Read Toraja-Sa'dan ROMA 13 Bible Online

ROMA 13 - Toraja-Sa'dan bible

ROMA 13

¹Mintu’na tau pantan la umpopengkanorong kalena lako mintu’ to pabaa ungkuasai. Belanna tae’ naden tu kuasa ke tang lu dioi mai Puang Matua; na iatu kuasa inang denmo pura Nalampakmo Puang Matua.

²Iamoto minda-minda unneai tu kuasanna to pabaa, iamo untengkai panglampakNa Puang Matua; apa iatu to untengkai to, ia bangsiamo ia la umpabu’tuan ukungan kalena.

³Belanna iatu to pabaa tae’ naumpasae kamatakuran lako penggauran melo, sangadinna lakori penggauran kadake. Morairokoka tang ungkataku’i tu to pabaa iato? Pogau’mi tu kameloan, ammu kabu’tui kapudian dio mai.

⁴Belanna iamo taunNa Puang Matua tu umpabu’tuangko kameloan. Apa iake umpogau’ko kakadakean, la mataku’ko, belanna tae’ natakin punala bangi tu la’bo’, apa iamo taunNa Puang Matua, tu umparampo kasengkean lako minda-minda tu umpogau’ kakadakean.

⁵Iamoto sipatuko umpopengkanorong kalemu, tangia kumua diona manna tu kasengkean, sangadinna diona duka sukaran inaa.

⁶Ia dukamira to ammi mamaya’ sima; belanna iamoto Napadudungi bunga Puang Matua tu tontong sikambi’ pentoean iato.

⁷Baya’i lako mintu’ tau tu mipoindanna, iamotu sima lako to minii kaindanan sima, sia sassung lako to minii kaindanan sassung; kataku’i tu to sipatu dikataku’, pangke’i tu to sipatu dipangke’.

⁸Da mikaindanan len barang apa lako misa’ duka tau, sangadinna siala masekomi. Belanna minda-minda tu unnala mase tau, iamoto tu ussundunni tuntunan Sukaran aluk.

⁹Tu belanna kada iate: Da mupasandak salu lako rampanan kapa’, da mupapatean, da muboko, da mumailu na iatu senga’na kada Sukaran aluk, naala nasangmo lan te kada iate kumua: La mupakaboro’ tu padammu tolino susi batang kalemu.

¹⁰Iatu pa’kaboro’ tae’ naumpabu’tuan kakadakean padanta tolino. Iamoto iatu pa’kaboro’ iamo dipolalan ussundunni tuntunan Sukaran aluk.

¹¹Tenmito, belanna miissanmo tu diona attunna, kumua nalambi’mo tu attu la minii ta’pa malimbangun dio mai kamammarammi. Belanna totemo samandappi’-dappi’namo tu kamakarimmanan lako kaleta na iatonta mane ma’patongan.

¹²Mambelamo bongi, la madomi’mo masiang. Iamoto sipatu tarampanan tu mintu’ penggauran malillin, anta angkaran maserona tapopa’buno.

¹³La lumingka maloloki’, susitu sipato’na ke masiangna; da’ anna sisola kamalaboan sia kamalangoan sia da’ anna sisola gau’ sala sia passulo bongi sia da’ anna sisola kasigagan sia kamabillanan.

¹⁴Sangadinna la umpokararrankomi Puang Yesu Kristus, sia da’ mipasasua’nai tu kalemi da anna samasarrang-sarrangna tu kamoraian.