Read Toraja-Sa'dan PENGGAURANNA RASULU’ 15 Bible Online

PENGGAURANNA RASULU’ 15 - Toraja-Sa'dan bible

PENGGAURANNA RASULU’ 15

¹Saemi ba’tu pira-pira tau dio mai Yudea, naada’i tu mai to menturu’, nakua: Iake tae’i midisunna’ unturu’ atoranna Musa, tae’ mikabu’tui kamakarimmanan.

²Bu’tumi kasisakkan sia kasisalan kapuana Paulus sola Barnabas anna tau iato, anna pamatu’tunni tau tu Paulus sola Barnabas anna ba’tu pira-pira to senga’ la lao langngan Yerusalem umpelambi’i tu mai rasulu’ sia penatua umpekutananni diona tu nasisalainna.

³Iamoto anna solanni kombongan tinde rasulu’ sola duai lako salian tondok, anna male ullendu’i Fenisia na Samaria sia naulelean tu diona to kapere’ mengkatoba’, anna umpabu’tu kaparannuan kapua lako mintu’ to sangsiuluran.

⁴Iatonna rampo lako Yerusalem, natammuimi kombongan sola rasulu’ sia penatua, nauleleananni tu mintu’ penggauran Napogau’ Puang Matua urrondongi.

⁵Apa ke’de ba’tu pira-pira to lu dio mai kasiturusan to Farisi, tu ma’patongannamo, sia nakua: Sipatu la disunna’ tu mati’ tau sia dipepasanan lako anna turu’i tu sukaran alukna Musa.

⁶Ma’kombongammi tu mai rasulu’ sia penatua la ussitimbangi tu iannato.

⁷Iatonna sisakka kapuamo, ke’de’mi tu Petrus anna ma’kada lako tinde tau, nakua: E kamu siulu’ki, miissan kumua masaimo’ Napilei Puang Matua te kita sola nasang, anna rangii to kapere’ tu kada Kareba-kaparannuan sun dio pudukku, anna ma’patongan.

⁸Anna Puang Matua, tu untandai penaanna tau, untongananni tu tau Napa’kamaseanni lako tu Penaa Masallo’ susitu kaNakamaseinta;

⁹moi misa’ tae’ Napasisengaranni tu kita anna iatu tau, ke mangkami Napemaseroi tu penaanna tete dio kapatonganan.

¹⁰Iake susito ma’apai ammi toba-toba Puang Matua ammi papassanni lemba tu mai to menturu’, tu tang nabelanna napassan nene’ to dolota ba’tu kita te.

¹¹Apa takatappa’i kumua belanna pa’kamaseanNa Puang Yesu, anta la dikarimmanni, misa’ lalan la taola sola tu mati’ tau.

¹²Sipa’loko-lokoan nasangmi tu to ma’kombongan, anna perangii tu Barnabas sola Paulus unnuleleanni tu mintu’ tanda kalle-kallean sia tanda mangnga Napaomboran to kapere’ Puang Matua napogau’ tinde tau sola duai.

¹³Iatonna upu’ sola duai ma’kada-kada, mebalimi Yakobus, nakua: E, kamu siulu’ki, perangiina’!

¹⁴Mangkamo naulelean Simon tumba mulanna anNa kilalai Puang Matua tu to kapere’ anNa alai lan mai tu sangbangsa tau la umpangke’ sanganNa.

¹⁵Iatu iannato sikitanan tu kadanna nabi, susitu disura’na kumua:

¹⁶Undinna na iato la suleNa’, angKu bangunni sule tu lantang Daud, tu ro’pokmo, sia iatu mai sanggangna Kubangun sule angKu pabendanni,

¹⁷dikua anna daka’ Puang tu to torropa, sia iatu mintu’ to kapere’ tu dininnamo ussa’bu’ sangangKu,

¹⁸tenmoto tu kadanNa Puang, tu umpaombo’i tu iannato tempon dio mai.

¹⁹Iamoto iake timbangangku, da tasussai tu to kapere’ mengkatoba’mo lako Puang Matua,

²⁰sangadinna pakatuanni sura’ anna toyangan kalena dio mai apa naruttakki deata, dio mai gau’ sala, dio mai olo’-olo’ masala, sia dio mai rara.

²¹Belanna iatu Musa tempon dio mai dolo-dolana naden tau umpa’pangadaranni lan ke sang tondokoi, belanna dibasan tau tu sukaran alukna lan lu banua pa’kombongan ke allo katorroanomi.

²²Tonna iato nasangami tu mai rasulu’ sia penatua sia mintu’ to lan kombongan kumua melo ke dipilei tu tau nadisua lako Antiokhia sola Paulus na Barnabas, napileimi tu Yudas, diganti Barsabas sola Silas, panglalanna tu to sangsiuluran.

²³Umpakatumi sura’ napakaloli’i tu tau iato, nakua lan tu sura’: Umparampokan salama’ki te mai kami siulu’mi rasulu’ sia penatua mati’ kamu sangsiuluran tu bu’tu dio mai to kapere’ iti’ Antiokhia sia Siria na Kilikia.

²⁴Belanna kirangi kumua den ba’tu pira-pira tu solaki male mati’ umpatigega’komi napokadan kada umpabata penaammi, anna tae’ kami kipepasananni lako tu tau,

²⁵kipourungi ussituru’i umpilei ba’tu pira-pira tu tau angki suai mati’ sola Barnabas na Paulus kipakaboro’,

²⁶tu to ussorongmo penaanna belanna sanganNa Puangta Yesu Kristus.

²⁷Iamoto angki suai tu Yudas sola Silas, anna pudukna kalena duka umpa’peissananni tu iannato lako kalemi.

²⁸Belanna situru’ pa’poraianNa Penaa Masallo’ sia kami, to kumua tae’ mila dipapassanni tu magasanna na iate sipatunna,

²⁹iamotu untoyangan kalemi dio mai tampak pesung, sia dio mai rara sia dio mai olo’-olo’ masala sia dio mai gau’ sala. Iake ungkanandaikomi kalemi dio mai mintu’na te iannate, iamo melona to. Siriakomi kamarampasan.

³⁰Iatonna messimanmo tinde tau malemi rokko Antiokhia, anna rampun nasangi tu to lan kombongan, nabenni tu sura’.

³¹Iatonna basami tu sura, parannumi penaanna sola nasangi belanna kareba pa’pakatana iato.

³²Iatu Yudas sola Silas, belanna nabi toda ia, napapa’yakmi sia napabatta’ tu penaanna to sangsiuluran, buda kada napokadanni.

³³Iatonna torro ba’tu sangapa-apa dio, natangga’mi tinde to sangsiuluran sule marampa’ lako to ussuai.

³⁴(Apa iatu Silas naporai ia torro dio).

³⁵Torromi tu Paulus sola Barnabas dio Antiokhia mangada’i sia umpa’peissanan kadanNa Puang sia buda to senga’ nasolan.

³⁶Ba’tu pirang-pirang allo undinnato, nakuami Paulus lako Barnabas: Talao pole’ untollongi tu mai to menturu’ dio lu mintu’ tu tondok mangkamo tanii, umpa’peissanan kadanNa Puang, ba’tu ma’patumbami katorroanna.

³⁷Diongmi penaanna Barnabas la ussolan dukai tu Yohanes diganti Markus.

³⁸Apa nasanga Paulus tae’ namelo ke nasolanni tu to mangkamo untampei sola duai dio Pamfilia, tae’ namale sola umpogau’i tu pengkarangan iato.

³⁹Bu’tumi kasisalan kapuana, naurunganni sisarak; nasolammi Barnabas tu Markus, namale massombaran lako Siprus,

⁴⁰apa iatu Paulus, Silas ia napilei, anna male tonna mangka ussorongi tu to sangiuluran lako pa’kamaseanNa Puang.

⁴¹Naola lendu’mi tu tana Siria sia Kilikia, anna pabatta’i tu penaanna mintu’ kombongan.