Read Toraja-Sa'dan PENGGAURANNA RASULU’ 10 Bible Online

PENGGAURANNA RASULU’ 10 - Toraja-Sa'dan bible

PENGGAURANNA RASULU’ 10

¹Den tau misa’ dio Kaisarea disanga Kornelius, pangulunna kaponan surodadu, tu disangai kaponan Italia.

²Iato tau iato umpengkaolai sia ungkasiri’ Puang Matua sola mintu’ to lan banuanna, umpa’bengan buda pa’kamase lako tau, sia tontong massambayang langngan Puang Matua.

³Umbai agi-agi te’te’ tallu makaroen napemanassami nakita bayo-bayo tu malaeka’Na Puang Matua misa’ sae umpelambi’i sia ma’kada lako nakua: E Kornelius!

⁴Lendu’mi mataku’na mentiro lako malaeka’ sia nakua: Apara mitungkanan, Puang? Nakuami lako: Mintu’na passambayangmu sia pa’kamasemu rampomo langngan Puang Matua sia Napengkilalai.

⁵Dadi totemo suai tau lako Yope sia popetambai tu to disanga Simon, tu diganti Petrus.

⁶Torro dio banuanna to mantasi balulang disanga Simon; sikandappi’ randan tasik tu banuanna.

⁷Iatonna pa’demo tu malaeka’ nasipa’kadan, natambaimi da’dua tu kaunanna, namisa’ surodadu umpengkaolai Puang Matua, lan mai tu to biasa umparakai;

⁸naulelean nasangi lako tu mintu’nato, anna suai lako Yope.

⁹Masiang dio maito tonna diopa lu lalan sia urreke’mo tondok iato kendekmi tu Petrus langngan bubungan massambayang, agi-agi te’te’ sangpulo dua tangnga allo.

¹⁰Tangdia’mi sia la morai kumande; apa marassanmo naposara’ tau tu kande, senga’mi tu pentirona.

¹¹Nakitami tu langi’ tibungka’, namengkalao dao mai tu apa misa’, susito sampin kalua’, diulangi a’pa’ tu tetukna natirorro’ sae rokko padang.

¹²Mintu’ olo’-olo’ a’pa’ lette’na den lan sia iatu mai mendonglo’ dao lu padang, sia manuk-manuk dao lu langi’.

¹³Saemi gamara ma’kada lako nakua: E, Petrus, ke’de’ko, mutunui, mukandei!

¹⁴Apa nakua Petrus: Da’ maro’ ia to Puang, belanna tae’ bangpa kukandei tu pemalinna dikande sia megi’giranna.

¹⁵Sae pole’omi tu gamara ma’penduan lako kalena kumua: Iatu tang Napa’pemalinna Puang Matua da mupa’pemalii.

¹⁶Pentallun sidanu’ susito, nata’pa tiangka’ sule langngan langi’ tu sampin iato.

¹⁷Pussak bangsia penaanna tu Petrus untangnga’i battuananna tu natirona, pakalan diomi to’ ba’ba ke’de’ tu to nasua Kornelius, umpekutanan banuanna Simon,

¹⁸anna kambaro sia mekutana kumua ba’tu torro dioi tu Simon, diganti Petrus.

¹⁹Marassan bangsia Petrus untangnga’i tu natirona, Nakuami Penaa ungkuanni: Tiromi, den tau tallu undaka’ko.

²⁰Ke’de’moko mumengkalao, mumale sola tu tau, da’ mubata, belanna Aku ussuai tu tau.

²¹Mengkalaomi tu Petrus umpessitammui tu tau, sia nakua: Akumote tu midaka’. Apara tu mitungkanan sae?

²²Nakuami tinde tau: Na tu Kornelius, pangulunna kaponan surodadu, iamo misa’ to malambu’ sia ungkataku’ Puang Matua sia napokada melo mintu’ to Yahudi, Napatudumo Puang Matua naparampo malaeka’ madatu untambaikomi lako banuanna la umperangii tu kadammi.

²³Natambaimi tinde tau tama natoratui. Iatonna masiangto ke’de’mi namale sola tinde tau, sia ba’tu pira-pira tu to nasangsiuluran dio mai Yope undi unturu’i.

²⁴Iatonna masiang pole’to, rampomi lako Kaisarea. Napeagi bangmi Kornelius tonna mangkamo urrampunni tu sangdadianna sia sangmane karra’na.

²⁵Iatonna tamamo tu Petrus, saemi Kornelius untammui sia malinguntu’ diong to’ lentekna umpennoloi.

²⁶Apa natoe Petrus diong mai, nakua: Ke’de’komi, aku te tolino dukana’.

²⁷Malemi tama sipa’kada-kada, nakarampoi inang budamo tau sirampun.

²⁸Nakuami Petrus ungkuanni tu tau: Miissan kumua tae’ nama’din misa’ to Yahudi sikadamak ba’tu sirau-rau bangsa senga’; apa Napatudumo’ Puang Matua kumua da naden tau misa’ kupa’pemalii ba’tu kukagi’gi’.

²⁹Iamoto anna tae’ kupomatana’i sae, tongku ditambai. Dadi totemo la mekutanana’: ma’apari mitambaina’.

³⁰Nakuami Kornelius: Dikua patang bongi’, susimo allo to, te’te’ tallu makaroen, angku massambayang lan banuangku; pakalan denmi tau misa’ ke’de’ dio tingayoku ma’pakean pandillak-dillak,

³¹nakua: E, Kornelius, ditarimamo tu passambayangmu, sia Napengkilalai Puang Matua tu pa’kamaseammu.

³²Dadi suai tau lako Yope sia popetambai tu to disanga Simon, tu diganti Petrus; torro dio banuanna to mantasi balulang, sikandappi’ randan tasik.

³³Iamoto kusua tu tau untambaikomi; kurre sumanga’na misaemo. Iamoto angki dio nasang ren indete totemo dio oloNa Puang Matua la umperangii tu mintu’ apa Napepasanan Puang lako kalemi.

³⁴Ma’kadami tu Petrus nakua: Tonganna tongan manassamo lako kaleku, kumua tae’ Namentiro lindo lako tau tu Puang Matua,

³⁵sangadinna lan mai mintu’na bangsa minda-minda tu ungkataku’i sia umpogau’ kamaloloan, iamo Naporai.

³⁶Iamoto tu kada Naparampo lako to Israel tonna umpa’peissanan Kareba-kaparannuan, kumua den kasikaeloan tete dio Yesu Kristus; Iamo Puangna angge maritik.

³⁷Miisanmo tu apa dadi lan lili’na Yudea, tempon dio mai Galilea, tu undinna na iatu pa’dioran napa’peissanan Yohanes,

³⁸tu diona Yesu to Nazaret, umba nakua Puang Matua mangka untokkoI Penaa Masallo’ sia kamatotoran. Tu male lumiling umpogau’ kameloan, sia umpamatana mintu’ to nasakkolo’ deata bulituk; tu belanna Narondong Puang Matua.

³⁹Na kami ungkatottongi tu mintu’ apa Napogau’, la dio tana Yahudi la dio Yerusalem; Iamotu napatei tau naa’ta’ lako kayu.

⁴⁰Iamotu Napamalimbangun Puang Matua tonna allo ma’pentallun, sia umpa’pekitanan Kalena situru’ pangeloranNa Puang Matua,

⁴¹tae’ kumua lako mintu’ to Yahudi, sangadinna lako to ungkatottongi tu inang Napilei dolomo Puang Matua, iamotu kaminna mangkanna ussisolanNi kumande sia mangiru’ tonNa malimbangunmo dio mai to’ to mate;

⁴²Napa’peannanni lako kaleki la umpa’peissananni lako to Israel, sia ungkatottongi kumua Iamo Napamanassa Puang Matua dadi to mangra’ta’na mintu’ to tuo sia to mate.

⁴³Iatu diona Ia nakatottongi mintu’ nabi, kumua minda-minda umpatonganNi unnappa’ kadipa’deian kasalan tete dio sanganNa.

⁴⁴Marassanmo napokada Petrus tu kada iato, Nasonglo’ tu Penaa Masallo’ lako mintu’ to urrangii tu kada iato.

⁴⁵Mintu’na tu to ma’patongan, tu unturu’ aluk sunna’, tu saena sola Petrus, lendu’ mangngana, belanna dipasonglo’ duka sia dipa’kamasean tu Penaa Masallo’ lako to kapere’.

⁴⁶Belanna narangi tinde tau ma’kada-kada umpobasa ma’rupa-rupa basa sia umpakala’bi Puang Matua. Ma’kada pole’omi Petrus nakua:

⁴⁷Ma’dinraka misa’ tau la umpadapai tu uai, ke didio’i tu to untarimamo Penaa Masallo’ susite kami?

⁴⁸Napesuammi undio’i tu tau tama sanganNa Yesu Kristus. Anna palakui tinde tau tu Petrus torro dio ba’tu pirang-pirang allo.