Read Toraja-Sa'dan PENGGAURANNA RASULU’ 14 Bible Online

PENGGAURANNA RASULU’ 14 - Toraja-Sa'dan bible

PENGGAURANNA RASULU’ 14

¹Ten dukato dio Ikonium lao tinde rasulu’ sola duai tama banua pa’kombonganna to Yahudi sia ma’kada susito, naurunganni buda tongan to Yahudi sia to Grika ma’patongan.

²Apa iatu mai to Yahudi tang ma’patongan napakulu-kulu sia nasarrang tu to kapere’ unneai tu to sang- siuluran.

³Iamoto anna torro ba’tu sangapa-apa inde to dio, tu mai rasulu’ sia batta’ ma’kada belanna sande’ lako Puang untonganan kada pa’kamaseanNa, sia umpaden tanda kalle-kallean sia tanda mangnga tu napaombo’ limanna tinde tau.

⁴Tipa’duami tu mintu’ tau lan tondok iato, sangtaanna menturu’ lako to Yahudi, na iatu pira menturu’ lako tu mai rasulu’.

⁵Iatonna maramba to kapere’ na to Yahudi sola pangulunna la umpakario-rioi sia untumbui batu,

⁶anna issanni tinde tau sola duai, mallaimi lako Listra sia lako Derbe dio tana Likaonia sia dio lu lili’na tiku lao.

⁷Indemoto dio nanii umpa’peissananni tu Kareba-kaparannuan.

⁸Denmi dio Listra misa’ tau unno’ko’ bang; langga’ tu lette’na, to kupi’ natuang lan mai tambukna indo’na, tae bangpa nalumingka len.

⁹Naperangii bangmi tinde tau tu Paulus ma’kada, napemarangai Paulus sia natiro kumua den kapatonganan dio, tu ma’din la dinii umpamalekei,

¹⁰nakuami tu Paulus umpemandui gamaranna: Ke’de’ko, mumalolo bendan. Mekkondongmi nata’pa male lumingka.

¹¹Iatonna tiroi to buda tu penggauranna Paulus, napemanduimi tu gamaranna ma’kada ma’basa Likaonia, nakua: Songlo’mo lako kaleta tu mai deata mentolino.

¹²Nagantimi Zeus tu Barnabas, apa iatu Paulus naganti Hermes, belanna iamotu ma’kada-kada.

¹³Saemi tu to minaanna Zeus, tu untingoi tondok iato tu banua deatanna, umbaai lako to’ babangan tondok tu mai tedong sapi sia bunga-bunga diampinni’, la memala’ sola to buda.

¹⁴Apa iatonna rangii tinde rasulu’ sola duai tu iannato, iamotu Barnabas sola Paulus, usse’bu-se’bumi sambu’na sia male ma’dondo-dondo tama to’ to buda sia metamba-tamba.

¹⁵Nakua: E tau, ma’apari ammi pogau’ri te iannate? Kami te tolino duka bangsiakan susi kamu, sia umpa’peissanangkan Kareba-kaparannuan lako kalemi, kumua ammi memboko’ dio mai apa tae’ bua’na ammi lu lako Puang Matua matontongan, tu umpadadi langi’ sia lino sia tasik na mintu’ issinna.

¹⁶Iamotu umpopa’elo’na mintu to kapere’ unturu’ lalan pa’poraianna lan lino diboko’imo,

¹⁷moi anNa umpa’pepayanan Kalena umpogau’ kameloan, sia umpasaeangkomi uran dao mai langi’ sia pentaunan sebona bura padang sia Napabossai kande sia kaparannuan tu penaammi.

¹⁸Moi na iate kada iate, masussa dukapa tu rasulu’ unggagai tu to buda umpemala’i.

¹⁹Apa pakalan nasaemo ba’tu pira-pira to Yahudi dio mai Antiokhia sia dio mai Ikonium umpabalik penaanna to buda, anna tumbui batu tu Paulus, sia nariu’ lako salian tondok nasanga matemo.

²⁰Apa iatonna ke’de’ tu mai to menturu’ untalimbung tamai, malimbangunmi namale tama tondok, na iatonna masiangto, sunmi namale sola Barnabas lako Derbe.

²¹Iatonna pa’peissanammi tu Kareba-kaparannuan lako to lan tondok iato sia ba’tu pira-piramo tu tau napadadi to menturu’, sulemi lako Listra sia lako Ikonium sia lako Antiokhia,

²²na umpabatta’ penaanna to menturu’ sia napakilala kumua anna manda’ lan kapatonganan, nakua: tae’ nasalai tang buda kamaparrisan umpatuki’ tu tama ParentaNa Puang Matua.

²³Iatonna mangkamo umpamanassanni tu mai penatuanna ke misa’oi kombongan, namassambayang sia ma’puasa, nasorongmi tu tau lako Puang napatongan.

²⁴Iatonna upu’mo ussalongi tana Pisidia, saemi sola duai lako tana Pamfilia.

²⁵Napa’peissanammi tu kadanNa Puang Matua dio Perga, namane male rokko Atalia,

²⁶naindeto dio mai nanii massombaran lako Antiokhia, tu dininna ussorongi pirambongi’ lako pa’kamaseanNa Puang Matua la ungkarangi tu pengkarangan mane mangka nasundunni.

²⁷Iatonna sae lako, narampunmi tu to Sarani, nauleleananni tu mintu’ apa Napogau’ Puang Matua urrondongi sia kaNabungkaranna Puang Matua tu ba’ba kapatonganan lako to kapere’.

²⁸Torromi masai tinde rasulu’ sisola tu mai to menturu’.