Read Toraja-Sa'dan PENGGAURANNA RASULU’ 24 Bible Online

PENGGAURANNA RASULU’ 24 - Toraja-Sa'dan bible

PENGGAURANNA RASULU’ 24

¹Iatonna ma’limang alloammo saemi rokko tu Ananias Tominaa Kapua, sola ba’tu pira-pira pekaamberan sia misa’ goratongkon disanga Tertulus; ia nasangmo tu tau iato umparampoi lako to maraya tu kadiparapasanna Paulus.

²Iatonna ditambaimo tu Paulus, randukmi tu Tertulus umparapa’i, nakua: Tabe’ lako olona to kabarre-alloan, apa kamasokananta unparentakan angki rapa’, sia belanna kamanaranganta anta padenammi ba’tu pira-pira kameloan te bangsa iate.

³Naumba-umba nii tontongkanni untongananni tu mintu’nato, sia kitimang kurre sumanga’.

⁴Apa tae’ sia kula umboyo’i bangki’, dadi kupengkaborosan dio olota, anta perangiipi sidi’ te kadangki sola nasang.

⁵Belanna mintu’kan ungkabu’tui te tau iate butung ropu, apa iamo umpadenan kamarukkan mintu’ to Yahudi lan mintu’ lino, sia dadi pangulunna to sangserekan, iamotu to Sarani.

⁶Umpakaleanammo Banua Kabusungan; apa kila’ka’i sola nasangkan, sia la kipaolai salunna tu situru’na Sukaran alukki.

⁷Apa sae tu Lisias, kamandang ussau’ parrangkan nasabakki dio mai limangki, sia nasua tu mintu’ to umparapa’i sae mennolo lako kaleta;

⁸iake taparessai, inang la taissan sia dio mai kalena tu bannangna kinii sola nasang umparapa’i.

⁹Mintu’na tu to Yahudi, untamai tu pa’parapa’ iato, ungkatottongi kamua tonganna susito.

¹⁰Iatonna ayomi to maraya tu Paulus nasua ma’tutu, mebalimi nakua: Iatu kuissanna ba’tu pirang-pirang taunmiki’ dadi to mangra’ta’ kara-karana bangsa iate iamoto angku batta’ umpebalii te kara-karaku.

¹¹Kusanga ma’din sia takatappa’i, kumua tae’pa nala’bi sangpulo dua allona ka’nanku lao langngan Yerusalem massambayang.

¹²Natae’ bangra tau ungkitana’ sipa’kada tau lan Banua Kabusungan moi misa’ duka, ba’tu umpakulu-kulu to buda marukka, la lan banua pa’kombongan la umba-umba nii lan tondok.

¹³Sia tae’ duka nabelai umpokadangki’ manassana tu nanii umparapa’na’ totemo te.

¹⁴Apa inde sia tu kuaku dio olota kumua iatu situru’na lalan pekaalukan tu nasanga tu mati’ to sangserekan, inang susi tonganmo’ aku to umpenombai tu Puangna nene’ to doloku, sia kupatongan tu mintu’ disura’na lan sura’ Sukaran aluk sia sura’na nabi.

¹⁵Sia ma’passarena’ lako Puang Matua, susi duka tu mati’ tau umposande’i kumua la den tu kamalimbangunan dio mai to’ to mate la lako to malambu’ la lako to tang malambu’.

¹⁶Ia dukamora te ianna te kunii umpembela-belai, kumua angku tontong untambuk inaa masero pindan la langngan Puang Matua la lako tolino.

¹⁷Na ba’tu pira-piramo taunna angku sae umban pa’kamase bangsaku sia umpogauranni kapemalaran.

¹⁸Nasusi pole’ to denmi ba’tu pira-pira to Yahudi dio mai Asia ungkitana’ lan Banua Kabusungan tongku mangka usseroi kaleku, tae’ra kusisola to buda, sia tae’ dukara kamarukkan;

¹⁹iari to tau iato tu sipatu la indete olota umparapa’na, ke denni la naparapasanna’.

²⁰Apa tae’ dio ren tu tau iato, dadi da’ito na ia bangmo te tau iate mai umpokadai tu salaku tu natirona tongku bendan dio olona Ada’,

²¹ia manna to sangbuku kada, tu kupetamban tongku bendan lan tangngana kukua: Diona manna kamalimbangunanna to mate diparapasanna’ dio olomi te allo iate.

²²Apa iatu Feliks, tu unnissan melomo lalan kapekaalukan iato, umpadampapi tu kadira’tasanna tu kara-karana sia nakua: Ianna sae dao mai tu Lisias kamandang, la kura’ta’mo tu kara-karami.

²³Napa’parentammi lako pangulu surodadu kumua la dipatadang, apa da sia nadilaai bang, sia da nadigagai tu mai sitanda-tandanna sae untollongi.

²⁴Iatonna ba’tu pirang-pirang allo alla’na, saemi tu Feliks sola Drusilla bainena, tu Yahudi; napesuammi untambai to Paulus, naperangii tu diona kapatonganan lako Kristus, iamotu Yesu.

²⁵Apa iatonna uleleanni Paulus tu diona kamalamburan sia diona kauntaloian kale sia iatu kadipaolaian salu, mataku’mi tu Feliks, nama’kada nakua: Da’ito laomoko, nadennopa palambi’ku kutambaiko.

²⁶Sia iatu nasanga-sanga diong penaanna la nasorongan doi’ Paulus. Iamoto napesuan nenne’i mennolo, nasipa’ulele-lelean.

²⁷Apa, iatonna ganna’mo duang taun, nasondami Perkius Festus tu Feliks: belanna la morai unnala penaanna to Yahudi tu Feliks, napalan bangmi pa’tarungkuan tu Paulus.