Read Toraja-Sa'dan PENGGAURANNA RASULU’ 19 Bible Online

PENGGAURANNA RASULU’ 19 - Toraja-Sa'dan bible

PENGGAURANNA RASULU’ 19

¹Dio bangsia Korintus tu Apolos, tonna upu’mo Paulus ussalongi tu padang rampe ulunna salu, sae lako Efesus, ungkabu’tuimi ba’tu pira-pira to menturu’ dio.

²Nakuami ungkuanni tu tau iato: Narampoimorokomika Penaa Masallo’ tommi ma’patongan? Nakuami mebali tu tau: Tae’pa kami kirangi lenni kumua den tu Penaa Masallo’.

³Nakuami: Iake susito, umba kamu pa’dioran dinii undio’komi tama? Nakuami tinde tau: Tama pa’dioranna Yohanes.

⁴Nakuami Paulus: iatu Yohanes umpa’dioran pa’dioran umpotete katobaran, sia napokadan tau kumua sipatu la napatongan tu To la sae undinna na ia, iamotu Yesu.

⁵Iatonna rangii tinde tau tu iannato, di dio’mi tama sanganNa Puang Yesu.

⁶Iatonna remme’i Paulus limanna tu tau, songlo’mi tu Penaa Masallo urrampoi, anna ma’kada umpobasa ma’rupa-rupa basa sia ma’nubua’.

⁷Iatu tau iato umbai agi sangpulo dua.

⁸Tamami banua pa’kombongan tu Paulus, sia batta ma’kada-kada tallung bulan, nasipa’ulelean tau sia napamanassan tu diona ParentaNa Puang Matua.

⁹Apa iatonna makarra’mo penaanna tu tau pira sia noka ma’patongan sia nasayu-sayu tu lalan pekaalukan iato dio tingayona to buda, umpaseremi kalena dio mai tau iato napopessarakki tu mai to menturu’. Mangada’imi kiallo-kiallo lan passikolanna Tiranus.

¹⁰Susi bangmo napogau’ to lan duang taun, sae lako naranginna mintu’ to torro lan Asia tu kadanNa Puang Matua, la to Yahudi, la to Grika.

¹¹Napadenmi Puang Matua tu tanda mangnga makalaen-laen napaombo’ Paulus,

¹²naurunganni moi passapunna sia pa’bakkanna tu pura napake Paulus, naban tau to masaki, nasoro’ tu saki dio mai kalena sia mallai tu mintu’ deata masussuk.

¹³Apa den duka ba’tu pira-pira to Yahudi unnampui issan-issan male sumalong ma’barani-rani umpobasa-basai tu sanganNa Puang Yesu lako to nataba deata masussuk, nakua: Sanganna Yesu napa’peissanan Paulus kusa’bu’ umpasoro’komi.

¹⁴Pitu tu muane, anakna Skewa, to minaa kapuanna to Yahudi, umpogau’i tu susinnato.

¹⁵Apa mebali tu deata masussuk, nakua ungkuanni tinde tau: Iatu Yesu kutandai sia iatu Paulus kuissan, namindakomi kamu te?

¹⁶Lumumpa’mi tu to nataba deata ulla’ka’i, nasau’ parrangi tinde tau sola nasang sia nalulun buku, naurunganni mallai ma’kambelang lan mai banua sia bangke.

¹⁷Tiseno-senomi tu kareba iato lako mintu’ to Yahudi sia to Grika dio Efesus, sae nasangmi kamatakuranna tu tau, anna pakala’bi’i tau tu sanganNa Puang Yesu.

¹⁸Budami tu to ma’patonganmo sae mangaku sala sia umpa’peissanan mintu’ penggauranna.

¹⁹Sia buda tu to umpogau’ kapaissanan tu urrampun mintu’ sura’ issan-issanna, naballai dio tingayona mintu’ tau; narekenni tu allinna agi-agi limangpulo sa’bunna suku.

²⁰Susimoto tu kadanNa Puang Matua sarorak-rorakna sia sapatalo-talona tete dio kuasanNa Puang.

²¹Iatonna upu’mo tu iannato, lanmi penaanna Paulus la lao ussalongi Makedonia sia Akhaya, namane lao lako Yerusalem, nakua: Iangku, diomoto, tae’mo kutang lao duka lako Roma.

²²Iatonna suami da’dua tu to untundui lako Makedonia, iamotu Timotius na Erastus, torromi ba’tu sangapa-apapa dio Asia.

²³Tonna attu iato dadimi kamarukkan kapua diona aluk ka-Saranian.

²⁴Belanna den tau misa’ disanga Demetrius, to tumampa salaka, unggaragai salaka banuanua deata, disanga Artemis, nanii mesaro la’da’ tu pande iato mai.

²⁵Napasirampunmi tinde tau tu mai to misa’ pandakaranna, nakua: E sola, miissan sia kumua iate pentoean iate tanii mesaro kapua.

²⁶Na mitiromo sia mirangimo kumua tangngia inde manna te Efesus, sangadinna kari’ la mintu’mo lili’na Asia nanii te Paulus unna’pan sia umpabalik buda tau, nakua kumua iatu panggaraga tolino tangngia deata.

²⁷Iatu iannato tangngia ia manna tu pandakaranta ia nasura’ naurunganni tang la lala’, apa iari tu banua dinii umpenombai Artemis, deata mala’bi’, tae’mo nala ungkatondo’i tau, anna pa’de kamala’biranna tu deata napenombai mintu’ tau lan tana Asia sia mintu’ tau lan te lino.

²⁸Iatonna rangii tinde tau tu iannato, re’dekmi ara’na nasikumalasi-lasi, nakua: Mala’bi’komi Artemis to Efesus!

²⁹Lendu’mi marukkana lan tondok iato, na sama turu’ tu tau sikarumun tama’ to pengkitan, nala’ka’i tu Gayus sola Aristarkhus, to Makedonia, sibanna Paulus.

³⁰Iatonna la male tama to’ to buda tu Paulus, tang natangga’mo to men- turu’.

³¹Den duka ba’tu pira-pira pangulu Asia, tu melo penaanna lako Paulus umpakare’nai kumua da nalao tama to’ pengkitan.

³²Sipelallak-lallakammi tu tau, nakua pira ten to, nakua pira susiri to. Belanna mamak bangmo lan tu kasirampunan sia buda tu tau tae’ natandai apa patunna nasirampun.

³³Naada’imi to buda tu Aleksander, tu nasua to Yahudi lako tingayo. Umpopangimbami limanna tu Aleksander la umpa’kadan solana lako tu to buda.

³⁴Apa iatonna issanmi tau kumua to Yahudi to, rambanmi sikumalasi-lasi, agi-agi duang diang nakua: Mala’bi’komi Artemis to Efesus!

³⁵Iatonna parapa’mi duru-tulisi’ lan tondok tu to buda, nakuami: E kamu to Efesus, umbara misa’ tolino tu tang unnissanni kumua iate Efesus to ma’kampana banua dinii umpenombai Artemis mala’bi’ sia rapang-rapang dipodeata turun dibatara?

³⁶Na belanna mintu’nato tae’ nadibela dibali, sipatukomi umparapa’ penaammi sia da misasa-sasa umpogau’ apa-apa.

³⁷Belanna mibaamo sae te tau iate mai, moi anna tae’ nabokoi banua deata, sia tae’ napa’kada solangi tu deatanta.

³⁸Iamoto iake denni la naparapasan tau tu Demetrius sola tu mai sangpandena, den sia ia kombongan ada’ sia den dukato maraa, da’ito na iamora ia siparapa’.

³⁹Apa iake senga’na mituntun ma’din dipasirundunan lan kasirampunan manassana to kamban.

⁴⁰Belanna masolangki’ te ke diparapa’ki’ diona te kamarukkan ina’ allo natae’ bang misa’ bannangna tu la tapebalian diona te kasirampunan marukka iate. Iatonna mangka ma’kada susito, nasuami tu to sirampun sule.