Read Toraja-Sa'dan YOHANES 8 Bible Online

YOHANES 8 - Toraja-Sa'dan bible

YOHANES 8

²Tae’pa bongi Nasae pole’omo tama to’ Banua Kabusungan, nasangsaean tu to buda lako Kalena anNa unno’ko’ unnada’i, tu tau.

³Nabaami pandita Sura’ sia to Farisi tu baine misa’ tu nalambiran ma’gau’ sala, napabendanni lan tangnga-tangnga,

⁴sia nakua lako Yesu: O Guru, dilambiran te baine iate ma’gau’ sala.

⁵Napa’peannan Musa lan Sukaran aluk la untumbui batu tu baine susito. Apara Mikua?

⁶Ia sia napokadai te, la nanii untobaI, kumua anna kabu’tui tu la naninna umparapa’I. Apa tukku tu Yesu umpassurasan rakka’Na rokko padang.

⁷Apa tontong bang tinde mai tau mekutana, umbangunammi lindoNa sia Nakua lako tau iato mai: Minda-mindammi tu tang kasalan, iamo dolo umpa’nakki batu te baine.

⁸Tukku pole’omi sule massura’-sura’ rokko padang.

⁹Iatonna rangimi tu kada susito, sun-sun simisa’mi, randuk dio mai matua-tuanna; misa-misamira Yesu torro, na ia tinde baine bendan bangpa lan tangnga-tangnga.

¹⁰Iatonna umbangunammo lindoNa tu Yesu, Nakuami ungkuanni: E baine, umba siamira tu tau? Tae’ bangraka misa’ urra’ta’i kumua la diukungko?

¹¹Nakuami tinde baine: Moi misa’ tae’ duka, Puang. Nakuami Yesu: Aku te tae’ duka Kula urra’ta’i kumua la diukungko; laomoko, sia randuk te totemo da’mo mupogau’ kasalan.

¹²Ma’kada pole’omi Yesu lako tinde tau nakua: Akumote tu arrangna lino. Minda-minda unturu’Na’, tae’ nala lumingka lu lako lu dio mai lan malillinna, sangadinna la den arrang katuoan dio.

¹³Nakuami to Farisi lako: UngkatottongiKomi Kalemi, na tae’ natonganna tu Mikatottonginna.

¹⁴Mebalimi Yesu sia nakua ungkuanni: Moi angKu katottongi Kaleku, tonganna duka tu Kukatottonginna, belanna Kuissan, umba tu Kunii sae sia umba tu Kunii male, apa iatu kamu tae’ miissanni umba tu Kunii sae sia umba tu Kunii male.

¹⁵Kamu te inang mangra’ta’komi sitinaya tu mentolinona; na iate Aku te tae’ tau misa’ duka Kura’ta’ kara-karana.

¹⁶Apa moi angKu mangra’ta’, tongan tu pangra’ta’Ku, belanna tae’ na Aku manna, sangadinna sisolaNa’ tu Ambe’ ussuaNa’.

¹⁷Na lan duka Sukaran alukmi disura’ kumua, iamo manassa tu nakatottonginna tau da’dua.

¹⁸Akumote tu ungkatottongi Kaleku, sia iatu Ambe’ ussuaNa’, Ia dukamo ungkatottongiNa’.

¹⁹Nakuami tu tau lako: Umbara nii tu Ambe’Mi? Nakuami Yesu mebali: Tae’ mitandaiNa’, sia iatu Ambe’Ku tae’ duka mitandai. Iake mitandaiNa’, manassa mitandai duka tu Ambe’Ku.

²⁰Mintu’nate kada iate Napokada sikandappi’ inan patti doi’ pa’kamasean tonna marassan mangada’i lan Banua Kabusungan; na moi misa’ tau tae’ untingkanNi, belanna tae’pa nalambi’I attunna.

²¹Nakua pole’omi Yesu lako tau iato mai: Aku te la maleNa’, sia la midaka’Na’, sia la mate situangkomi kasalammi, apa iatu inan la Kunii male, tae’ mibelai ullambi’i.

²²Nakuami tu to Yahudi: La umpateiraka kaleNa? belanna Nakua: Iatu inan la Kunii male, tae’ mibelai ullambi’i?

²³Nakuami ungkuanni: Lu diongkomi kamu mai, na Aku te lu daoNa’ Aku mai; kamu te to lan mai te lino na Aku te tae’ Kuto lan mai te lino.

²⁴Iamoto angKu kua mati’ kumua, la mate situangkomi kasalammi, belanna iake tae’i mipatonganni kumua Akumote, la mate situangkomi kasalammi.

²⁵Nakuami tinde mai tau lako: Mindarokomi te? Nakuami Yesu ungkuanni tinde mai tau: Apara bua’Ku la ma’kadapa lako kalemi?

²⁶Buda tu apa la Kupokada sia Kupamanassa diona kamu, apa iatu To ussuaNa’ tongan. Na apa-apa tu Kurangi dio mai Kalena ia dukamo Kupokada lako issinna te lino.

²⁷Tae’mi natandai tinde mai tau, kumua iatu Napokadanna lako iamotu diona Ambe’.

²⁸Iamoto anNa kua Yesu lako tinde tau: Iammi mangkamo umpamadao Anak rampan dilino, maneri la miissan kumua Akumote, sia moi misa’ tae’ Kuma’inaanna kalena umpogau’i, sangadinna tumba tu NaadaranNa’ Ambe’Ku, susi dukamoto Kupokada.

²⁹Iatu To ussuaNa’ sirondongNa’. Tae’ NatampeNa’ misa-misa, belanna tontongNa’ umpogau’i tu Naporainna.

³⁰Iatonna ma’kada susito, budamo tau umpatonganNi.

³¹Nakuami Yesu ungkuanni tu to Yahudi umpatonganNi: Iake manda’i mipentoei tu kadangKu, manerokomi anak gurungKu tongan;

³²sia la mitandai tu kamanapparan na iamotu kamanapparan iato tu la ullessurangkomi.

³³Nakuami tinde tau lako: Kami te taruknakan Abraham, sia tae’pa kibelai mengkaunan len lako misa duka tau; matumbai amMi kua: Ammi lessu’?

³⁴Nakuami Yesu mebali lako tinde tau: Tonganna tongan Kukua mati’, minda-minda tu umpogau’ kasalan, iamo napokaunan kasalan.

³⁵Iatu kaunan tae’ natontong lan banua sae lakona, sangadinna iari tu anak muane tu tontong lan sae lakona.

³⁶Iake iatu Anak muane ullessurangkomi, manerokomi lessu’ tongan.

³⁷Kuissan kumua taruknakomi Abraham, apa undaka’komi lalan la umpateiNa’, belanna tae’ nala’ka’ lan penaammi tu kadangKu.

³⁸Aku te umpokadaNa’ apa mangka Kutiro dio Ambe’Ku; sia kamu umpogau’ apa mangka mirangi dio mai ambe’mi.

³⁹Nakuami mebali tinde tau lako: Abraham kami tu ambe’ki. Nakuami Yesu ungkuanni: Iake anaknakomi Abraham, pogau’ dukami tu napogau’na Abraham.

⁴⁰Apa totemo undaka’komi lalan la umpateiNa’, te To umpokadangkomi tonganna, tu Kuranginna dio mai Puang Matua; iate iannate tae’ ia napogau’i Abraham.

⁴¹Kamu te umpogau’komi penggauranna ambe’mi. Nakuami tinde tau lako: Tae’ra nadiona gau’ sala angki dadi. Misa’ri tu Ambe’ki, iamotu Puang Matua.

⁴²Nakuami Yesu ungkuanni: Iake Puang Matua Ambe’mi, manassa mikamali’Na’, belanna lu dioNa’ mai Puang Matua angKu sae indete; belanna tae’ angKu ma’inaanna kalena sae, sangadinna Ia ussuaNa’.

⁴³Ma’apari natae’ miissanni tu laoan kadangKu? Tu belanna tae’ miissanni umperangii te kadangKu.

⁴⁴Kamu te bu’tu diokomi mai ambe’mi deata bulituk, sia mintu’ tu kamoraianna ambe’mi mipeolai. Iamo papongko tolino tempon dio mai mulanna, tang unnola salunna, belanna tae’ kamanapparan dio kalena. Iake ma’kada mo’rangi, napasiolanan tu kedona umpokadai, belanna ia mo’rang, sia ambe’ kamo’rangan.

⁴⁵Apa Aku te, belanna umpokadaNa’ tonganna, anna tae’ mipatonganNa’.

⁴⁶Mindarokomi ma’din ungkanassaiNa’ diona kasalan? Iake umpokadaNa’ tonganna, ma’apai natae’ mipatonganNa’?

⁴⁷Minda-minda tu lu dao mai Puang Matua, ia dukamo umperangii kadanNa Puang Matua. Iamoto na tae’ mima’perangi, belanna tae’ milu dio mai Puang Matua.

⁴⁸Mebalimi tu to Yahudi sia nakua lako: Tang tongannaraka tu kipokada kumua to SamariaKomi sia natabaKomi deata masussuk?

⁴⁹Nakuami Yesu mebali: Tae’ Aku natamaiNa’ deata masussuk, apa umpangke’Na’ Ambe’Ku, ammi sa’saiNa’.

⁵⁰Aku te tae’ Kutuntunan kamala’biran Kaleku, apa den Ia Misa’ tu untuntunni sia mangra’ta’.

⁵¹Tonganna tongan Kukua mati’, iake denni tau ungkaritutui kadangKu, tae’ nala sikita len kamatean sae lakona.

⁵²Nakuami tu to Yahudi lako: Totemo kiissan pissanmo kumua natamaiKomi deata masussuk. Iatu Abraham sia mintu’ nabi mate nasangmo, ammi kuami kamu: iake denni tau ungkaritutui kadangku, tae’ nala sikita len kamatean sae lakona.

⁵³Kamuraka la ondong na iatu ambe’ki Abraham, tu mangkamo mate? sia mintu’na nabi mate nasangmo. Mindara la Mipasusian Kalemi?

⁵⁴Nakuami Yesu mebali: Iake la umpakala’bi’Na’ Kaleku, tae’ bua’na tu kamala’birangKu. Apa Ambe’Ku tu umpakala’bi’Na’, tu misanga iamo Puangmi.

⁵⁵Tae’ kamu mitandai, apa Aku Kutandai. Iake Kukua kumua, tae’ Kutandai, manassa susi bangsiaNa’ kamu mo’rang; apa Kutandai Aku sia Kukaritutui tu kadanNa.

⁵⁶Iatu Abraham ambe’mi sende sia mamali’ penaanna la untiroi tu alloKu; natiromo naparannu penaanna.

⁵⁷Nakuami tu to Yahudi ungkuanNi: Tae’ bangsia nalambi’i limangpulo taunna dadimMi, amMi la ungkitaomo Abraham?

⁵⁸Nakuami Yesu uangkuanni: Tonganna tongan Kukua mati’: Tae’pa naden tu Abraham, angKu inang Denmo.

⁵⁹Pada unnalami batu la morai untumbui batu, apa mentirerung tu Yesu Nasun lan mai Banua Kabusungan.