Read Toraja-Sa'dan PENGGAURANNA RASULU’ 7 Bible Online

PENGGAURANNA RASULU’ 7 - Toraja-Sa'dan bible

PENGGAURANNA RASULU’ 7

¹Nakuami Tominaa Kapua: Tongannaraka tu kadanna tau?

²Nakuami Stefanus mebali: E kamu mintu’ kuposiulu’na sia kupoambe’na, perangiimi: Iatu Puang Matua unnampui mintu’ kamala’biran, mangkamo umpa’pekitanan Kalena lako nene’ to dolota Abraham tonna diopa Mesopotamia, tae’pa natorro dio Haran.

³Nakuami Puang ungkuanni: Sunko lan mai tondok kadadiammu, sia dio mai sangdadiammu, ammu male lako tondok la Kupakitangko.

⁴Sunmi dio mai padang to Kasdim, natorro dio Haran. Undinna tonna matemo ambe’na, Napalengka’mi Puang Matua dio mai sae indete padang iate, te mitorroi totemo.

⁵Tae’ Napa’kamaseanni lako tu mana’ matontongan misa’ lan te padang iate, moi sangpellesean tae’ duka, apa Naallu’ umpa’kamaseanni lako te padang iate nasituranni umpoossoranni moi anna tae’pa nakianak.

⁶Susite tu kadanNa Puang Matua: Iatu tarukna la torro to sae lan tondok senga’, nadipokaunan sia dipakario-rio a’pa’ratu’ taunna.

⁷Sia nakua kadanNa Puang Matua: La Kuukung tu bangsa umpokaunanni namane sun dio mai, anna menomba lako Kaleku lan inan iate.

⁸Anna benni basse sunna’, na susito undadiammi Ishak tu Abraham anna sunna’i tonna allo ma’pengkaruanna, na Ishak undadian Yakub, na Yakub undadianni tu sangpulo dua nene’ to dolo.

⁹Apa mangimburu tu nene’ to dolota lako Yusuf anna balukanni lako Mesir, anNa rondongi Puang Matua,

¹⁰sia nalendokan dio mai mintu’ kamaparrisan anna benni pa’kamasean sia kakinaan dio olona Firaun, datu Mesir, tu unnalai pangulu dio mintu’ lili’na tana Mesir sia lan banuanna datu.

¹¹Saemi karorian pannang dio mintu’ lili’na tana Mesir na Kanaan sia kamaparrisan kapua, anna tae’ nanii unnala kande tu nene’ to dolota.

¹²Apa iatonna rangii Yakub kumua den gandung dio Mesir, nasuami tu nene’ to dolota lako tonna bunga’na.

¹³Iatonna ma’penduammo umpa’petandammi kalena tu Yusuf lako tu mai siulu’na, sia maneri natandai Firaun tu kadadianna Yusuf.

¹⁴Napesuanni Yusuf untambai tu Yakub ambe’na sia siulu’na sia pa’anakanna pitungpulo llima tau budanna.

¹⁵Malemi tu Yakub rokko Mesir, undinna matemi sia ia duka tu nene’ to dolota;

¹⁶Nabaami tau tu batang rabukna lako Sikhem, napeliangi tama liang naalli Abraham sangsama-sama dio mai tarukna Hemor dio Sikhem.

¹⁷Iatonna samandappi’-dappi’namo tu attu pangallu’ Naallu’ Puang Matua lako Abraham, sabuda-budannami tu to Israel dio Mesir,

¹⁸sae lako tonna datu Mesir senga’ randuk ma’parenta, tu tang untandainna Yusuf.

¹⁹Natangnga’mi datu iato tu bangsata sia napakario-rio tu nene’ to dolota, belanna naparuku untibei tu anak mane dadinna, kumua da napatale’ bati’.

²⁰Attu iamoto nadadi tu Musa sia lendu’ melona pantarisanna, natallungbulan didaranai lan banuanna ambe’na.

²¹Iatonna tibemi, narurumi lai’na Firaun, nakaduttu’i susito anak dadianna.

²²Naada’imi tau kamanarangan to Mesir tu Musa, naurunganni pasau’ nala diona kada nala diona penggauran.

²³Iatonna ganna’mo patangpulo taunna dadinna, tiakka’mi penaanna la morai untollongi mintu’ rapunna, iamotu mai to Israel.

²⁴Iatonna kita misa’ to dipakario-rio, napembuloimi, sia napembalaran tinde to dipakario-rio napatei tu to Mesir.

²⁵Nasanga Musa naissan tu mai rapunna kumua ia napotete anna pa’kamaseanni Puang Matua lako tau iato mai tu kadirampanan, apa tae’ naissanni te tau iato mai.

²⁶Iatonna masiang to loo pole’omi untiroi tonna sibobo’ tau, napasiporai nakua: E sangmane, tang to sirapurokomika te; ma’apai ammi sibala’-bala’?

²⁷Apa natumpu tinde to umbala’-bala’ solana nakua: Mindara unnalakomi pangulungki sia to mangra’ta’ kara-karaki?

²⁸La morairakomika umpateina’ susitu to Mesir iongi’?

²⁹Belanna kada iato mallaimi tu Musa, nadadi to sae dio tana Midian; na inde to dio undadiammi pia muane da’dua.

³⁰Iatonna patangpulo pole’omo taunna, nakitami dio padang pangallaran sikandappi’ buntu Sinai tu malaeka’ misa’ lan to’ duri, nanii api dukku.

³¹Iatonna kitai Musa tu iannato, napomangngami tu apa kalle-kallean nakita; iatonna reke’mi la napemaranga, narangimi tu gamaranNa Puang ma’kada Nakua:

³²Akumote tu Puangna nene’ to dolomu, tu Puangna Abraham sia Puangna Ishak sia Puangna Yakub. Ma’paganggangmi tu Musa, naurunganni tang nasaramo umpemarangai.

³³Nakuami Puang umpa’kadai: Alai tu lapik lentekmu, belanna iatu inan munii ke’de’, iamo padang maindan.

³⁴Kutiro tonganmo tu kadipakario-rioanna taungKu dio Mesir, sia Kurangi tu sarrona, angKu mengkalao la urrampananni; dadi totemo maimoko, la Kusuamoko lako Mesir.

³⁵Musa iamoto tu natumpu tau, nakua: Mindara unnalako Pangulu sia to mangra’ta’ kara-kara? na ia tonganmo Nasua Puang Matua dadi pangulu sia to parampanan nasande’ tu malaeka’ nakita lan to’ duri.

³⁶Iamo ussolanni sun tu tau, tonna mangka umpadenanni tu tanda mangnga sia tanda kalle-kallean dio tana Mesir, sia dio tasik Mararang, sia dio padang pangallaran patangpulo taunna.

³⁷Musa iamoto tu ma’kada lako to Israel kumua: Misa’ nabi la napabu’tuangkomi Puang Matua lan mai rapummi tu susinna te aku.

³⁸Iamoto tu lan kombongan dio padang pangallaran sola tu malaeka’ umpa’kadai dio buntu Sinai, sia sola nene’ to dolota, tu untarima mintu’ kada tuo kumua nadiparampo lako kaleta.

³⁹Apa manoka tu nene’ to dolota unturu’i, sangadinna natumpu, anna pamirring lu lakoi Mesir tu penaanna,

⁴⁰sia nakua lako Harun: Garagangkan deata, tu la dadi panglalanki belanna iatu Musa ussolangkanni sun lan mai Mesir, tae’ kiissanni ba’tu ma’patumbami.

⁴¹Attu iato nagaragaimi tu rapang-rapang anak tedong sapi misa’, anna pemala’i tu deata rapang-rapang iato, sia naposende tu panggaraga limanna.

⁴²Naboko’imi Puang Matua sia Napopa’elo’na tu tau la umpenombai mintu’ pentaunan dao langi’, susitu disura’ lan sura’na nabi, kumua: E to ma’rapu Israel, denmoraka mipemalaranni lako Kaleku tu pemala’ pangrere’ sia penomba, lan to patangpulo taunna dio padang pangallaran?

⁴³Manassa umpasonglo’komi lantang-lantang Molokh, sia bintoen Romfa, deatammi, tu mintu’ rapang-rapang migaraga la mipenombai. Iamoto angKu la umpalengka’komi lako rampe diona lu Babel.

⁴⁴Iatu tenda kasa’bian nakambi’ nene’ to dolota dio padang pangallaran, susitu Napa’peannan tu To ma’kada lako Musa kumua la nagaragai susitu pa’pasusian mangka natiro.

⁴⁵Iatu nene’ to dolota tu dipakambi’i tenda iato, mangkamo umbaai sola Yosua tama tana Kanaan, tonna taloi tu to kapere’, tu Narambai Puang Matua dio mai tingayona nene’ to dolota, sae lako linona Daud.

⁴⁶Daudmo tu ungkabu’tui pa’kamasean dio mai Puang Matua, napalakui kumua anna ma’din unnalanni inan tu Puangna Yakub.

⁴⁷Apa Salomo ia tu umpabendananNi misa’ banua.

⁴⁸Apa iatu Puang patodoranna tae’ Nanii banua panggaraga lima, susitu napokada nabi nakua:

⁴⁹Iatu suruga iamo isungan kapayungangKu, sia iatu lino iamo pelleseangKu. Banua matumbara tu la migaraganNa’, kadanNa Puang sia apara tu inan kapelayoangKu?

⁵⁰Tang panggaraga limangKu nasangraka te?

⁵¹E kamu to battuk sia tang sopati sia tang to’tok, nenne’ bangkomi unnempai Penaa Masallo’. Tumba tu nene’ to dolomi, ten dukamoto tu kamu.

⁵²Umbara tu nabi tang napakario-rio nene’ to dolomi? Napatei duka tu mintu’ to umpokada doloi tu diona kasaeanNa tu To malambu’, tu mane mangka mipa’peturoan sia mipatei.

⁵³Kamumo tu mangka untarima Sukaran aluk tu naparampo malaeka’, apa tae’ mikaritutui.

⁵⁴Iatonna rangii tinde tau tu iannato, re’dekmi ara’na sia singgarigi’-rigi’ isinna untiroi.

⁵⁵Apa iatu Stefanus, ponno Penaa Masallo’ mentingara langngan langi’ nakitai tu kamala’biranNa Puang Matua, sia Yesu ke’de’ dio kananNa Puang Matua.

⁵⁶Nakuami: Tiromi kukita tu langi’ tibungka’ na iatu Anak rampan dilino ke’de’ dio kananNa Puang Matua.

⁵⁷Apa maramba tu tau umpemandui gamaranna, sia untampun talinganna, napada ta’pa ulla’ka’i.

⁵⁸Nasualei lako salianna tondok, na tumbui batu. Iatu mai sa’bi pantan umpatorro sambu’na rokko to’ lentekna misa’ to mangura disanga Saulus.

⁵⁹Anna tumbui batu tu Stefanus tonna marassan metamba langngan Puang, nakua: O Puang Yesu, tarimai tu penaangku.

⁶⁰Malinguntu’mi nametamba umpemandui gamaranna nakua: O Puang, da Mipopa’indo’i te kasalan iate lako te mai tau! Tonna mangka ma’kada susito, manglessurammi.