Read Toraja-Sa'dan PENGGAURANNA RASULU’ 5 Bible Online

PENGGAURANNA RASULU’ 5 - Toraja-Sa'dan bible

PENGGAURANNA RASULU’ 5

¹Den misa’ tau disanga Ananias sola bainena disanga Safira umbalukan apanna;

²napatorro senga’mi sangsesena tu allinna, naissan duka bainena, nabaai tu sangsesena, napadiongi to’ lentekna rasulu’.

³Apa nakua Petrus: E Ananias, ma’apai naponnoi deata bulituk tu penaammu la ungkamorang-morangi Penaa Masallo’, ammu patorro senga’i sangsese tu alli padang?

⁴Iatonna tang dibalukampa tang apammu misaraka? Na iatonna mangkamo dibalukan, tang ikoraka ungkuasai tu allinna? Ma’pai ammu tangnga’i lan penaammu tu penggauran iato? Tangia tolino mukamorang-morangi, sangadinna Puang Matua.

⁵Iatonna rangii Ananias tu kada iate songkami, naka’tu penaanna. Lendu’mi mataku’na tu mintu’ to urrangii tu iannato.

⁶Ke’de’mi tu mai to mangura inde to dio nasamboi, nabullei lako salian nalamunni.

⁷Agi-agi tallung diang lendu’nato, tamami tu bainena, tae’ bang naissanni tu apa mangka dadi.

⁸Nakuami Petrus ungkuanni: Pokadanna’, tongannaraka padamo allinna to tu padang mangka mibalukan? Nakuami: Pada tonganmo to tu allinna.

⁹Apa nakua Petrus lako: Ma’apari misituru’iri untoba-toba PenaanNa Puang Matua? Tiromi tu lentekna to ullamun muanemu dio to’ ba’ba, tau iamoto tu la umbulleko lako salian.

¹⁰Songka bangsiami diong to’ lentekna Petrus, nata’pa ka’tu penaanna. Tamami tu mai to mangura, nakabu’tui matemo tinde baine; nabullemi lako salian nalamunni dio to’ sa’dena muanena.

¹¹Lendu’mi mataku’na tu mintu’ tau lan kombongan sia mintu’ tu to urrangii tu iannato.

¹²Budami tanda kalle-kallean sia tanda mangnga napadenanni rasulu’ tu to buda, sia sanginaa sola nasangi sirampun lan sarambinna Salomo.

¹³Iatu mai senga’na tae’ nabarani mentirau sola tinde tau, apa napakala’bi’ ia to buda tinde tau.

¹⁴Sakerangngan-rangngannami bilanganna tu to umpatongan Puang, lendu’ budanna muane sia baine,

¹⁵naurunganni nabaa tau sun lako to’ batatta tu mai to masaki, napatorroi diong ampa’ sia sindangan, kumua den sia manii misa’ tinde tau naonganni bayo-bayona Petrus ke lendu’i.

¹⁶Buda duka tau dio mai tu tondok untikui Yerusalem sirampun umbaa to masaki sia to nataba deata masussuk; mintu’nato napamaleke nasang.

¹⁷Ke’de’mi tu Tominaa Kapua sola mintu’ solana, tu mai sangserekanna to Saduki, ponno bangmo kamabirisan lan penaanna,

¹⁸anna tingkanni tu mai rasulu’ anna kurungi tama pa’tarungkuan lan tondok.

¹⁹Apa nabungka’ malaeka’Na Puang tu ba’ba pa’tarungkuan tonna bongi, natassu’i lan mai sia nakua:

²⁰Laomokomi mike’de’ lan Banua Kabusungan umpokadai lako to buda mintu’ to kada dipotuo.

²¹Iatonna rangii susito, tae’pa bongi malemi tama Banua Kabusungan namangada’i lan. Saemi Tominaa Kapua sola mintu’ solana, urrampunni tu to diala Ada’ lompo sia mintu’ pekaamberan to Israel, nasuai tu tau lako pa’tarungkuan la unnalai tu mai rasulu’.

²²Apa tae’mo nakabu’tui tinde to disua lan pa’tarungkuan; anna sule umpokadai,

²³nakua: Iatu pa’tarungkuan manda’ digonting kikarampoi, sia iatu pa’ronda’ ungkampai pa’tarungkuan ke’de’ bang dio lu to’ ba’ba; apa iatongki bungka’i, tae’ bangmora tau misa’ kikabu’tui lan.

²⁴Iatonna rangii pangulu Banua Kabusungan sia pangulu to minaa tu kada iato, littumi untangnga’i tu iannato kumua ba’tu ma’patumbami undinna.

²⁵Saemi misa’ tau ma’kada lako nakua: Tiromi, iatu tau mipatama pa’tarungkuan ke’de’mo lan Banua Kabusungan unnada’i to buda.

²⁶Tonna iato laomi pangulu Banua Kabusungan sola pa’ronda’na unnalai tu mai rasulu’, apa tae’ naala maparrangi, belanna mataku’ la natumbui batu to buda.

²⁷Nabaami tu mai rasulu’ tama to’ Ada’ lompo. Anna paressai Tominaa Kapua,

²⁸nakua: Tang kipakare’na-re’na tonganrokomika, kumua da mimangada’i tete dio sanga iato? Apa samipatale’-tale’naora tu pangadarammi lan mintu’ Yerusalem, sia la moraikomi umpopa’indo’i dio kaleki tu raraNa Tau iato.

²⁹Apa mebali tu Petrus sia iatu mai rasulu’ nakua: Sipatu tau umpalosongi naturu’ tu Puang Matua na iatu tolino.

³⁰Iatu Puang Matua, tu Puangna nene’ to dolota mangkamo umpamalimbangun Yesu, tu mangka mipatei mitoke’ lako kayu.

³¹Iamora Te tu napakalangka’ lima kananNa Puang Matua mendadi Pangulu sia To pakarimmanan la umpa’kamasean katobaran lako to Israel sia kadipa’deian kasalan.

³²Sia kamimo te tu ungkatottongi tu iannate, ten dukato tu Penaa Masallo’ Napa’kamasean Puang Matua lako mintu’ to unturu’I.

³³Iatonna rangii tinde tau te kada iate, lendu’mi re’dekna ara’na sia la morai umpatei tu mai rasulu’.

³⁴Apa ke’de’ misa’ to Farisi disanga Gamaliel lan tu kombongan, iamo misa’ pandita Sukaran aluk nakasiri’ mintu’ tau; napesuammi umbaai sattu’ lako salian tinde tau.

³⁵Nakuami ungkuanni tu to ma’kombongan: E to Israel, suka’-suka’komi kalemi diona tau iate mai, apa tu la migauranni.

³⁶Dolonapa anna bendan Teudas, ussanga kalena to paa; na iatu to unturu’i agi-agi a’pa’ratu’ muane. Anna di patei, natisambo’-sambo’ tu mintu’ to unturu’i, tae’ bangmo apa-apa.

³⁷Undinna na iate tau iate, bendanmi Yudas to Galilea, tonna disura’ sanganna tau; nabuda tau unturu’i unnea parenta; anna mangsan duka, nadipasisarak-sarak tu mintu’ to unturu’i.

³⁸Dadi totemo kukua mati’: da mipatumbai te tau iate mai, sia popa’elo’nai ia; belanna iake tuo dioi tolino tu lalan penaa iate ba’tu pengkarangan iate, inang la disanggang;

³⁹apa iake tuo dioi Puang Matua, tae’ mibelai ussanggangi, miurunganni manii siuali Puang Matua. Napatonganmi to ma’kombongan tu kadanna,

⁴⁰natambaimi tu mintu’ rasulu’, nabambai sia nagagai ma’kada tete dio sanganNa Yesu; namane urrampananni.

⁴¹Parannumi penaanna soro’ lan mai kombongan, belanna disanga sipato’ natanggung tu kadisa’san belanna Sanga iato.

⁴²Tae’ bangmi natorroi mangada’i keallo-keallo lan Banua Kabusungan sia dio lu banuanna tau sia umpa’peissanan Kareba-kaparannuan kumua iatu Yesu, iamo Kristus.