Read Toraja-Sa'dan PENGGAURANNA RASULU’ 27 Bible Online

PENGGAURANNA RASULU’ 27 - Toraja-Sa'dan bible

PENGGAURANNA RASULU’ 27

¹Iatongki dipamanassamo la male massombaran lako Italia, nasorongmi tu Paulus sola ba’tu pira-pira to ditarungku senga’ lako pangulu surodadu disanga Yulius, to dio mai kaponanna datu kapua.

²Kendekmokan langngan kappala’ dio mai Adramitium, la male urrundunan randan tasik dio Asia, angki ke’de. Iatu kisisolan Aristarkhus, to Makedonia dio mai Tesalonika.

³Iatonna masiangto, lendu’mokan dio Sidon. Iatu Yulius nakasokanni tu Paulus, napalaloi lao sitiro tu mai sangmanena anna kamayai.

⁴Iatongki ke’de’ dio mai massombarammokan urrundunan Siprus, belanna angin ma’sissang.

⁵Iatongki lendu’imi tu tasik Kilikia sia Pamfilia, rampomokan lako Mira dio tana Likia.

⁶Nakabu’tuimi tinde pangulu surodadu inde to dio tu kappala’ lu dio mai Aleksandria la lu lako Italia, napakendekkan inde to kappala’ iato.

⁷Ba’tu pirang-pirang allokan massombaran umpapela’-pela’ bangi, sia maparri’kan urreke’i tu Knidus; belanna tang natangga’kan angin, massombarammokan urrundunan lebukan Kreta dio tingo Salmone.

⁸Maparri’kan unnolai to, kimane rampo lako disanga Labuan Ballo, sikandappi’ Lasea.

⁹Iatonna ba’tu pirang-pirang allomo susi bangto, payan kasanggangan manna dio tu kapassombaran iato, belanna lendu’mo tu allo dinii ma’puasa, ma’pakilalami tu Paulus lako tinde tau nakua:

¹⁰E tuang-tuang, kutiro bangmo te kapassombaran iate nanii kasanggangan dio sia karugian kapua, tae’ kumua ia manna tu lurang sia iate kappala’, sangadinna penaanta duka.

¹¹Apa iatinde pangulu surodadu napatongan ia tu durumudi sola kapiteng na iatu mintu’na napokada Paulus.

¹²Belanna tae’ namelo torroanna tu labuan iato, tae’ napomeloi kappala’ ke attu kamadinginan, budami tau ussangai melo la tarru’ massombaran inde to dio mai, kumua nalambi’ sia manii lako Feniks, natorro inde to dio lan attu kamadinginan, iamo misa’ labuan dio lebukan Kreta, untingoi angin ma’pili’ lu lo’ mai sia ma’pili’ lu daa-daa mai dio rampe matampu’. La

¹³Iatonna mangiri’-iri’ pela’mo tu angin ma’palulo’ mai, nasangami kumua la dadimo tu diongna penaanna, unnendekammi sau, namassombaran umpebiring lebukan Kreta.

¹⁴Apa tae’ namasai alla’na saemi talimpuru’ disanga Yurakulon, ma’pamumbuk dao mai (gantananna).

¹⁵Iatonna baami angin tu kappala’ sia tang nabelamo untanananni, kipopa’elo’na bangmi, namale umbaai angin.

¹⁶Sia iatonna baakanni angin urrundunan lebukan bitti’ disanga Kauda, lendu’mi maparri’ki urriu’ lopi.

¹⁷Iatonna dipakendekmo tu lopi, didakarammi tangnga’ ussambe’i tu kappala’, sia belanna dikatakuran la tipessarin dao Sirtis, dipopengkalao nasangmi tu sombaran namale bang unnayang-ayang.

¹⁸Belanna napatikambobong lenkan angin bara’, natibemi tau rokko tasik tu lurang kappala’ pira tonna masiangto,

¹⁹sia iatonna ma’duang bongian to, kami kalenami untibei pira tu parea kappala’.

²⁰Iatonna tae’mo dikita tu allo sia bintoen ba’tu pirang-pirang allo sia napamumbuk tonganmokanni tu angin bara’, ma’katampakannu pu’du’mi rannungki la rampo mana’pa.

²¹Belanna masaimo tu tau tang kumande, ke’de’mi tu Paulus lan tangnga-tangngana tau nama’kada nakua: E tuang-tuang, iakemmi perangii tu kadangku, kumua da anta massombaran dio mai Kreta, tilendokki’ dio mai te kasanggangan sia karugian iate.

²²Apa totemo duka kupakilalakomi ammi pabatta’ penaammi; belanna tae’komi misa’ la pa’de penaammi, sangadiri ia manna te kappala’.

²³Belanna sangmai’ bongi den malaeka’Na Puang Matua, tu Puang kupopuang sia kupenombai, ke’de’ dio sa’deku,

²⁴nakua: Da mumataku’, Paulus! Tae’ nasalai tang mennoloko dio olona datu kapua, tiromi Nasorongmo Puang Matua lako kalemu tu mintu’ to musolan massombaran.

²⁵Iamoto, e tuang-tuang, pabatta’i tu penaammi, belanna kukatappa’i tu Puang Matua, kumua tumba tu kada Naparampo lako kaleku, susi dukamoto la dadi.

²⁶Apa tae’ nasalai tang tipengkauki’ lako misa’ lebukan.

²⁷Iatonna saemo lako bongi ma’sangpulo a’pa’na, male bangmokanni unnayang-ayang dio tasik Adria, agi-agimo tangnga bongi nasangami tu mai kalasi mandappi’mo tu gantanan,

²⁸nabuangmi tu batu pelantuk, nasuka’i duangpulo da’pana mandalanna; tae’ nasangapa mambelanna inde to, nabuangomi tu batu pelantuk, nasuka’i sangpulo lima da’pana.

²⁹Sia belanna nakatakuran kumua tibasse manii langngan batu karang, naparokkomi tu sau a’pa’ dio to’ pollo’ kappala’, sia nakua kenna masi- angmo.

³⁰Apa iatonna undaka’mo tangnga’ tu mai kalasi la morai umpallaian kalena untampei tu kappala’ sia napopengkalao rokko tasik tu lopi naangga’-angga’i urrorro’ sau dio mai tingo kappala’,

³¹nakuami Paulus lako pangulu surodadu sia mintu’ surodadu: Iake tae’i natorro lan kappala’ tu mati’, denparaka mila lessu’ len.

³²Sangiammi tu surodadu urra’ta’i tu ulang lopi, napopa’elo’nai nabaa uai.

³³Iatonna la masiangmo napakilala nasangmi Paulus tu tau la kumande sia nakua: Allo ma’sangpulo a’pa’namo te minii ma’penanda bang, silambi’ bangkomi tangdia’, tae’ bang apa mikande len.

³⁴Iamoto kupalakui: kumandekomi, iari to tu la mipobatta’ lessu’ dio mai kasanggangan. Belanna tae’ sanglamba’ beluak la rondon dao mai ulunna misa’ duka tau te kamu sola nasang.

³⁵Iatonna mangka ma’kada susito, naalami tu roti nama’kurre sumanga’ langngan Puang Matua dio tingayona mintu’ tau natepu-tepui anna kumande.

³⁶Batta’mi penaanna sola nasangi, anna kumande.

³⁷Iatu kami mintu’ lan kappala’ iato, duaratu’kan pitungpulo nnannan.

³⁸Iatonna dia’mo tu tau, dipembuangammi rokko tasik tu gandung kumua naunnayang tu kappala’.

³⁹Iatonna masiang, tae’ natandai tinde tau tu padang iato, apa den baba minanga natiro marante randanna; nasitangnga’imi tinde tau, kumua nabela sia manii umpatitu’tunni inde to tama tu kappala’.

⁴⁰Naendekan nasangmi tu sau namale unnayang-ayang bang tu kappala’ lan lu tasik, sia nasalodaran tu pori kemudi, napakendekki tu sombaran kapua kumua naala angin, namane umpopangudu lu tamai randan tasik.

⁴¹Iatonna saemo lako misa’ karangan ma’tombon, napengkauammi tu kappala’ lako, anna lammak tu ulunna, tae’mo natiberu len, apa iatu pollo’na pura sanggang napobua’ bombang.

⁴²La moraimi tu mai surodadu la umpatei tu mintu’ to ditarungku, kumua da naden misa’ mallai tarru’ ke unnorongi.

⁴³Apa belanna la morai tu pangulu surodadu la ungkarimmanni Paulus, naampaimi tu lalan penaanna sia napa’parentan kumua mintu’na to manarangna unnorong la mekkondong rokko tasik, nadolo langngan gantanan.

⁴⁴Na iatu mai senga’na, la mentoe pira lako papan, na lako parea kappala’ sanggang pira. Nasusito kendek marampa’ nasangmi langngan gantanan.