Read Toraja-Sa'dan ROMA 12 Bible Online

ROMA 12 - Toraja-Sa'dan bible

ROMA 12

¹Iamoto, e kamu siulu’ku, kupakilalakomi tete dio kamamaseanNa Puang Matua, pennoloanni tu kalemi butung pemala’ tuo sia masero sia Naporai Puang Matua, iamoto tu kamenomban tu siolanan kakinaan.

²Sia da mipeolai tu a’ganna te lino, sangadinna la membalikomi diona kadiba’ruanna penaammi, ammi issanni untandai pa’poraianNa Puang Matua, iamo melona sia Naporainna sia sundunna.

³Belanna dio tu pa’kamasean dipa’kamasean lako kaleku, angku kuan simisa’komi kumua: da anna sanga kalena losong na iatu sipatunna, sangadinna la napasitinayai tu nasanganna anna kinaa sitondon kapatonganan tu Napapatuanni Puang Matua.

⁴Belanna susi dio kaleta sangbatang nabuda lesoan kale, apa mintu’na tu lesoan kale tae’ nasidulu pentoeanna,

⁵susi dukamoto tu kita budaki’ anta sangkale lan Kristus, apa pada-padaki’ sipolesoan kale sola nasang.

⁶Tu belanna pantan serongki’ situru’ tu pa’kamasean dipa’kamasean lako kaleta: iake pa’nubua’, pasitinayai kapatonganan;

⁷iake pa’parakan, angkaranni tu situru’na kapa’parakan; iake ma’pangada’, angkaranni tu situru’na lalan pangadaran;

⁸iake ma’pakilala, angkaranni tu situru’na kapa’pakilalan; sia iatu mamenganna pasiolananni kamasokanan; sia iatu manglopianna pasiolananni kabirisanan; sia iatu unnangkaranna kamamasean pasiolananni kasendean.

⁹Iatu kasialamasean pasiolananni kamalamburan. Kagi’gi’i tu kadakena la’ka’ lakokomi melona.

¹⁰Lan kasialamaseammi sangsiulurammi, pantan la sipakaboro’komi sia da mididoloi sipekataberan.

¹¹Da milangga’ lan sara’mi; paparrukki tu penaammi, mengkaolakomi lako Puang.

¹²Sendekomi diona rannummi, ma’tan penaakomi lan kamaparrisan, sia batta’ lan kapassambayangan.

¹³Rokkoi tu kakuranganna to masallo’ sia matinuru’komi untoratu tau.

¹⁴Palakuanni kamauparan tu to umpakario-riokomi; palakuanni kamauparan sia da mitampakki ropu tau.

¹⁵Pada parannukomi to parannu; sia pada tumangi’komi to tumangi’.

¹⁶Sisanginaakomi solami. Da ammi kabarii apa madaoan, sangadinna sikadamakkomi to bitti’. Da misanga kalemi manarang.

¹⁷Da mipasipakkan kakadakean lako misa’ duka tau. Karitutui tu kameloan dio tingayona tau.

¹⁸Iake ma’dinni padami pabelammi la sikadamakkomi tau.

¹⁹E pa’kaboro’ku, da anna kamu kalena ma’pasibalaran, sangadinna pakampai kasengkeanNa Puang Matua, belanna den disura’ kumua: Aku umpoissanni tu pepakkan; Akumote tu la umpapakkanni, kadanNa Puang.

²⁰Sangadinna, iake tangdia’i tu to ungkabiri’ko, benni kande; iake ma’rangi, pairu’i. Belanna, iake mupogau’i susito, butung to ruaya mutopporanni dao ulunna.

²¹Da anna taloiko kakadakean, sangadinna taloi tu kakadakean diona kameloan.