Read Toraja-Sa'dan PENGGAURANNA RASULU’ 18 Bible Online

PENGGAURANNA RASULU’ 18 - Toraja-Sa'dan bible

PENGGAURANNA RASULU’ 18

¹Undinnato ke’de’mi tu Paulus dio mai Atena nasae lako Korintus.

²Nakabu’tuimi tu misa’ to Yahudi disanga Akwila, to Pontus, mane sae dio mai Italia sola bainena, disanga Priskila, belanna napa’parentammo Klaudius kumua mintu’ to Yahudi la sun lan mai Roma. Laomi umpellambi’i tinde tau sola duai.

³Na belanna misa pandakaranri, torromi namengkarang sola; belanna iatu pandakaranna manggaraga tenda.

⁴Nalambi’ oi allo katorroan ma’uleleanoi tu Paulus lan banua pa’kombongan sia napakanassan nala to Yahudi nala to Yunani.

⁵Apa iatonna saemo tu Silas sola Timotius dio mai Makedonia ia mannamo napogau’ Paulus tu umpa’peissanan kada iato, sia nakatottongi lako to Yahudi kumua iatu Yesu Iamo Kristus.

⁶Apa iatonna mangea tu tau sia ma’kada solang, narimbakammi tu pakeanna sia ma’kada lako tu tau nakua: Narampoi misamorokomi kamu tu kasanggangan; tae’mo aku na aku sala; randuk te attu iate angku la lu lako to kapere’.

⁷Malemi inde to dio mai nalao lako banuanna Titius Yustus, misa’ to mengkaola lako Puang Matua, sirondong banua pa’kombongan tu banuanna.

⁸Umpatongammi Puang tu Krispus, kapala banua pa’kombongan sola mintu’ to lan banuanna, sia buda to Korintus urrangi Paulus ta’pa ma’patongan, nadidio’.

⁹Ma’kadami Puang lako Paulus tonna bongi ungkita bayo-bayo, Nakua: Da mumataku’, sangadinna ma’kadako sia da muma’loko-loko!

¹⁰Belanna Aku urrondongko, na moi misa’ tau tae’ la umpata’paiko lima anna bala’-bala’ko; belanna buda taungKu lan te tondok iate.

¹¹Torromi tu Paulus dio sangtaun annan bulanna, sia umpa’pangadaran kadanNa Puang Matua lako tau.

¹²Apa iatonna Galio to maraya dio tana Akhaya, tu’bami tu to Yahudi unnea Paulus, napakendekki napopennolo lako to’ pangra’tasan kara-kara,

¹³nakua: Ullono’ to buda te tau iate menomba langngan Puang Matua, tu sisalanna atoran Sukaran aluk.

¹⁴Apa mane la tiku’bi’ tu Paulus nakuami tu Galio ungkuan to Yahudi: E to Yahudi, iake tonganna apa sala tu iannato, ba’tu kakadakean, sipatu la kuperangii marampa’.

¹⁵Apa iake kasipakkan diona kada ba’tu sanga ba’tu sukaran alukmi, paressa kalenai kamu; manokana’ aku la umpoissanni te kara-kara iate.

¹⁶Narambaimi tu tau iato lan mai to’ pangra’tasan kara-kara.

¹⁷Nasila’ka’-la’ka’imi to buda tu Sostenes kapala banua pa’kombongan, nakambei dio tingo to’ pangra’tasan kara-kara. Apa napopa’elo’na bang Galio tu mintu’nato.

¹⁸Iatonna ba’tu sangapa-apamo tu Paulus torro inde to dio, messimanmi lako to sangsiuluran, namale massombaran lako tana Siria sola Priskila na Akwila, tonna mangka tu Paulus ungku’ku’i beluakna dio Kengkrea, belanna mangka ma’tado’.

¹⁹Iatonna sae lako Efesus, natampemi Paulus tinde tau sola duai inde to dio, anna loo tama banua pa’kombongan, nasipa’kada to Yahudi.

²⁰Iatonna naran-naranni tau la torro masaisai inde to dio, tae’mi napasiolai,

²¹sangadinna iatonna messiman, nakuami: La sule siana’ umpellambi’ikomi, ke Naeloranni Puang Matua. Malemi massombaran dio mai Efesus.

²²Tonna rampo lako Kaisarea, malemi langngan karangkean, anna umpassakke kombongan inde to dio, namane male rokko Antiokhia.

²³Iatonna ba’tu sangapa-apamo torro inde to dio, ke’de’mi namale ussalongi mintu’ tana Galatia sia Frigia, napabatta’i penaanna tu mai to menturu’.

²⁴Saemi lako Efesus tu to Yahudi misa’ disanga Apolos, to Aleksandria, misa’ to manarang sia untarru’i tu lanna Sura’ Madatu.

²⁵Iate tau iate mangkamo diada’i lalanNa Puang, sia parruk penaanna ma’kada sia napa’pangadaran tongan tu diona Yesu, moi anna pa’dioranna manna Yohanes natandai.

²⁶Naparandukmi ma’kada-kada lan banua pa’kombongan lendu’ batta’na. Apa iatonna rangii Priskila sola Akwila, natambaimi sola duai, napamanassan tonganni tu lalanNa Puang Matua.

²⁷Iatonna la male massombaran lako Akhaya, napatiakka’mi to sangsiuluran tu penaanna, sia napakatuan sura’ tu to sangsiuluran dio kumua anna tammui. Iatonna rampo, kapuami pa’tulungna lako mintu’ to ma’patongan belanna pa’kamaseanNa Puang Matua.

²⁸Belanna kabattaranna anna tarru’i tu to Yahudi dio tingayona to buda sia napamanassan lan mai Sura’ Madatu, kumua iatu Yesu Iamo Kristus.