebali tu to buda: NatabaKomi ria deata masussuk. Mindara undaka’ lalan la umpateiKomi?

²¹Nakuami Yesu mebali lako tu tau: Mane misa’ tu penggauran Kupogau’, ammi mangnga nasangmo.

²²Iamoto: nabenmokomi Musa tu sunna’ — tangia Musa umpondokki sangadinna nene’ to dolomi — ; anna mipogau’ sia lako muane ke allo katorroan.

²³Iake dipogau’ siai lako tau lan allo katorroan, kumua da anna ditengkai tu alukna Musa, ma’apai ammi sengke lako Kaleku, anna mintu’ kalena Kupamondo tu tau misa’ lan allo katorroan?

²⁴Da na ia manna tu nabasanna mata minii ma’pasala, sangadinna pakalambu’ tonganni, ke mangra’ta’komi.

²⁵Denmi ba’tu pira-pira to Yerusalem nakua: Tang Iamoraka te tu nadakaran lalan tau la napatei?

²⁶Tiromi, Napolang-polang bangmo tu kada, anna tae’ bang nama’kada len tu tau lako. Ba’tu la napemanassami ia pangulu kumua Ia tonganmo te tu Kristus?

²⁷Inang kitandaimo kumua umba Nanii sae te Tau iate; apa ianNa sae tu Kristus, tae’ ia tau misa’ unnisanni kumua umba Nanii sae.

²⁸Napemanduimi Yesu tu kadanNa mangada’i lan Banua Kabusungan Nakua: Iatu Aku inang mitandaiMo’ sia miissan umba Kunii sae; sia tae’ Kuma’lalan inaanna sae, sangadinna den misa’ To tongan tu ussuaNa’, iamoto tu tang mitandai.

²⁹Kutandai Aku, belanna Ia Kunii ke’de’, sia Iamotu ussuaNa’.

³⁰Undaka’mi lalan tu tau la untingkanNi, apa tae’ bang misa’ umpata’pai lima, belanna tae’pa nalambi’i attunNa.

³¹Apa buda tau lan tinde to buda umpatonganNi sia nakua: Iake saeI tu Kristus, la buda pole’oraka tanda kalle-kallean Napaden na iatu Napadenna te Tau iate?

³²Iatonna rangii to Farisi tu to buda sipa’kada-kada unnuleleanni tu iannato, umpokadai tu diona Yesu, nasuami pangulu to minaa sia to Farisi tu solana kumua anna tingkanNi.

³³Nakuami Yesu: Sattu’moraki’ la sisola, angKu malemo umpellambi’i tu To ussuaNa’.

³⁴Ammi daka’Na’, natae’ mikabu’tuiNa’, sia iatu Kuninna tae’ mibelai la ullambi’i.

³⁵Iamoto anna sipa’kada-kada kalena tu pada to Yahudi nakua: Umbara la Naola te Tau iate anta tang la ullambi’i? La laoraka lako to sisarak-sarak bangmo dio lu sola to Yunani sia unnada’i to Yunani?

³⁶Kada apa ia tu Napokada kumua: La midaka’Na’ natae’ mikabu’tuiNa’, sia iatu Kuninna tae’ mibelai ullambi’i?

³⁷Iatonna allo tampaknamo, tonna matannamo tu pa’gauran, ke’de’mi tu Yesu, Napemandui ma’kada Nakua: Iake denni tau ma’rang, nasae lako Kaleku, namangiru’.

³⁸Minda-minda tu umpatonganNa’ susi dipokada lan Sura’ Madatu, la lolong lan mai ba’tangna tu salu nanii uai marendeng.

³⁹Iatu Napokadanna te diona Penaa, tu la natarima mintu’ to umpatonganNi; apa attu iato tae’pa tu Penaa Masallo’ belanna tae’pa Nadipakala’bi’ tu Yesu.

⁴⁰Iatonna rangii ba’tu pira-pirai te to buda te kada iate, nakuami: Manassa Iamote Tau iate tu nabi.

⁴¹Sia nakua tu to senga’: Iamo te tu Mesias. Den pole’o tu senga’na kumua: Ma’apai nala bu’tu dio mai Galilea tu Mesias?

⁴²Tang dipokadaraka lan Sura’ Madatu kumua lan mai tarukna Daud sia lan mai Betlehem, tondokna Daud, la Nanii bu’tu tu Mesias?

⁴³Bu’tumi kasisakkanna tu to buda belanna Yesu.

⁴⁴Denmi pira la morai untingkanNi, apa tae’ bangi misa’ umpata’pai lima lako.

⁴⁵Sulemi tinde to disua lako pangulu to minaa sia to Farisi nakuami ungkuanni tinde to disua: Ma’apai anna tae’ mibaaI?

⁴⁶Nakuami mebali tu to disua: Tae’pa ia naden len tau ma’kada susitu tau ia tu.

⁴⁷Nakuami mebali tu to Farisi lako tinde tau: Napapusa dukamorokomika?

⁴⁸Denmoraka misa’ tu mintu’ pangulu ba’tu to Farisi umpatonganNi?

⁴⁹Ai’, tinde mati’ to buda tang unnissan Sukaran aluk, kenna ruaori tampak ropu!

⁵⁰Nakuami Nikodemus lako tinde tau, iamo misa’ sibaanna to Farisi, tu sae pirambongi’ lako Yesu:

⁵¹Umpasalaraka tau tu Sukaran alukta, ke tae’pi nadirangi tu natuntunna, sia tae’pa nadiissan tu napogau’na?

⁵²Mebalimi tu tau sia nakua ungkuanni: To Galilea dukarokoka pale’? Pemarangai sia tiroi, kumua tae’ ia misa’ nabi bu’tu dio mai Galilea.

⁵³Pantan sulemi lako banuanna.