Read Toraja-Sa'dan PENGGAURANNA RASULU’ 21 Bible Online

PENGGAURANNA RASULU’ 21 - Toraja-Sa'dan bible

PENGGAURANNA RASULU’ 21

¹Iatongki messarakmo dio mai tu tau, massombarammokan ma’palulako Kos, na iatonna masiangto ma’palulakomokan Rodos, na inde to dio ma’palulakomokan Patara.

²Iatongki lambi’mi tu kappala’ la ma’palulako Fenisia, kendekmokan kimale massombaran.

³Iatongki kitami tu Siprus kipokairimi, kimale massombaran lako tana Siria, kimengkalao dio Tirus, belanna indemoto nanii tu kappala’ umpopengkalao lurangna.

⁴Sitiromokan tu mai to menturu’ angki torro dio pitung allo; umpakilalami Paulus belanna pa’patudu-tudunNa Penaa kumua da nalao langngan Yerusalem.

⁵Iatonna upu’mo tu allo katorroangki inde to dio, sunmokan la umpatarru’ kapassombarangki; sangsunammi sola bainena sia anakna unnanta’kan sae lako salian tondok, angki malinguntu’ massambayang dio randan tasik.

⁶Iatongki mangkamo sisalama’ simisa’, kendekmokan langngan kappala’, anna sule lako banuanna.

⁷Iatongki massombaran dio mai Tirus, saemokan lako Ptolemais angki sisalama’ tu mai sangsiuluran, sia torrokan sangallo sola.

⁸Iatonna masiangto ke’de’mokan, angki sae lako Kaisarea, kikendek langngan banuanna Filipus, guru Injil, iamo misa’ tu to pitu dipilei pirangbongi’, angki torro dio.

⁹Iate tau iate den anakna a’pa’ anak dara, ma’nubua’.

¹⁰Iatongki ba’tu pirang-pirang allomo torro inde to dio, saemi misa’ nabi dao mai tana Yudea, disanga Agabus,

¹¹nasae umpellambi’ikan, naalai tu salipi’na Paulus, napungoanni lentekna sola limanna sia nakua: Inde sia tu kadanNa Penaa Masallo’, kumua iatu Puangna te salipi’ la napungo to Yahudi dio Yerusalem susite, anna sorongi lako to kapere’.

¹²Iatongki rangii to, kipalakumi sola pa’tondokan menturu’mo, kumua da nalao langngan Yerusalem.

¹³Nakuami Paulus mebali: Apara ga’imi tumangi’ sia umparanggang penaangku? belanna aku te kukaringnganan tangia dipungo manna sangadinna dipatei duka dio Yerusalem tu belanna sanganNa Puang Yesu.

¹⁴Tu belanna tang nalakoi pa’pakilala, ma’loko-lokomokan sia kikua: Tang la pa’poraianNaraka Puang Matua tongan.

¹⁵Undinnato ma’pasakka’mokan, angki male langngan Yerusalem.

¹⁶Denmi ba’tu pira-pira to menturu’ dio mai Kaisarea kisiturusan, anna solangkan lako Manason, to Siprus masaimo menturu’, dio banuanna la kinii torro.

¹⁷Iatongki rampomo langngan Yerusalem, parannumi tu mintu’ to sangsiuluran untammuikan.

¹⁸Tonna masiangto, laomokanni sola Paulus lako Yakobus, nasangdioan ren tu mintu’ penatua.

¹⁹Iatonna mangkamo ussalama’i tu tau, naulelean simisa’mi tu mintu’na Napaden Puang Matua urrondongi lan pengkaranganna dio lu to kapere’.

²⁰Iatonna rangii tau tu iannato, umpakala’bi’mi Puang Matua sia nakua lako Paulus: E siulu’, mutiromo, maka la pira ia sa’bu tu to Yahudi ma’patonganmo, apa tontong nasang bangpa parruk ungkaritutui Sukaran aluk.

²¹Apa iatu iko, dipa’peissanammoko lako tau kumua iko unnada’i tu mai to Yahudi dio lu to’ to kapere’ memboko’ dio mai Musa, kumua: Tae’ mo nala ussunna’i tu anakna sia unturu’i tu atoran sukaran aluk;

²²totemo umbamo la dipakuanni? bua’raka nala tang urrangii kumua saemoko.

²³Iamoto pogau’i tu kipakilalangko. Den sia a’pa’ to ma’tado’ kisisolan;

²⁴solanni ammu pemaseroi kalemu sola, sia poissanni tu la naangkaranna anna diku’ku’; naissanni mintu’ tau kumua tae’ natonganna susitu narangi tu gau’mu, apa iko kalena, na mupogau’ tu ungkaritutui Sukaran aluk.

²⁵Apa iatu diona to kapere’ tu ma’patongannamo, mangkamo kipakatuan sura’ umpamanassanni kumua anna toyangan kalena dio mai tampak pesung, sia dio mai rara, sia dio mai olo’-olo’ masala sia dio mai gau’ sala.

²⁶Nasolammi Paulus tinde tau, na iatonna masiangna to usseroimi kalena sola, natama Banua Kabusungan umpa’peissananni tu kamala’biranna allo kamaseroanna, anna pantan dipemalaran tu pemala’na.

²⁷Iatonna la ma’pitung alloammo, umpamarambami to buda tu to Yahudi lu dio mai Asia tonna kitai tu Paulus lan Banua Kabusungan, anna pata’pai lima tu Paulus,

²⁸sia metamba-tamba, nakua: E kamu mintu’ to Israel, tunduimokan! Indemo tu to unnada’i mintu’ tau, tu tae’ tang nanii umbelle’i tau sia Sukaran aluk sia iate inan iate. Sia ba’tu pira-piramo to Yunani nasolan tama Banua Kabusungan, sia naruttakki te inan maindan iate.

²⁹Belanna dolona mangkamo nakita tinde tau tu Trofimus to Efesus nasisolan lan lu tondok, nasangami nasolan Paulus tama Banua Kabusungan.

³⁰Marambami tu mintu’ pa’tondokan, nasirampun tu to buda. Nala’ka’imi tu Paulus, nariu’-riu’i sun lan mai Banua Kabusungan, nata’pa untutu’ nasangi tau tu ba’bana.

³¹Iatonna la morai umpatei, narampoimi kareba tu kamandang kumua maramba tu mintu’ pa’tondokan Yerusalem.

³²Ta’pa malemi ussolan surodadu sia pangulu surodadu, namale ma’dondo-dondo rokko umpelambi’i; na ia tinde tau tonna kitami tu kamandang sia surodadu, natorroimi ungkambei tu Paulus.

³³Saemi tu kamandang urreke’i, namesua ulla’ka’i sia umpaluangi rante bassi da’dua, namekutana kumua mindara te sia apara napogau’.

³⁴Denni lan mai tu to buda metamba umpokadanni kumua susi to, den kumua susi te. Apa belanna tang ma’rundunan tu manassana, napobua’ tu kamaramban, napesuammi umbaai tama tangsi.

³⁵Iatonna saemo lako to’eran tangsi, kenna tang umbullei surodadu, tae’mo nala rampo, belanna nasikemunni to buda.

³⁶Belanna sangundian bang tu to buda sia sipetamba-tamban nakua: Sabu’i ia tu!

³⁷Iatonna la dibaamo tama tangsi tu Paulus, nakuami lako kamandang: Ma’din siara’ka umpokada kada lako kalemi? Nakuami mebali: Manarangrokoka ma’basa Yunani?

³⁸Tang ikomoraka tu to Mesir umpabu’tu kamarukkan pirambongi’ sia male ussolan patang sa’bu pa’gora’ lako padang pangallaran?

³⁹Apa nakua Paulus: Aku te to Yahudi diona’ mai Tarsus, dio mai misa’ tondok kalelean dio tana Kilikia; kupalaku lako kalemi, eloranna’ angku ma’kada-kada lako te to buda.

⁴⁰Iatonna elorammi, ke’de’mi tu Paulus dao eran, naumpopangimba limanna lako tu to buda, na iatonna kappa nasangmo, ma’kadami ma’basa Ibrani, nakua: