Read Toraja-Sa'dan PENGGAURANNA RASULU’ 25 Bible Online

PENGGAURANNA RASULU’ 25 - Toraja-Sa'dan bible

PENGGAURANNA RASULU’ 25

¹Iatonna sae tu Festus lako lili’ parentana, ma’tallung alloan nake’de’ dio mai Kaisarea male langngan Yerusalem.

²Saemi tu mai pangulu to minaa sia to kapuanna to Yahudi umparampo kaumparapasanna Paulus;

³sia umpalakui kumua sangapaoi napopetambai Festus tu Paulus lako Yerusalem, na ia nanii ussolangi, belanna ia tinde tau inang mangkamo sipatamma’ la unnaunganni napatei dio lu lalan.

⁴Apa mebali Festus, kumua iatu Paulus, inang la dipatadangmo ia dio Kaisarea, sia ia duka inang natungkanammo la madomi’ male lako.

⁵Iamoto, nakuami, iatu sipatunna la lao tamalemo sola, sia ke denni kasalanna, ma’apari ke naparapa’i tau.

⁶Iatonna torromo sola Festus tu tau iato, tae’mora nalendu’i karua ba’tu sangpulo allona, namalemo lako Kaisarea; sia iatonna masiangto unno’ko’mi dao o’koran pangra’tasan kara-kara, napesuanni umbaai tu Paulus lako olona.

⁷Iatonna saemo ke’de’mi tu to Yahudi sae dao mai Yerusalem untalimbungi, naaroanni tu kara-kara masang, tu tang naissanna tinde tau umpamanassai.

⁸Anna nakua Paulus umpebalii kumua: Tae’ bang misa’ tu kasalangku untengkai Sukaran alukna to Yahudi ba’tu lako Banua Kabusungan, ba’tu lakoraka datu kapua.

⁹Apa belanna la morai tu Festus unnala penaanna to Yahudi, mebalimi lako Paulus nakua: La morairokomika lao langngan Yerusalem nadao dinii umparessai dio oloku te mintu’na kara-kara iate?

¹⁰Nakuami Paulus: Totemo ke’de’mo’ dio olo o’koran pangra’tasan kara-karana datu kapua, tu sipatunna la dinii umparessana’; tae’ aku kasalangku misa’ duka lako tu to Yahudi, tang la taissan dukaraka.

¹¹Iake kasalanna’ sia umpogau’ sipato’na la dinii umpateina’, tae’ kukanokai tu la mate; apa iake tae’i natonganna tu naparapasanna’ tau, tae’ tau misa’ la umpa’kamasean bangna’ lako tu mati’ tau. La kupa’petimbangampa lako datu kapua!

¹²Mebalimi tu Festus tonna nangka ussitimbang-timbangi sola Ada’ nakua: Iake la mipa’petimbanganni lako datu kapua, lu lakomokomi datu kapua.

¹³Ba’tu pirang-pirang allo undinnato, rampomi tu datu Agripa sola Bernike lako Kaisarea umpessitiroi Festus.

¹⁴Iatonna ba’tu pirang-pirang allomo torro sola duai dio, napokadami Festus lako datu tu kara-karana Paulus, nakua: Den misa’ to dipatadang inde napatorro bang Feliks,

¹⁵diopa’ Yerusalem naparampoi pangulu to minaa sia pekaamberanna tu kanaparapasanna, sia napalaku la kura’ta’ nadiukung.

¹⁶Kukuami mebali lako tu tau kumua tae’ biasanna to Roma umpa’kamasean misa’ tau’ ke tae’pi nadipasitingayo tu to diparapa’ na to ma’parapa’ sia dilo’bangan umpebalii tu kadiparapasanna.

¹⁷Iatonna sangsaeammo indete, tae’mo kupamarempai, sangadinna ia bangsiamo tonna masiangto angku unno’ko’ dao o’koran pangra’tasan kara-kara kupesuanni umpopennoloi tu tau.

¹⁸Tonna iato sangke’derammi tu mai to ma’parapa’, apa tae’ bangi umpatamai tu pa’parapa’ nanii kakadakean susitu kusanganna;

¹⁹den mannari ba’tu pira-pira kasisakkan diona lalan kapekaalukanna, sia iatu diona misa’ tau disanga Yesu matemo, nakuami Paulus kumua tuo.

²⁰Belanna napusa’imo’ umparessai te kara-kara iate, angku mekutana, kumua ba’tu la morai lao langngan Yerusalem, nadao nanii umparessai.

²¹Apa belanna napa’petimbangan Paulus napalakumi la dipatadang bangpa sae lako nara’ta’na datu kapua to Kabarre-alloan, kupesuammi umpatadangi, sae lako kupesuanna ussolanni lako datu kapua.

²²Nakuami Agripa lako Festus: Aku la morai dukana’ urrangi kalenai pebalinna tu tau iato. Nakuami: Masiangpa tarangii.

²³Iatonna masiangto saemi tu Agripa sola Bernike, sakka’ tanda kamala’biranna tama to’ pangra’tasan kara-kara naturu’ mintu’ kamandang sia to kapua lan tondok iato; napesuammi Festus tu Paulus dipopennolo.

²⁴Nakuami Festus: Tiromi, datu Agripa sia kita mintu’ tu diona ren indete, iamote tu to naparapa’ mintu’ to Yahudi lako kaleku, la dio Yerusalem la indete, sipetamba-tamban kumua tae’mo nasipatu la dipatuo.

²⁵Apa manassa lako kaleku, kumua tae’ bang ia misa’ penggauranna tu sipato’na la dinii umpatei. Sia belanna ia kalena la umpa’petimbangampi lako datu kapua To kabarrealloan, kupopa’ga’tarammi la umpesuanni lao ussolanni.

²⁶Apa tae’ kuissan tu la kusura’na lako to dipakabarre-alloan, iamoto kupopennoloi dio olota sola nasang; ontongpi lako datu Agripa, kumua anna den kukabu’tui tu la kusura’na, ke mangkai diparessa.

²⁷Belanna kusanga bekoki’, ke umpesuangki’ to dipatadang dipopennolo anna tae’ nadipamanassa tu kadiparapasanna.