Read Toraja-Sa'dan PENGGAURANNA RASULU’ 13 Bible Online

PENGGAURANNA RASULU’ 13 - Toraja-Sa'dan bible

PENGGAURANNA RASULU’ 13

¹Denmi ba’tu pira-pira nabi sia guru lan kombongan dio Antiokhia, iamotu mai sia Barnabas sia Simeon diganti Niger, sia Lukius to Kirene sia Menahem, siulu’ bali susunna Herodes, datu sangtepona tondok, na Saulus.

²Matangngamo tinde tau umpogau’ kamenomban langngan Puang sia ma’puasa, Nakuami Penaa Masallo’: PamarimbanganNa’ tu Barnabas sola Saulus, anna pogau’i tu pentoean Kupapatuanni.

³Ma’puasami tinde tau sia massambayang, anna remme’i limanna, anna eloranni male.

⁴Iatonna suami Penaa Masallo’ malemi sola duai rokko Seleukia, na inde to dio mai namale massombaran lako Siprus.

⁵Iatonna sae lako Salamis umpa’peissanammi kadanNa Puang Matua lan lu banua pa’kombonganna to Yahudi; iatu Yohanes sisola duka tinde tau butung to ma’parakana.

⁶Tonna salongi nasangmi tinde tau tu lebukan iato sae lako Pafos, ungkabu’tuimi misa’ to balik mata, iamo misa’ nabi tang tongan, to Yahudi, disanga Baryesu,

⁷sikaloli’ Sergius Paulus, to maraanna tondok iato, to manarang. Iamoto tu untambai Barnabas sola Saulus, la umperangii tu kadanNa Puang Matua.

⁸Apa ia tinde Elimas, tu to balik mata, belanna susimoto tu sanganna ke dipallemba’i, napangeai tinde tau la morai umpopemboko’i tu to maraa dio mai kapatonganan.

⁹Apa iatu Saulus, tu disanga duka Paulus, Naponnoi Penaa Masallo’ ullessekki mata,

¹⁰sia nakua: E iko te to ponno tangnga’ kadake sia kabulitukan, anak deata bulituk, ualinna mintu’ kamaloloan! tae’raka mula morai untorroi umpakelokki tu lalan maloloNa Puang?

¹¹Tiromi, totemo bangsiamote anna lambi’ko limanNa Puang, ammu buta, tae’ mula untiro allo ba’tu sangapa-apa. Ta’pa narampoimi kamaraunan sia kamalillinan, naurunganni kakaririk-ririk bang undaka’ to la urrenden limanna.

¹²Iatonna kitami to maraa tu apa dadi, ma’patonganmi, sia lendu’ napomangngana tu pangadaran diona Puang.

¹³Malemi tu Paulus sola tu to nasikaloliran massombaran dio mai Pafos nasae lako Perga dio tana Pamfilia. Messarakmi tu Yohanes dio mai tinde tau, nasule lako Yerusalem.

¹⁴Apa ia tinde tau male tarru’ dio mai Perga narampo lako Antiokhia dio tana Pisidia; tamami banua pa’kombongan tonna allo katorroan, anna unno’ko’.

¹⁵Iatonna mangkamo umbasanni tu sura’ Sukaran aluk sia sura’na nabi, mesuami tu mai pangulu banua pa’kombongan lako tinde tau sola duai umpokadai kumua: kamu te siulu’ki, iake denni tu kada la mipa’pakilalan lako te to buda, pokadami.

¹⁶Ke’de’mi tu Paulus umpopangimba limanna sia ma’kada nakua: E, to Israel sia kamu tu ungkataku’na Puang Matua! perangiimi!

¹⁷Puang Matua, Puangna te to Israel, mangka untonno’i tu nene’ to dolota, sia umpakalangka’i tu to ma’rapu iato tonna mempue dio Mesir, anNa tassu’i dio mai Nadoloan kuasa kalle-kalleanNa.

¹⁸Agi-agi patangpulo taunna Nanii umpama’tananni penaa tu pasiruanna tu tau dio padang pangallaran.

¹⁹Iatonna mangkamo ummangsanni tu tau pitu bangsana dio tana Kanaan, nataa-taanni tu padangna napomana’i tinde tau,

²⁰agi-agi a’pa’ratu’ llimangpulo taunna. Undinnato napadenmi ba’tu pira-pira tu to parengnge’ sae lako tonna linona nabi Samuel.

²¹Undinnato umpalakumi datu, anna benni Puang Matua tu Saul anakna Kish, iamo misa’ to ma’suku dio mai Benyamin, patangpulo taunna.

²²Iatonna sayumi Puang Matua, Napabendanan pole’mi tu Daud la napodatu; Napamanassami diona Daud, sia Nakua: Kukabu’tuimo tu Daud, anakna Isai, iamoto naala penaangKu, iamo la umpogau’ mintu’ pa’poraiangKu.

²³Iamotu tarukna Daud, Nanii Puang Matua umpabu’tuanni to Israel tu To pakarimmanan, susitu Naallu’, Iamotu Yesu.

²⁴Dolona na iatu kasaeanNa mangada’i, inang napa’pangadarammo Yohanes tu kadidioran tanda pengkatobaran lako mintu’ to Israel.

²⁵Iatonna mukkun tu Yohanes umpasirundunan pentoeanna, ma’kadami nakua: Mindara misanganna’? Tangia aku te, apa manassa den Misa’ tu la sae undinna na aku, moi umbukai ulang lapik lentekNa tang sipatu dukana’ umbukai.

²⁶Kamu tu siulu’ki, tarukna Abraham sia mintu’mi tu ungkataku’Na Puang Matua, diparampomo lako kaleta tu kareba-kamakarimmanan iate.

²⁷Belanna iatu to dio Yerusalem sola tu mai pangulunna, tae’ natandai tu Yesu, sia naukung na susito nasundunnimo tu kadanna nabi tu dibasanni ke allo katorroanomi.

²⁸Sia moi tae’ nakabu’tui tu sipato’na la dinii umpatei, apa napalaku lako Pilatus kumua anNa dipatei.

²⁹Iatonna mangkamo ussundunni tu mintu’na apa disura’ diona Yesu, napopengkalaomi dao mai kayu pea’ta’, napeliangI.

³⁰Apa Napamalimbangun Puang Matua dio mai to’ to mate.

³¹Umpa’pekitanammi Kalena ba’tu pira-pira allona lako to lu dio mai Galilea nasolan male langngan Yerusalem na (totemo) iamotu tau iato ungkatottongi lako te to buda.

³²Na kami te umpa’peissananni lako kalemi tu Kareba-kaparannuan, iamotu pangallu’ dialluran nene’ to dolota,

³³kumua Nasundunnimo Puang Matua lako tarukta diona kaumpamalimbangunanna Yesu, ten dukamoto tu disura’ lan sura’ Pa’pudian ma’penduanna nakua: Ikomo tu AnakKu, allo ia bangsiamote angKu dadiangKo.

³⁴Na iatu kaNapamalimbangunanna Puang Matua dio mai to’ to mate, kumua da Naburuk sule, iamoto anNa ma’kada kumua: La Kupa’kamasean lako kalemi tu kamauparanna Daud, tu maindan sia matappa’.

³⁵Ia dukamo patunna to anNa ma’kada lan Pa’pudian senga’ kumua: Tae’ Mieloranni tu To maseroMi la buruk.

³⁶Belanna iatonna mangkamo Daud umpogau’ pa’poraianNa Puang Matua tonna linona, matemi anna dipeliang dio sa’dena nene’ to dolona, naburuk.

³⁷Apa iatu To Napamalimbangun Puang Matua, tae’ Naburuk.

³⁸Iamoto la miisan e kamu siulu’ki, kumua Tau iamora te tu napotete anna dipa’peissanan lako kalemi tu kadipa’deian kasalan,

³⁹sia Ia duka napotete, anna minda-minda tu ma’patongan dipamasero dio mai mintu’na, tu tang nabelammi napamasero sukaran alukna Musa.

⁴⁰Iamoto dadi pengkilalai tonganni, da anna rampoikomi susi tu disura’na lan sura’na nabi, tu nakua:

⁴¹Tiromi, e kamu to pasa’san, mangngakomi sia sabu’komi; belanna iatonna linomi umpogau’Na’ misa’ penggauran, tu penggauran tae’ mipatongan lenni moi anna pokadangkomi tau.

⁴²Iatonna sunmo napengkali-kali tonganmi tau napalaku kumua anna dipokadan tu kada iato ke allo katorroan la sae.

⁴³Iatonna sisarak-sarakmo tu to sirampun, budami to Yahudi sia to Yahudi dipasada’ tu umpengkaolainNa Puang Matua, undi urrundu’ Paulus sola Barnabas, tu to ungkuanni sia unnada’i kumua namanda’ lan pa’kamaseanNa Puang Matua.

⁴⁴Tonna lambi’i tu allo katorroan iato, kari’ la mintu’ to lan tondok iato sirampun umperangii kadanNa Puang Matua.

⁴⁵Apa iatonna tiroi to Yahudi tu to buda, lendu’mi mabiri’na, sia umbali kadanna Paulus sia napokada kadake.

⁴⁶Apa batta’ tu Paulus sola Barnabas ma’kada nakua: Sipatu kamu la dolo dipokadan tu kadanNa Puang Matua, apa belanna mitumpu sia misanga tang sipatu katuoan sae lakona tu kalemi, angki lu lako kami to kapere’.

⁴⁷Apa Napepasanan Puang lako kaleki, Nakua: Kupopendadimokomi arrang lako mintu’ to kapere’, ammi pasae kamakarimmanan sae lako randanna langi’.

⁴⁸Iatu mai to kapere’ urrangii tu iannato, parannu sia umpakala’bi’ kadanNa Puang Matua sia padami tau dilampak la ungkabu’tui katuoan sae lakona, ia dukamo ma’patongan.

⁴⁹Dipakaleleammi tu kadanNa Puang Matua lan mintu’ parenta iato.

⁵⁰Apa napakulu-kulu to Yahudi tu mai mintu’ baine mala’bi’ umpengkaolai Puang Matua sia iatu mai to kapua lan tondok iato, napakitai kadipakario-rioan tu Paulus sola Barnabas, naali’i lan mai parentana.

⁵¹Napentambakammi tinde rasulu’ tu barra’-barra’ le’ke dio pala’ lentekna, tanda sa’bi salana tu tau, anna male lako Ikonium.

⁵²Naponnoimi kaparannuan sia Penaa Masallo’ tinde to menturu’.