Read Toraja-Sa'dan ROMA 10 Bible Online

ROMA 10 - Toraja-Sa'dan bible

ROMA 10

¹E kamu siulu’ku, iatu nakamali’ penaangku sia passambayangku lako Puang Matua, iamotu diona to Israel, kumua anna appa’ kadikarimmanan.

²Belanna aku ungkatottonganni kumua mangu’gu lu lako Puang Matua, apa tae’ nasisola kapaissanan.

³Tu belanna tang ussanga kamaloloanNa Puang Matua, sia belanna la morai umpabendan kamaloloanna kalena, tae’ namengkaola lako kamaloloanNa Puang Matua.

⁴Belanna iatu Kristus Iamo napatu Sukaran aluk, mendadi kamaloloanna mintu’ to ma’patongan.

⁵Belanna mangkamo nasura’ Musa kumua iatu to umpogau’ kamaloloan tete dio Sukaran aluk la napotuo.

⁶Apa nakua ia tu kamaloloan tete dio kapatonganan: Da mukua lan penaammu kumua: Mindara tu la kendek langngan suruga?, battuananna la umpopengkalaoi tu Kristus.

⁷Ba’tu kumua: Mindara tu lao rokko inan tang diperambu, battuananna la umpakendekki tu Kristus diong mai to’ to mate.

⁸Sangadinna apara nakua? Iatu kada iato sirondong bangsiako, dio pudukmu sia lan penaammu, iamotu kada kapatonganan, tu kipa’peissanan.

⁹Iake muakui kumua iatu Yesu Puang, sia mukatappa’i lan penaammu kumua Puang Matua tu mangka umpamalimbangunNi dio mai to’ to mate, la makarimmanko.

¹⁰Belanna penaari anna ma’patongan tu tau naurunganni ungkabu’tui kamaloloan, apa dio puduk nanii tau mangaku naurunganni ungkabu’tui kamakarimmanan.

¹¹Belanna nakua lan Sura’ Madatu: Minda-minda tu umpatonganni, tae’ nala kasirisan.

¹²Belanna tae’ silaenanna to Yahudi anna to Yunani. Apa misa’ri Puang umpuangi mintu’na sia sumpu mamase lako mintu’ to metamba lako Kalena.

¹³Belanna, minda-minda tu metamba ussa’bu’ sanganNa Puang, la dipamakarimman.

¹⁴Naumbamo la nakua metamba lako Kalena tu to tang umpatonganni? sia umba nakua umpatonganni tu tang naranginnapa? sia umba la nakua urrangii, ke tae’i tau umpa’peissananni?

¹⁵Sia umba la nakua umpa’peissananni, ke tae’i nadisua? Susi tu disura’ nakua: Tang pada ia melona lentekna tu to umbaa Kareba-kaparannuan diona melona.

¹⁶Apa tae’ namintu’i unturu’i tu Kareba-kaparannuan. Belanna nakua Yesaya: O Puang, mindamora umpatonganni tu kareba kipa’peissanan?

¹⁷Na susito, manassamo kumua iatu kapatonganan bannang dio kareba mangka dirangi, na iatu kareba mangka dirangi tete dio kadanNa Kristus.

¹⁸Apa kukua: Tae’paraka narangii? Tonganna tongan! Memannamo tu gamaranna lan mintu’ lino, sia iatu kadanna landa’mo lako randanna langi’.

¹⁹Apa kukua: Tae’raka naissanni to Israel? Tonganna, dolona napokadamo Musa kumua: Aku te la umpabu’tuNa’ kapangimburuammi lako misa’ bangsa tang disa’bu’ bangsa, sia la umpabu’tuNa’ kasengkeammi lako misa’ bangsa tang paissan.

²⁰Apa iatu Yesaya batta’ ma’kada, nakua: Nakabu’tuiNa’ to tang undaka’Na’ sia paanNa’ lako to tang umpekutananNa’.

²¹Apa nakua lako to Israel: Keallo-keallo umpatadoNa’ limangKu lako to battuk sia pabali-bali.