Read Toraja-Sa'dan PENGGAURANNA RASULU’ 6 Bible Online

PENGGAURANNA RASULU’ 6 - Toraja-Sa'dan bible

PENGGAURANNA RASULU’ 6

¹Tonna iato, tonna sakerangngan-rangngannamo tu to menturu’, bu’tumi kapa’nuku-nukuanna tu to Yahudi ma’basa Grika lako to Ibrani, belanna tae’ nadipoinaa ungkaritutui keallo-keallo tu mai baine balunna.

²Narampunmi tinde rasulu’ sangpulo dua tu to buda menturu’mo, nakua: Tae’ kisipatu, la umpasalai penaa tu umpalolang kadanNa Puang Matua, belanna umparakai kande dao meda.

³Iamoto, e mintu’ siulu’, pileimi pitu lan mai te kamu mintu’, tu tae’na sayuanna sia Naponnoi Penaa Masallo’ sia kakinaan, tu ma’dinna la kiala untoei te pengkarangan iate.

⁴Apa kami te la tontongkan massambayang sia umpalolang kadanNa Puang Matua.

⁵Napasiolami mintu’ to buda te kada iate, napilei tu Stefanus, to lantuk kapatongananna sia ponno Penaa Masallo’, na Filipus na Prokhorus na Nikanor na Timon na Parmenas na Nikolaus, iamo misa’ to Yahudi dipasada’, to dio mai Antiokhia.

⁶Nasolan nasangmi lako rasulu’ tu tau iato; massambayangmi tu rasulu’, naremme’i rasulu’ limanna tinde tau.

⁷Sarorak-roraknami tu kadanNa Puang Matua, sia sakerangngan-rangnganna bilanganna tu to menturu’ dio Yerusalem sia lendu’ duka budanna to minaa umpengkaolai kapatonganan.

⁸Umpadenmi ba’tu pira-pira tanda mangnga sia tanda kalle-kallean dio to’ to buda tu Stefanus naponnoi pa’kamasean sia kamatotoran.

⁹Apa den ba’tu pira-pira tu to naala bilangan lako banua pa’kombongan, tu disanga banua pa’kombonganna to Libertini sia to Kirene sia to Aleksandria sia to Yahudi dio mai Kilikia na Asia, ke’de’ nasita’genan Stefanus.

¹⁰Apa tae’ nabelai tinde tau unneai tu kakinaan sia Penaa urrondongi ma’kada-kada.

¹¹Naada’imi ba’tu pira-pira tu tau la umpokadai kumua: Kirangimo umpokadai tu kada solang lako Musa sia Puang Matua.

¹²Nasarrangmi tu to buda sia pekaamberan sia pandita Sura’, nalumpa’i tu Stefanus sia nariu’-riu’ nabaai tama to’ Ada’ lompo.

¹³Sia napopentingayo tu sa’bi tang tongan, tu umpokadai kumua: Tae’ natorei te tau iate umpasunanni kada solang te inan maindan sia Sukaran aluk,

¹⁴belanna kirangimo ma’kada kumua la narondonni Yesu to Nazaret te inan iate sia la nasondai tu atoran Sukaran aluk napondokangki’ Musa.

¹⁵Iatonna pemarangai mintu’ to unno’ko’ lan kombongan tu Stefanus, natiromi tu rupanna susito rupa malaeka’.