Read Toraja-Sa'dan PENGGAURANNA RASULU’ 23 Bible Online

PENGGAURANNA RASULU’ 23 - Toraja-Sa'dan bible

PENGGAURANNA RASULU’ 23

¹Napemarangami Paulus tu Ada’ lompo, nakua: E tuang-tuang sangsiulurangku, aku te bannang pute tu sukaran inaangku diona gau’ku dio oloNa Puang Matua sae lako allo totemo.

²Nasuami Ananias, Tominaa Kapua tu to ke’ de’ nasikandappiran Paulus ussala’pai tu pudukna.

³Nakuami Paulus ungkuanni: Nasala’pakomi Puang Matua, e! rinding dibusai. Tongannaraka unno’ko’komi umpaolaina’ salunna, tu situru’na lalan Sukaran aluk? apa unneamokomi Sukaran aluk tu umpesuanna’ disala’pa.

⁴Nakuami tu to ke’de’ nasikandappiran: Mukada-layukkiraka tu Tominaa KapuanNa Puang Matua?

⁵Nakuami Paulus mebali: E sangsiulurangku, tae’ aku kuissanni kumua Tominaa Kapuai tu; belanna den di sura’ kumua: Da mulo’bo pangulunna bangsamu.

⁶Iatonna tandai Paulus kumua ia tinde tau to Saduki pira anna to Farisi pira, napemanduimi ma’kada lan kombongan nakua: E sangsiuluran, aku te to Farisina’ sia taruk to Farisi. Na belanna kapa’rannuanan diona kamalimbangunanna to mate, angku diparapa’.

⁷Iatonna ma’kada susito, bu’tumi kasisakkanna to Farisi na to Saduki, na iatu to buda sitaa.

⁸Belanna nakua tu to Saduki, tae’ ia tu kamalimbangunan, tae’ duka malaeka’ ba’tu a’gan penaa; apa napatongan dua to Farisi tu iannato.

⁹Bu’tumi kamarukkan kapua, nake’de’ ba’tu pira-pira tu pandita Sura’ dio to Farisi massita’gen nakua: Tae’ bangra kakadakeanna kiappa’ te tau iate; iake napa’kadai tongannia’gan penaa ba’tu malaeka’, la naposalaoraka?

¹⁰Iatonna bu’tumo kasisakkan kapua, mataku’mi tu kamandang, kumua nasikabittingi manii tau tu Paulus, nasuai tu surodadu lao ussabakki lan mai tangngana tau, nabaai tama tangsi.

¹¹Iatonna bongimoto, bendanmi Puang dio sa’dena sia Nakua: Pabatta’i tu penaammu! Belanna tumba tu kamukatottongingKu dio Yerusalem, susi dukamoto sipatuko la ungkatottongiNa’ dio Roma.

¹²Iatonna masiang dio mai, sipatamma’mi ba’tu pira-pira to Yahudi, pada ussumpa kalena kumua, tae’ nala kumande sia mangiru’ ke tae’pi napatei tu Paulus.

¹³Iatu to sipatamma’ sia ussumpa kalena la’bi patangpulo.

¹⁴Sanglaoammi tu tau iato lako pangulu to minaa sia pekaamberan nakua: Mangkamokan ussumpa kaleki kumua tae’pa kila ullepa’ kande, ke tae’pi kipatei tu Paulus.

¹⁵Iamoto totemo la mipamaleso sola Ada’ lako kamandang kumua anna sae ussolanni lako kalemi, susito kumua la miparessa tongan-tongan tu kara-karana, angki marea bangmo kami kipadoloi umpatei ke tae’pi narampo lako kalemi.

¹⁶Apa iatonna rangii anakna muane anak daranna Paulus tu kasipatammaran iato, malemi napalaku anna lao tama tangsi umparampoanni Paulus.

¹⁷Natambaimi Paulus misa’ tu pangulu surodado nakua: Solanni te pia iate lako kamandang; belanna den apa la napokada lako.

¹⁸Natambaimi nasolanni lako kamandang nakua: Natambaina’ tu Paulus ditarungku napalakui la kusolan te pia lako kalemi belanna den apa la napokada lako kalemi.

¹⁹Natoemi kamandang tu limanna, nasolanni lako to’ kasalanna, namekutana nakua: Apara tu la mupokada lako kaleku?

²⁰Nakuami: Den to Yahudi mangka sipatamma’ la umpalakui lako kalemi ammi solanni tu Paulus ke masiangi lao mennolo lako Ada’ susito kumua la miparessa tonga-tonganpa tu kara-karana.

²¹Apa da mimorai nanaran-naran tu tau iato la umparundu’i tu lalan penaanna, belanna la’bi patangpulo tu tau unnaunganni sia ussumpa kalena tae’ nala kumande sia mangiru’, ke tae’ pi napatei tu Paulus; totemoto marea bangmo umpeagii tu kamipalaloanna.

²²Nasusito nasuami kamandang tinde pia sule nakua ungkuanni: Da mupokada lenni lako misa’ duka tau, kumua mangkamo mupokada te iannate lako kaleku.

²³Natambaimi tu pangulu surodadu da’dua nakua: Pasakka’i tu surodadu duaratu’, ke te’te’ kasera bongi iate, na pitungpulo to ma’pakkanarang, na duaratu’ to ma’doke anna male lako Kaisarea.

²⁴Sia pasakka’i ba’tu pira-pira tu darang la dinii umpalangngan Paulus, ammi solan marampa’i lako to maraya Feliks.

²⁵Naoki’mi tu sura’ nakua lan:

²⁶Aku te Klaudius Lisias, umparampo pessimanku iako to maraya kabarre alloan Feliks.

²⁷Kumua tau iate nala’ka’imo to Yahudi, sia la napateimo angku lao sola surodadu urrampananni, belanna kurangimo kumua to Roma te tau iate.

²⁸Belanna la moraina’ unnissanni tu bannangna nanii umpasalai tau, kubaami rokko kupopennoloi lako Ada’na.

²⁹Kuissanmi ba’tu pira-pira tu passalan Sukaran alukna tinde tau nanii umpasalai, apa tae’ bangra misa’ tu kadiparapasanna tu sipatu la dinii umpatei ba’tu untarungkui.

³⁰Sia iatonna parampoanna’ tau, kumua nasipatamma’i tau te tau iate, ta’pa kupesuammi umpopennoloi lako kalemi, sia kupokadan parenta tu to umparapa’i kumua naparapa’ dioi olomi.

³¹Nasusito, naalani surodadu tu Paulus susitu disuanni, anna male ussolan bongii lako Antipatris.

³²Apa iatonna masiangto, sibokorammi to ma’pakkanarang anna sule lako tangsi.

³³Iatonna saemo lako Kaisarea, naparampomi tu sura’ lako to maraya sia napopennoloi tu Paulus.

³⁴Iatonna basami tu sura’, napekutanammi tu parenta nanii; na iatonna issanmi, kumua to Kilikia tu Paulus,

³⁵nakuami: La kuparessa sia tu kara-karamu, ke sangsaeammi tu to umparapa’ko. Napesuammi umpatadangi tu Paulus lan salassa’na Herodes.