Read Toraja-Sa'dan PENGGAURANNA RASULU’ 26 Bible Online

PENGGAURANNA RASULU’ 26 - Toraja-Sa'dan bible

PENGGAURANNA RASULU’ 26

¹Nakuami Agripa lako Paulus: Dilo’bangangko ma’kada, umpokada kalenai tu kara-karamu. Umbaenammi limanna tu Paulus anna pokadai tu pebalinna, nakua:

²Tabe’ dio olona datu Agripa, kusanga diong penaangku maupa’na’ te allo iate, belanna dilo’banganna’ umpokada pebalingku dio olona datu diona mintu’ kanaparapasangku to Yahudi.

³Ontong pissanpi puang unnissan tonganni tu mintu’ aluk sia kasisakkanna to Yahudi; iamoto kupalaku anna perangii marampa’na’ puang.

⁴Naissanmo mintu’ to Yahudi tu gau’ku tempon dio mai bitti’ku, tongku randuk sisola bangsaku dio Yerusalem.

⁵Belanna natandai tempon diona’ mai, na iake morai ma’din nakatottongi, kumua untoe tonganna’ atoran to Farisi, tu kasiturusan ungkanannangi kapekaalukanta.

⁶Na totemo, ke’de’na’ indete, apa diparapa’na’, belanna urrannuanna’ pangallu’ Naallu’ Puang Matua lako nene’ to dolota,

⁷ia dukamira tu pangallu’ iato narannuan tu sangpulo dua sukunna bangsata kumua anna dete’i, natontong keallo kebongi umpenombai Puang Matua. Iamora tu urrannuanni to, puang, nanii to Yahudi umparapa’na’.

⁸Umbara misanga? Misangaraka tang la dadi, ke Napamalimbangunni Puang Matua tu to mate?

⁹Tonganna tongan iate aku te, kusangamo diong penaangku, sipatuna’ umpogau’ buda kasiualian untingoi sanganNa Yesu to Nazaret.

¹⁰Ia duka tu iannato mangka kupogau’ dio Yerusalem, tonna pakuasana’ pangulu to minaa, angku kurungi ba’tu pira-pira tu to masallo’ lan pa’tarungkuan, sia rokkona’ kada turu’ tonna la dipatei.

¹¹Sia pembuda kupakario-rio lan banua pa’kombongan sia kuparuku umpa’kada solangi tu sanganNa Yesu, sia belanna tae’ pada kamare’dekangku lako, kulolaimi moi diomo tu tondok senga’.

¹²Nasusito iatongku male lako Damsyik situru’ tu pa’palalona sia parentana pangulu to minaa,

¹³pakalan tonna ma’tangngamo allo, puang, kukitami dio lalan iato tu arrang dao mai langi’, ondong ia parrangna anna allo, pandala-dala untikuina’ sola tu mintu’ to kusolan lumingka.

¹⁴Iatongki songka nasangmo rokko padang, kurangimi tu gamara umpa’kadaina’, ma’basa Ibrani, nakua: E Saulus, Saulus ma’apari mupakario-rioRa’. Masussako la unteba’ pebamba ma’duri bassi.

¹⁵Kukuami: MindaroKomi, Puang? Nakuami tu Puang iato: Akumo Yesu te mupakario-rio,

¹⁶apa malimbangunko muke’de’, belanna iari patunna te, angKu pa’pekitanan Kaleku lako kalemu, la kupamanassako mendadi rasulu’ sia sa’bi, nala diona tu kamangkangKu mukita, nala diona tu la Kuninna umpa’pekitanan Kaleku lako kalemu undinna;

¹⁷sia la Kupileiko dio mai te bangsa iate, sia dio mai to kapere’, tu Kunii ussuako lao;

¹⁸ammu pamillikki tu matanna, anna memboko’ dio mai malillinna lako maserona, sia dio mai parentana deata bulituk lako Puang Matua, anna kabu’tui kadipa’deian kasalan sia mana’ sisola tu mintu’ to dipamaindan tete dio kapatonganan lako Kaleku.

¹⁹Iamo patunna to, datu Agripa, anna tae’ kupasalai penaa unturu’i tu kukitanna lao dao mai suruga,

²⁰sangadinna kupa’peissanan dolo, nala lako to dio Damsyik, nala dio Yerusalem sia dio mintu’ tana Yehuda, susi duka lako to kapere’, kumua anna mengkatoba’ sia sule lako Puang Matua anna umpogau’ penggauran sitinaya katobaran.

²¹Belanna iamira tu mintu’nato, anna la’ka’ina’ to Yahudi lan Banua Kabusungan, la morai umpateina’.

²²Apa belanna ungkabu’tuimo’ pa’tunduan dio mai Puang Matua sae lako te allo iate, angku ke’de’ siapa ungkatottongi dio tingayona mintu’ tau, nala to bitti’ nala to kapua, sia tae’ kupokadai tu apa senga’, sangadinna napokadannapi tu mai nabi sia Musa, tu la dadi undinna,

²³iamotu Kristus sipatu umperasai kamaparrisan sia Iamo bunga’na malimbangun dio mai to’ to mate la umpa’peissanan misa’ arrang lako te bangsata sia lako duka to kapere’.

²⁴Marassanmo umpokadai tu pebalinna susito, ma’kadami tu Festus sumaraba, nakua: Umbai katama-tamanko Paulus, kamanarangan matarru’mu umpakatama-tamanko.

²⁵Apa nakua Paulus: Tae’ kukatama-taman, o Festus to kabarre-alloan, sangadinna tonganna tu kupokada sia lu diong mai penaa malino.

²⁶Belanna naissanan nasang datu tu mintu’nato, iamoto angku barani umballakan nasangi lako, tu kukatappa’i kumua mintu’na tu iannato tae’ misa’ tang naissan belanna mintu’na te tae’ nadadi dio lu tondok torro misa.

²⁷Tapatonganraka tu mai nabi, datu? Kuissan kumua tapatongan.

²⁸Ma’kadami tu Agripa lako Paulus nakua: Madomi’ bangna’ mupopento Sarani.

²⁹Nakuami Paulus: Kupalaku ria langngan Puang Matua, kumua nala madomi’ nala salako-lakona tae’ na kamu manna, sangadinna ia duka tu mintu’ to urrangimo’ te allo iate, ke ma’dinni la susina’, sangadi iate pepungo tae’ iato.

³⁰Ke’de’mi tu datu sola to maraya sia Bernike na iatu mintu’ to nasolan unno’ko’,

³¹na iatonna memboko’mo sipa’kada-kadami, nakua: Tae’ bangra napogau’ tu tau iatu, tu sipato’na la dinii umpatei ba’tu untarungkui.

³²Nakuami Agripa lako Festus: Ma’dinmo dirampanan tu tau iatu, ke tae’ siai nala umpa’petimbanganni lako datu kapua tu kara-karana.