Read Toraja-Sa'dan PENGGAURANNA RASULU’ 20 Bible Online

PENGGAURANNA RASULU’ 20 - Toraja-Sa'dan bible

PENGGAURANNA RASULU’ 20

¹Iatonna rapa’mo tu kamarukkan, natambaimi Paulus tu to sangsiuluran napakilalai, na iatonna mangkamo messiman, ke’de’mi lako Makedonia.

²Tonna mangkamo ussalongi tu mintu’ parenta iato sia buda pa’pakilala napokadanni tu mai tau, tarru’mi tama tana Yunani.

³Ma’tallung bulan dio to, nakombongammi to Yahudi tonna la male massombaran lako tana Siria. Iamoto napopa’ga’tarammi la sule ullendu’i Makedonia.

⁴Laomi nasolan sia Sopater, anakna Pirus to dio mai Berea, sia Aristarkhus sola Sekundus to dio mai Tesalonika sia Gayus to dio mai Derbe sia Timotius sia Tikhikus sia Trofimus to dio mai Asia.

⁵Mintu’na tu tau iato inang dolomo lao ungkampaikan dio Troas.

⁶Malemokan massombaran dio mai Filipi tonna lendu’mo tu allo kapua dinii ungkande roti tang diragii; ma’limang alloan angki sae lako Troas ungkarampoi tinde tau. Indemoto kinii torro pitung allo.

⁷Iatonna allo bunga’na lan minggu iato, tongki sirampun untepu-tepu roti, ma’uleleammi Paulus lako tu tau, apa nasanga la malemo ke masiangito, iamoto napatarru’i tu pa’uleleanna sae lako ma’tangnga bongi.

⁸Iatu bilik mengkadaoan tu kinii sirampun, nanii buda palita.

⁹Denmi misa’ to mangura disanga Eutikhus unno’ko’ dio to’ pentiroan, naleppeng. Belanna masai tongan tu Paulus ma’ulelean, natarru’mi mamma’na, natobang dao mai kalada’ ma’pentallunna, naangkaranni tau matemo.

¹⁰Mengkalaomi tu Paulus ullumbangi rokko naraka’i, nakua: Da misiurrukan, belanna lan sia ia tu penaanna.

¹¹Iatonna kendekmo sule langngan nauntepu-tepu roti, kumandemi sia masai ma’ulelean sola tu tau sae lako tibangka’na masiang, namane ke’de’.

¹²Nasolammi tau tinde to mangura tuo sia: pa’pakatana kapua tongan rampo lako kalena sola nasangi.

¹³Kendekmokan dolo langngan kappala’, angki male massombaran lako Asos, kumua anna dio kinii unnalai tu Paulus, belanna susimo pepasanna to, apa la ma’lingka ia.

¹⁴Iatongki sikitamo dio Asos laomi kiala, kitarru’ lako Metilene.

¹⁵Massombarammokan inde to dio mai, na iatonna masiangto, diomokan tingo lebukan disanga Khios; nama’duang bongian, kilendu’ dio lebukan disanga Samos, anna ma’tallung bongian kirampo dio Miletus.

¹⁶Belanna iatu diongna penaanna Paulus la morai massombaran ullendu’i Efesus, da anna marempa dio tana Asia, belanna la morai madomi’, kumua palambi’ sia manii anna sae lako Yerusalem, ke allo kapua Pentakosta.

¹⁷Ussuami tau dio mai Miletus lako Efesus untambai tu mai penatua kombongan.

¹⁸Iatonna saemo lako kalena, nakuami ma’kada lako: Miissanmo tempon dio mai tongku bunga’ ullesei te tana Asia, tumba tu biasanna kasikadamakanta,

¹⁹angku mengkaola langngan Puang, naturu’ kamadionganan penaa sia uai mata, sia ba’tu pira-pira peroso narapa’ to Yahudi lan kombongan rampo lako kaleku;

²⁰mintu’na tu apa den patunna lako kalemi, moi mia’ tae’ kubuni, sangadinna kupa’peissanan lako kalemi, sia kuadarangkomi dio tingayona to buda sia lan lu banua;

²¹sia kupamanassan to Yahudi sia to Yunani tu diona kamengkatobaran lako Puang Matua sia ma’patongan lako Puangta Yesu.

²²Na totemo la miissan kumua: aku te natuntunnina’ Penaa la lao lako Yerusalem, tae’ kuissanni apa tu la urrampoina’ inde to dio.

²³Sangadiri Penaa Masallo’ umpamanassanna’ ke saeona’ lako misa’ tondok kumua pepungo manna sola kamaparrisan untayanna’.

²⁴Apa tae’mora kuangga’ lenni tu penaangku kumua la denpi patunna lako kaleku, podo Naeloranna’ Puang Matua umpasundun passanan tengkoku sia iatu pentoean mangka Napadudunganna’ Puang Yesu, tu la ungkatottongi Kareba-kaparannuan diona pa’kamaseanNa Puang Matua.

²⁵Tiromi totemo, kuissan kumua iatu kamu mintu’ tu mangkannamo kutollongi kupokadan ParentaNa Puang Matua, tae’mo mila untiroi rupangku.

²⁶Iamoto angku pamanassai lako kalemi te allo iate kumua maserona’ dio mai rarana mintu’ tau.

²⁷Belanna tae’ apa kubuni, sangadinna kupa’peissanan nasang lako kalemi tu mintu’ lalan penaanNa Puang Matua.

²⁸Kanandai tu kalemi sia mintu’ tu to sangtuntunan, tu Nanii umpamanassakomi Penaa Masallo’ dadi to mangkambi’, la ungkambi’i tu kombonganNa Puang Matua, tu mangka Nala’bak raraNa kalena.

²⁹Kuissan, kumua iake memboko’mo’ la sae tu guruk masuru ba’tu pira-pira, to tang untandai kamamasean lako tu to sangtuntunan.

³⁰Kamu kalena denkomi ba’tu pira-pira la bendan umpalolang pangadaran sala la umpatilaoi penaanna tu mai to menturu urrundu’i.

³¹Iamoto dadi kanandai sia pengkilalai kumua tallung taunna’ keallo kebongi tae’ kutorei umpakilala simisa’i tu tau situru’ uai matangku.

³²Na totemo kusorongkomi lako Puang sia lako kada pa’kamaseanNa, tu kuasa umpabatta’komi sia umpa’kamaseanni lako kalemi tu mana’ sola tu mintu’ to dipamaindan.

³³Tae’ angku kaduangi salakana tau ba’tu bulaanna ba’tu pakeanna.

³⁴Kamu kalena unnissanni kumua limangku mara’ta undaka’i tu kupotuona sola tu mai to kusolan.

³⁵Mintu’na kunii nasangmo umpakitangkomi sangka’ umba la mikua umposara’i untundui tu mai to langga’, sia umpalan ara’ kadanNa Yesu, tu Ia kalena umpokadai Nakua: Ondong ia dipomaupa’ tu mamengan na iatu diben.

³⁶Iatonna ma’kada susito tu Paulus, malinguntu’mi namassambayang sola tu tau mintu’.

³⁷Siunnumbu-umbumi tumangi’ tu tau, anna raka’i tu barokona Paulus sia naudung,

³⁸lendu’ napomassena ondong pissan tu kada mangka napokada kumua, tae’mo nala untiroi rupanna. Nasolammi langngan kappala’.