Read Toraja-Sa'dan ROMA 1 Bible Online

ROMA 1 - Toraja-Sa'dan bible

ROMA 1

¹Dio mai Paulus taunNa Kristus Yesu, tu ditambai mendadi rasulu’ sia dipamarimbangan la umpa’peisanan Kareba-kaparannuanNa Puang Matua.

²Tu Naallu’ dolomo Puang Matua, napokadai nabinNa lan Sura’ Madatu,

³tu diona AnakNa, tu kea’gan kale tolino, dadi lu dio mai tarukna Daud,

⁴apa kea’gan Penaa ma’pamasallo’, dipamanassamo kumua AnakNa Puang Matua sikambi’ kakuasan, tu belanna kamalimbangunanNa dio mai to’ to mate, tu Yesu Kristus, Puangta.

⁵Bannang diori angki appa’ pa’kamasean sia pangka’ rasulu’ la umbaa mintu’ to kapere’ lako lalan kapengkaolan kapatonganan diona sanganNa.

⁶Nalan mai tau iato ditambai dukakomi mendadi taunNa Kristus. —

⁷Diparampo lako mintu’ tau dio Roma tu Nakamaseinna Puang Matua sia dipamarimbanganmo mendadi to masallo’. Narampoimorokomi kamaturu-turuan sia kamarampasan dio mai Puang Matua Ambe’ta sia Puangta Yesu Kristus.

⁸Tipamulanna ma’kurre sumanga’na’ langngan Kapenombangku diona kamu tete dio Yesu Kristus, belanna kaleleammo tu kapatonganammi lan mintu’ lino.

⁹Na Puang Matuamora tu Kupenombai lan penaangku umpa’peissanan Kareba-kaparannuanNa AnakNa, ungkatottongina’, tumba makaritutungku umpalan ara’komi,

¹⁰tang torena’ umpalakui ke massambayangna’, kumua den sia manii lalan, ke denni upa’ku, naturu’i pa’poraianNa Puang Matua angku mati’ ussitiroangkomi.

¹¹Belanna mamali’na’ la ussitiroangkomi, kumua angku pasilelekomi pa’kamasean mempenaa umpabatta’komi;

¹²kumua anna pakananna’ki’ kapatonganan, la kapatonganangku la kapatonganammi.

¹³Tang matana penaangku ke tang miissanni, e sangsiulurangku, kumua ba’tu pempirammo’ la morai male mati’ — nasae lako totemo sakkalanganna’, — dikua angku kabu’tui dukai buanna dio mai kalemi susi dio mai to kapere’ senga’.

¹⁴Anna aku te kaindananna’, la lako to Yunani la lako bangsa senga’, la lako to manarang, la lako to tang paissan.

¹⁵Iamoto iake lalan penaangku matinuru’ bangmo’ la male mati’ umpa’peissanan dukai lako kamu to iti’ tondok Roma tu Kareba-kaparannuan.

¹⁶Belanna tang ussa’dinganna’ siri’ untongananni tu Kareba-kaparannuan, apa iamo kamatotoranNa Puang Matua tu umpabu’tu kamakarimmanan lako mintu’ to ma’patongan, ondonganna lako to Yahudi sia to Yunani duka.

¹⁷Belanna inde to dinii umpapayanni tu kamaloloanNa Puang Matua dio mai kapatonganan lako kapatonganan, susitu mangka disura’ kumua: iatu to malolo la umpotuo kapatonganan.

¹⁸Belanna iatu kasengkeanNa Puang Matua Napapayan dao mai suruga lako mintu’ katangmekaalukanna sia kakelokanna tau, tu umpai’pinni kakelokan tu kamanapparan;

¹⁹apa iatu ma’dinna diissan tu diona Puang Matua masiangmo lan penaanna, belanna Napamanassamo Puang Matua lako.

²⁰Belanna tempon dio mai tipamulanna angge maritik, mintu’na a’gan tang dikitanNa, iamotu kamatotoran sia Kapuangan tontongNa sae lakona, ma’din nakanassa tangnga’ dio panampaNa; iamoto natae’ nabelai undakaran posanga kalena,

²¹belanna moi natandai tu Puang Matua, apa tae’ nabilang Puang Matuai sia tae’ nama’kurre sumanga’ lako, sangadinna tae’mo patunna tu tangnga’na sia dipamalillin tu penaa baganna.

²²Kaussanganna kalena kinaa anna ia todamo napobaga,

²³nasondaimi rapang-rapang tolino tang marendeng sia manuk-manuk sia olo’-olo’ a’pa’ lette’na sia olo’-olo’ mendonglo’ tu kamala’biranNa Puang Matua tang leluk sae lakona.

²⁴Iamoto belanna ma’taloan lako pa’poraian penaanna, Napopa’elo’nai Puang Matua lako kamaruttakan la urruttakki kalena batang kalena;

²⁵tu ussondai kabuttokan tu katongananNa Puang Matua sia umpangke’ sia umpenombai tu panampaNa napasondana To manampa, tu sipatu dipudi sae lakona. Amin.

²⁶Iamo bannangnato anNa popa’elo’nai Puang Matua lako kamoraian penaa megi’giran, belanna iatu mai baine ulleko’ aluk matutu napopentangia aluk;

²⁷susi dukato tu muane untampe aluk matutunna lako baine sia pada natukka’ kamoraianna lako padanna muane umpogau’ gau’ megi’giran, anna kabu’tui lan kalena tu pakkan sitinayanna kapusanna.

²⁸Tu belanna manoka untandai Puang Matua lan pangingaranna Napopa’elo’nami Puang Matua lako pa’pasirundunan megi’giran anna umpogau’ tang sipato’na;

²⁹ponno anggenna kakelokan, kakadakean, kabasisi-inaan, kabulitukan, nakabu’ kamagallian, kapapatean, kasigagan, lando pa’du, patua’ ba’tang;

³⁰ma’pasisarrang, ma’palele beko, ungkabiri’ Puang Matua, pabe’se, matampo, madongnga’ untannun kakadakean, umbali-bali to padadian;

³¹tang keinaa, ussalai lampa kada, tang mamase, tang maturu-turu.

³²Moi natandai tu atoran Nalampak Puang Matua, kumua iatu to umpogau’i susito sipatu la mate, apa tae’ napogau’ mannai susito, sangadinna nasarrang pole’pa tu to umpogau’i.