Read Toraja-Sa'dan PENGGAURANNA RASULU’ 12 Bible Online

PENGGAURANNA RASULU’ 12 - Toraja-Sa'dan bible

PENGGAURANNA RASULU’ 12

¹Agi-agi attu iamoto anna mesua datu Herodes umpata’pai lima ba’tu pira-pira to lan kombongan la morai umpakario-rioi.

²Napateimi tu Yakobus, siulu’na Yohanes, napakandei la’bo’.

³Iatonna tiroi kumua napomarannu to Yahudi to iannato, natingkanomi tu Petrus, siappa’ allo kapua dinii ungkande roti tang diragii.

⁴Iatonna tingkanni, napatamami pa’tarungkuan sia nasorong lako sangpulo annan surodadu ungkampai sisonda sia’pa’-a’pa’, nasanga la napopennolo lako to buda ke lendu’i pa’gauran Pasa.

⁵Iamoto anna dikurung tu Petrus lan pa’tarungkuan, apa napengkamoya-moyan tongan kombongan napassam- bayangan.

⁶Iatonna la umpennoloi Herodes, ia bangsimo to bongi iato, marassanmo tu Petrus mamma’, napetangnga da’dua surodadu, dirante bassi da’dua sia den ba’tu pira-pira to ma’ronda’na dio to’ ba’ba ungkampai tu pa’tarungkuan,

⁷pakalan nabendanmo misa’ malaeka’Na Puang inde to dio, sia den arrang parrang lan bilik iato; nasa’pa-sa’pami tu la’pekna Petrus sia natundan nakua: Millikko madomi’! Tobangmi tu rantena lan mai limanna.

⁸Nakuami tinde malaeka’ ungkuanni: Ma’tambeke’ko mupatamai tu lapik lentekmu. Napogau’mi susito, Nakuami ungkuanni: Pelluangi tu sambu’mu, muundi urrundu’na’!

⁹Sunmi naundi urrundu’i, apa tae’ naissan tu napogau’na tinde malaeka’ kumua tonganna, sangadinna nasanga bangri bayo-bayo nakita.

¹⁰Iatonna lendu’imi tu ronda’ bunga’na sia ma’penduanna, rampomi sola duai, lako to’ ba’ba bassi lu tama tondok; tibungka’ kalenami tu ba’ba iato anna sun sia unnolai misa’ batatta, pakalan nata’pa pa’demo natiro tu malaeka’.

¹¹Iatonna mengkilalamo tu Petrus, nakuami: Totemo manassamo kuissan kumua Puang ussua malaeka’Na urrampananna’ dio mai limanna Herodes sia dio mai mintu’ lalan penaanna to Yahudi.

¹²Iatonna mangka untangnga’i tu iannato, malemi lako banuanna Maria, indo’na Yohanes, tu diganti Markus; inde to dio den tau buda sirampun marassan massambayang.

¹³Iatonna tumbekki tu ba’ba salian, saemi misa’ baine ruranan disanga Rode la umperangii.

¹⁴Iatonna tandaimi tu gamaranna Petrus, tae’mi nadadi umbungka’i tu ba’ba belanna kaparannuanna, sangadinna male tama ma’dondo lao umpapeissananni, kumua Petrus dio to’ ba’ba.

¹⁵Nakuami tu tau ungkuanni: Umbai bomboangko! Apa napatonganna tongan tinde baine ungkatottongi, kumua tonganna te. Nakuami tu tau: Malaeka’na ria tu.

¹⁶Apa tae’ bang natorroi tu Petrus ma’tumbek-tumbek; iatonna bungka’i tinde tau tu ba’ba, nakitami sia lendu’ tirambanna.

¹⁷Napopangimbami tu limanna, ussuai ma’loko-loko, anna uleleananni lako tau iato mai umba Nakua Puang ussolanni sun lan mai pa’tarungkuan, sia nakua: Pa’peissananni te iannate lako Yakobus sia lako sangsiuluranta. Sunmi namale lako tondok senga’.

¹⁸Iatonna masiang dio mai, tangia mannamo ia inang sidi’ tu kamarekoanna surodadu, kumua ma’patumbai tu Petrus.

¹⁹Iatonna daka’mi Herodes tu Petrus natae’ nakabu’tui, naparessami tu mai surodadu ma’ronda’, napesuanni umpatei. Nake’de’ dio mai tana Yudea lako Kaisarea natorro dio.

²⁰La moraimi Herodes urrarii tu to Tirus na to Sidon; apa sama turu’ tinde tau nasae umpennoloi. Iatonna randukmo siporai Blastus, pa’bisaranna datu, umpalakumi kasitaman, belanna iatu tondokna diori mai tondokna datu nanii urrannuan kande.

²¹Den pissan allo inang dipamanassamo, naumpake pakean kadatuanna tu Herodes, naunno’ko’ dao isungan kapayunganna sia ma’kada lako tau.

²²Ra’banmi tu to buda ma’kada lako nakua: Deata ia te ma’kada, tangia tolino.

²³Ta’pa napa’tongmi malaeka’Na Puang tu Herodes, belanna tang umbilang Puang Matua, Nakandemi ulli’ namate.

²⁴Sarorak-roraknami tu kadanNa Puang Matua.

²⁵Sulemi tu Barnabas sola Saulus dio mai Yerusalem tonna mangka umpogau’i tu pentoean pa’tulung, sia nasolan tu Yohanes diganti Markus.