Read Toraja-Sa'dan PENGGAURANNA RASULU’ 4 Bible Online

PENGGAURANNA RASULU’ 4 - Toraja-Sa'dan bible

PENGGAURANNA RASULU’ 4

¹Marassan bangsia sola duai umpa’kadai tu tau, saemi lako kalena tu mai tominaa sia pangulu Banua Kabusungan sisola to Saduki,

²sia lendu’ magi’gi’na, belanna naada’i tu tau sia napa’peissanan, kumua tete lan Yesu den tu kamalimbangunan dio mai to’ to mate.

³Natingkanmi tinde rasulu’ sola duai, anna baai tama inan dinii umpatadang tau, sae lako masiangna, belanna bongimo.

⁴Apa budamo tu tau urrangii tu kada iato ma’patongan; iatu muane agi-agi limangsa’bu.

⁵Iatonna masiang to sirampunmi dio Yerusalem tu mintu’ pangulunna sia pekaamberanna sia pandita Sura’,

⁶tu mai sia Hanas Tominaa Kapua, sia Kayafas, sia Yohanes sia Iskandar, sia mintu’na tu mai to ma’rapu dio mai Tominaa Kapua dio ren.

⁷Iatonna pesuanni ussolanni tama tangnga tu rasulu’, nakutanaimi nakua: Kamatotoran apara sia mindara sanga mipotete umpogau’i tu iannato?

⁸Pakalan ma’kadami Petrus tu Naponnoi Penaa Masallo’ lako tinde tau nakua: E pangulu sia pekaamberan to Israel,

⁹iake diparessakanni te allo iate diona kameloan lako misa’ to masaki, tu napomaleke te tau iate,

¹⁰la miissan sola nasang sia mintu’ to Israel, kumua tete dio sanganna Yesu Kristus, to Nazaret, tu mangka mia’ta’ sia Napamalimbangun Puang Matua dio mai to’ to mate, sanga iato anna maleke te tau iate bendan dio tingayomi.

¹¹Iatu Yesu iamora batu misayu kamu pande, mendadimo batu parandangan.

¹²Tae’ naden kamakarimmanan dio misa’ duka tau; belanna lan nasambo langi’ tae’ sanga senga’ dipa’kamasean lako to lino tu sipatunna la tapomakarimman.

¹³Iatonna tiroi tu kabattaranna penaanna Petrus sola Yohanes, sia naissan kumua tae’ nadiada’i sura’ sukaran aluk sia to biasa bangsia, mangngami, maneri natandai kumua iatinde tau sola duai sisolamo Yesu pirambongi’.

¹⁴Sia belanna natiro tinde to malekemo dio ke’de’ nasisolan, tae’mi nabelai la unte’ge’i.

¹⁵Iatonna mangkamo ussuai sola duai sun lan mai to’ Ada’ lompo nasipada-padaimi tinde tau,

¹⁶nakua: Apara la tagauranni te tau iate? Belanna napadenmo tu tanda kalle-kallean manassa, tu lele lako mintu’ tau lan Yerusalem natae’mo tabelai unte’ge’i.

¹⁷Apa dikua da anna sarorak-rorakna lako tau tu iannato, melo ke tapakarrangi tu tau iatu, da nanenne’ ma’kada-kada tete dio sanga iato lako misa’ duka tau.

¹⁸Natambaimi sola duai nabenni parenta kumua damo nama’kada len ba’tu mangada’i tete dio sanganNa Yesu.

¹⁹Apa mebali Petrus na Yohanes sia nakua ungkuanni tinde tau: Timbang kalenai, ke la sipatui dio oloNa Puang Matua tu umpalosongi unturu’komi na unturu’ Puang Matua.

²⁰Belanna kami te ma’apa-apai angki la untorei umpokadai tu apa mangka kikita sia kirangi.

²¹Apa sanapakarrang-karrangna, namane urrampananni sola duai; belanna tae’ nakabu’tui tu la naninna umpa’peukunganni, apa mataku’ lako to buda, belanna umpakala’bi’ nasang Puang Matua tu tau diona tu apa mangka dadi.

²²Belanna iatu to nanii umpogau’i lako kalena tu tanda mangnga anna maleke, la’bimo patangpulo taunna dadinna.

²³Iatonna tassu’mo malemi sola duai lako solana, nauleleanni tu mintu’ apa nakuanni pangulu to minaa sia pekaamberan.

²⁴Iatonna rangi tinde tau tu iannato, metambami langngan Puang Matua umpamisa penaa nakua: O Puang, Kamumo tu umpadadi langi’ sia lino sia tasik na mintu’ issinna;

²⁵tu mangka umpokadai Napatudu Penaa Masallo’ nasun dio pudukna nene’ to doloki Daud, kumua: Ma’apari tu to kapere’ anna maramba, sia anna tangnga’ra tae’na gai’na tu mintu’ bangsa!

²⁶Mintu’na datu lan lino ke’de’, sia iatu mai pangulu sirampun, la unnea Puang sia unnea KristusNa.

²⁷Belanna tonganna tongan lan te tondok iate mangkamo sirampun tu sia Herodes na Pontius Pilatus sola to kapere’ na mintu’ bangsa Israel unnea Yesu To masallo’Mi, tu mangka Mitokko,

²⁸la ussundunni tu apa nalampak dolomo limamMi sia tanan penaamMi, kumua la dadi.

²⁹Na totemo te, o Puang, tiromi tu mintu’ pa’pakarrangna, sia benni pa’kamasean te taumMi anna batta’, umpokadai tu kadamMi,

³⁰amMi unne’te’ lima kuasamMi la umpamaleke tau, anna dadi tu mai tanda mangnga sia tanda kalle-kallean tete dio sanganNa Yesu To masallo’Mi.

³¹Iatonna mangkamo massambayang, tiseno-senomi tu inan nanii sirampun, anNa ponnoi Penaa Masallo’ sola nasangi, anna batta’ umpokadai tu kadanNa Puang Matua.

³²Iatu to buda tu to ma’patonganmo situru’ bang sia sanginaa, sia tae’ bangi misa’ umpokadai tu apa naampui misa, sangadinna mintu’i umpoapai sola.

³³Kamatotoran kapua napomatoto’ tu mai rasulu’ ungkatottongi tu diona kamalimbangunanNa Yesu, sia kapua pa’kamasean lako tinde tau sola nasangi.

³⁴Moi misa’i tae’ bang kasumpuan, belanna padami tau unnampui padang ba’tu banua, nabalukan nasang, nabaai tu allinna tu apa nabalukan,

³⁵napadiongi to’ lentekna rasulu’, napapantanni lako tu tau tu napokurangna.

³⁶Iatu Yusuf naganti rasulu’ Barnabas, — ke dipallemba’i battuananna anak pa’pakatana, — to Lewi, dio mai Siprus,

³⁷unnampui pa’lak sanginan, nabalukanni, nabaai tu allinna, napadiong dukai to’ lentekna rasulu’.