Read Toraja-Sa'dan ROMA 11 Bible Online

ROMA 11 - Toraja-Sa'dan bible

ROMA 11

¹Iamoto kukuami: Nasole’moraka Puang Matua tu taunNa? Inang tae’ ia to! Belanna aku te to Israel dukana’, tarukna Abraham, ma’suku dio Benyamin.

²Tae’ Nasole’i Puang Matua tu taunNa, tu Naissan dolomo. Ba’tu tae’raka miissanni tu lan Sura’ Madatu tu dininna umpokadai tu diona Elia, tumbai anna pa’parampoanni tu to Israel lako Puang Matua, kumua:

³O Puang, napongkomo tu mai nabimMi sia naseran tu mintu’ inan pemalaramMi; aku mannamo misa-misa sia natuntunni bang tu penaangku.

⁴Apa umbara nakua tu kada dipaomboranni? Den siapa Kupopa’mirringan lako Kaleku pitungsa’bu tu muane, tu tang umpenombainna Baal.

⁵Ten dukamoto te attu iate den siapa torrona situru’ tu pa’tonno’na pa’ka- masean.

⁶Apa iake tete dioi pa’kamasean, tae’mo ia natete dio penggauran tolino, belanna iake tete dioi penggauran, tangiamo pa’kamasean tu pa’kamasean.

⁷Iake susito, umbamo nakua? Iatu nadaka’na to Israel, tae’ nakabu’tui, sangadinna to dipilei bangsiami ia ungkabu’tui, na iatu mai senga’na napopemmakarra’ penaanna.

⁸Susitu disura’, nakua: Naben Puang Matua penaa ma’turu-turu mamma’, sia mata tang la pakita, sia talinga tang la parangi sae lako te allo iate.

⁹Sia nakua Daud: La mendadi poya tu medana sia bunde sia misa’ labuanan sia misa’ pa’pabala’ lako tu tau.

¹⁰La dipamaraun tu matanna da’ anna pakita sia iatu boko’na la tontong bang dipabukku’.

¹¹Iamoto kukua: Iaraka natitodo kumua anna tobang? Inang tae’ ia to! Sangadinna diona katobanganna anna bu’tu kamakarimmanan lako to kapere’, kumua anna pabu’tu kapangimburuanna to Israel.

¹²Iake naposugi’i issinna lino tu katobanganna sia naposugi’ to kapere’ tu kapu’duranna, ondong pissanpi tu kala’bianna.

¹³Apa iatu kamu to kapere’, kukua ungkuangkomi: Siolanan tu kadadiangku rasulu’ to kapere’, angku pakala’bi’i tu toeku,

¹⁴kubela sia manii umpabu’tuan kapangimburuan sangrara sangbukungku sia ungkarimmanni tu tau pira.

¹⁵Belanna iake ia napasikaelo issinna lino tu kadisa’biangananna to Israel, la ma’patumba pole’opi ke ditarimai sule, ke tang katuoan dio mai to’ to mate?

¹⁶Iake maseroi tu bunga’ panglemun, ten dukato tu sangla’pa’na, sia iake maseroi tu uaka’na, ten dukato tu mai tangkena.

¹⁷Apa iake le’toi ba’tu pirang-pirang tangke, anna iko tu saitun pangala’, dipopengkale’pe’ tama, ammu pada unnalai lompona tu uaka’ to’ saitun,

¹⁸da ammu sattuan kalemu mutapa’i tu tangke iato. Apa iake morongi ammu sattuan kalemu, pengkilalai: tangia iko tu untulakki tu uaka’, sangadinna iatu uaka’ tu untulakko.

¹⁹Iake mukua: Mangkamo ia dile’to tu tangke iato, angku dipopengkale’pe’ tama.

²⁰Melo. Tu belanna tae’ kapatonganan dio, anna dile’to, apa iatu iko diona kapatonganan ammu bendan. Da’ anna kapua penaammu, sangadinna mataku’ko.

²¹Belanna iake tae’i Napessailei Puang Matua tu banu’ tangke siamo, tae’ duka Napessaileiko.

²²Iamoto karitutui tu kamasokananNa sia kamakarrasanNa Puang Matua; iatu kamakarrasanNa lu lako to tobangmo, apa iatu iko kamasokananNa iko Puang Matua, ke tontongko lan kamasokananNa. Iake tae’i, la dita’takki dukako.

²³Apa ia duka tu tau iato la dipopengkale’pe’, ke tae’i natontong lan katangkanna ma’patongan, belanna kuasa tu Puang Matua umpopengkale’pe’ pole’i.

²⁴Belanna iake banu’ saitun pangala’ dinii unta’takkiko, ammu dipopengkale’pe’ lako saitun melo tu tang sipogaronto’mu, ondong pissan tu inang batang tangke saitun siamo tang la dipopengkale’pe’ lako oto’na siamo.

²⁵Belanna tae’ kuporai, e kamu siulu’ku, ke tae’i mitandai te rasia iate, — kumua da ammi sanga kalemi manarang — to kumua iato kamakarrasan iato urrampoimo sangtaanna to Israel sae lako ganna’na bilanganna tu to kapere’ tama kapatonganan.

²⁶Na susito la dipamakarimman nasang tu mintu’ to Israel, susitu disura’ nakua: Dio mai Sion la Nanii sae tu Pela’bak; Iamo la umpale mintu’ kakelokan dio mai Yakub.

²⁷Iamora te tu basse Kutanan sola, to ke Kulendokanni tu mintu’ kasalanna.

²⁸Iatu diona Kareba-kaparannuan uali ia tu tau iato tu belanna kamu; apa ianna diona kadipilean, dipakaboro’ ia tete dio nene’ to dolo.

²⁹Belanna iatu pa’kamaseanNa sia petambaNa Puang Matua tae’ nanii kapenassananNa.

³⁰Belanna susi kamu dolona tang umperangiikomi Puang Matua, apa totemo dikamaseimokomi tu belanna katangma’peranginna to Israel,

³¹ten dukamoto tu tau iato totemo tang ma’perangimo, anna bannang dio tu kamamasean mangka dikamaseangkomi, anna appa’ duka kamamasean totemo.

³²Belanna Nakurung nasangmo Puang Matua tama katangma’perangian, kumua anna mintu’i Nakamasei.

³³Tang pada ia mandalanna tu kasugiran kakinaanNa Puang Matua sia kapaissananNa! Tumba ia tang dilambi’na disandak tu mintu’ pangra’ta’Na sia tumba tang dilambi’na dirundunan tu mintu’ lalanNa.

³⁴Apa mindara ia unnissanni tu lalan penaanNa Puang? ba’tu mindara tu to ma’pakilalanNa?

³⁵Ba’tu mindamora tu mangka umbenNi apa dolo kumua anNa pakkanni sule?

³⁶Belanna iatu mintu’ angge maritik lu dio mai Kalena sia tete dio Kalena sia lu lako Kalena. Lu lako duka Kalena tu mintu’ kamala’biran sae lakona. Amin.