Read Toraja-Sa'dan YOHANES 9 Bible Online

YOHANES 9 - Toraja-Sa'dan bible

YOHANES 9

¹Iatonna lendu’, Nakitami tu tau misa’ buta tempon dio mai dadinna.

²Mekutanami tu anak gurunNa lako nakua: O Rabi, mindannara tu umpogau’ kasalan: iaraka te taute ba’tu indo’ ambe’naraka, naurunganni buta tempon dio mai dadinna?

³Nakuami Yesu mebali: Tae’ ia na iate tau te umpogau’ kasalan; sia tae’ ia na to matuanna, sangadinna kumua anna payan dio kalena tu penggauranNa Puang Matua.

⁴Ke masiang siapi sipatuki’ la ungkarangi tu pengkaranganNa tu To ussuaNa’. Belanna la sae tu bongi to ke tae’mi tau misa’ ma’din mengkarang.

⁵Iake lanPa’ te lino, Akumo tu arrangna lino.

⁶Iatonna pokadai to, mettudumi rokko padang, Nalelo’i elo’Na tu litak, Nasapuranni matanna tinde to buta,

⁷sia Nakua ungkuanni: Laomoko umbasei lako limbong Siloam!, ke dipallemba’i battuananna: Disua. Laomi nabasei, nasule millikmo matanna.

⁸Nakuami sangtondokna sia iatu mai to untiroi dolona tonna kapalaku-laku: Tang iamoraka te tu unno’ko’ bang kapalaku-laku?

⁹Denmi tu tau kumua: Iamora te. Den pole’o tu kumua: Tangia, sirupari. Ia kalenami kumua: Akumote.

¹⁰Nakuami tu tau lako: Naumba dipakuanni anna millikmo tu matammu?

¹¹Nakuami mebali: Den tau misa’ disanga Yesu ullelo’i litak, nasapuranni matangku sia Nakua: Laomoko umbasei lako limbong Siloam. Laomo’ umbasei lako, angku pakita.

¹²Nakuami tu tau lako: Umbamira tu tau iato? Nakuami mebali: Tae’ kuissanni.

¹³Nabaami tau lako to Farisi tinde to buta pakitamo.

¹⁴Iato allo iato allo katorroan tonna lelo’i Yesu litak Napamillikki tu matanna.

¹⁵Mekutana pole’omi tu to Farisi lako kumua umba nakua anna pakita. Nakuami mebali lako: Napalakoi losso’ pitti’ tu matangku, kubasei angku pakita.

¹⁶Nakuami tu to Farisi pira: Tangia To lu dio mai Puang Matua tu Tau iato, belanna tae’ Naturu’ atoranna allo katorroan. Den pole’o tu kumua: Ma’apai tu to kasalan nala ma’din umpogau’i tu tanda kalle-kallean susito? Sita’genmi tinde tau.

¹⁷Iamoto anna mekutana lako tinde to buta nakua: Tumbara duka kadammu tu Tau iato, apa mangkamo umpamillik matammu? Nakuami mebali: Inang nabi Ia.

¹⁸Tae’mi napatonganni to Yahudi, to kumua buta dolona, na totemo pakitamo tu matanna, sae lako natambainna tu indo’ ambe’na tinde to pakitamo,

¹⁹anna mekutana lako nakua: Iamoraka te tu anakmi tu mikua buta tempon dio mai dadinna? Ma’patumbai anna pakitamo totemo?

²⁰Mebalimi tu indo’ ambe’na nakua: Kitandai kumua iamo anakki te, sia inang buta tempon dio mai dadinna;

²¹apa tumbai anna pakitamo totemo, tae’ kami kiissanni, ba’tu minda umpamillikki tu matanna tae’ duka kami kiissanni. Kutanai ia lako, nakasalle siamo, tang la iaparaka ia umpokadai tu kalena.

²²Ia sia napokadai indo’ ambe’na susito, apa mataku’ lako to Yahudi; belanna nasituru’imo to Yahudi kumua, ianna den tau unnakuI kumua Mesias, la ditassu’i lan mai banua pa’kombongan tu tau iato.

²³Iamoto anna kua tu indo’ ambe’na: kasalle siamo ia, kutanai ia lako.

²⁴Natambai pole’omi tinde to buta pakitamo, sia nakua ungkuanni: Pangke’I tu Puang Matua! Kami te kiissan kumua to kasalan tu.

²⁵Nakuami mebali: Ba’tu to kasalanni Ia tae’ aku kuissan, samari aku kuissan kumua: dolona butana’, na totemo pakitamo’.

²⁶Nakua pole’omi tinde tau lako: Napatumbaroko? Umbara Nakua umpamillikki tu matammu?

²⁷Nakuami mebali lako: Mangkamokomi kupokadan, apa tae’ra pale’ miperangii. Ma’apai ammi la moraiomo la umperangii? La morai dukarokomika dadi anak gurunNa?

²⁸Nado’do-do’domi sia nakua: Iko iko tu anak gurunNa, anna iate kami anak gurunnakan kami Musa.

²⁹Kiissan kumua mangkamo tu Puang Matua ma’kada lako Musa; apa iate tau iate, tae’ kami kiissan ba’tu umba Ia Nanii sae.

³⁰Nakuami tinde tau mebali lako: Memangngan tongan iato, tae’ miissanni Nanii sae, anNa mangkamo umpamillik matangku.

³¹Taissan kumua tae’ Naperangii Puang Matua tu passambayangna to umpogau’ kasalan, iari ia tu to umpengkara’pai sia umpogau’ pa’poraianNa tu Naperangii.

³²Temponna dio mai tae’pa ia naden len dirangi tu tau umpamillik mata to buta tempon dadinna.

³³Iake la tae’I nalu dio mai Puang Matua tu Tau iato, moi misa’ apa tae’ Nakullei umpogau’i.

³⁴Mebalimi tu tau sia nakua ungkuanni: Iko iko te inang nakapu’ bangmoko kasalan mudadi, na iko lenno la unnada’ikan! Nasualemi tau lako salian.

³⁵Narangimi Yesu kumua nasuale tau lako salian tu tau iato, Nakuami ungkuanni tonna sikita: Mupatonganraka tu AnakNa Puang Matua?

³⁶Mebalimi tinde tau nakua: Mindara to, Puang, angku patonganNi?

³⁷Nakuami Yesu lako: Mukitamo, sia Ia bangsiamo tu musipa’kadan.

³⁸Nakuami: O Puang kupatongan. Natukku umpennoloi.

³⁹Nakuami Yesu: Iatu kasaeangKu tama te lino, belanna diona kapangukungan, kumua anna pakita tu to tang pakita, sia buta tu to pakita.

⁴⁰Denmi ba’tu pira-pira tu to Farisi Nasirondongan urrangii te kada iate, nakuami lako: Buta dukarakannika?

⁴¹Nakuami Yesu ungkuanni: Iakemmi buta, tae’ ammi kasalan; apa belanna mikua: pakitakan, iamoto anna tontong tu kasalammi.