Read Toraja-Sa'dan ROMA 14 Bible Online

ROMA 14 - Toraja-Sa'dan bible

ROMA 14

¹Paalai bilangan tu to langga’ lan kapatongananna, apa tangia kumua la mipopetamben kadai tu lanna penaanna.

²Belanna den tau unnala dioi kapatongananna nasangai ma’din ungkande mintu’na kande, apa iatu to langga’ lan kapatongananna utan-utan manna nakande.

³Iatu to ungkandei da natellei tu to tang ungkandei na iatu to tang ungkandei da napasalai tu to ungkandei, belanna Natarimamo Puang Matua.

⁴Mindaroko la umpasala pa’kurinanna to senga’? Puangna ia napoke’de’ ba’tu napotobang. Apa la tontong tumanan ke’de’, belanna Puang umpatumananni.

⁵Den tu tau ussangai den tu allo mala’bi’ na iatu mai allo senga’, apa denno tu tau ussangai sama nasang bang tu allo. Napantan umpamanassa kalena bangmi lan penaanna.

⁶Minda-minda tu ungkasiri’ allo, diona Puang nanii ungkasiri’i, sia minda-minda tu ungkandei, diona Puang nanii ungkandei, belanna ma’kurre sumanga’ lako Puang Matua; sia minda-minda tu tang ungkandei, diona Puang nanii tang ungkandei sia ma’kurre sumanga’ duka lako Puang Matua.

⁷Belanna iatu kita, tae’ki’ misa’ umpoissan kalena katuoanta, sia tae’ki’ misa’ umpoissan kamateanta.

⁸Belanna iake tuoki’, Puang umpoissanni, sia iake mateki’ Puang umpoissanni. Iamoto la tuoki’ la mateki’ inang taunNaki’ Puang.

⁹Belanna iamira te ianna te anNa mangka mate tu Kristus sia tuo sule, kumua anNa umpuangi la to mate la tu tuo.

¹⁰Na iatu iko, ma’apai mupasala siulu’mu? Ba’tu iatu iko, ma’apai ammu telle siulu’mu? Belanna mintu’ki’ sola nasang la umpentingayoi isungan pangra’tasanNa Puang Matua.

¹¹Belanna den disura’, nakua: La lelukraka tuoKu, kadanNa Puang, nala tang malinguntu’ nasang tu mintu’ guntu’ dio oloKu, sia mintu’na lila la unnaku Puang Matua.

¹²Iamoto anta sipatu pantan la ussalui (lako Puang Matua) tu diona kaleta.

¹³Iamoto, da’mo tasipasala len, sangadinna la’bi’ ke mipopa’ga’taranni te ianna te kumua: da’ mipatitumbu ba’tu umpamatana’ penaanna siulu’mi.

¹⁴Kuissan sia kukanassai, lan Puang Yesu, kumua moi misa’ apa tae’ tu mako’do’ kalena, sangadinna iari tu to ussangai mako’do’ tu umpomako’do’i.

¹⁵Belanna iake diona kande iato anna masussa tu siulu’mu, tangiamo lalan kasiala-masean muola. Da nadiona tu kande mukande munii ussanggangi, tu to mangka Napomate Kristus.

¹⁶Iamoto da nasura’i tau tu mipomelona,

¹⁷belanna iatu ParentaNa Puang Matua tangia diona kande ba’tu diiru’na, sangadinna kamalamburan sia kamarampasan sia kaparannuan tete dio Penaa Masallo’.

¹⁸Belanna minda-minda tu mengkaola lako Kristus tete dio Penaa Masallo’, iamo Naporai Puang Matua sia nabilang tolino.

¹⁹Iamoto melo ke unnula’ki’ apa la umpabu’tuangki’ kamarampasan sia sipabatta’ kapatongananta.

²⁰Da ammu sanggang panggaraganNa Puang Matua diona kande. Mintu’na apa masero, apa sala dio ia tu to titumbu penaanna ungkandei.

²¹Melo ke da mukandei tu duku’, ba’tu unniru’ uai anggoro’, ba’tu apa-apa, tu napotitumbunna penaanna siulu’mu.

²²Karitutuanni kalemu dio oloNa Puang Matua tu kapatonganan dio kalemu. Maupa’ tu to tang umpasala kalena diona tu apa nasanga melo.

²³Apa minda tu bata-bata ungkandei, iamo dipasala, belanna tae’ naumpoparandangan kapatonganan. Na iatu apa tang umpoparandangan kapatonganan, iamoto tu kasalan.