Read Toraja-Sa'dan ROMA 15 Bible Online

ROMA 15 - Toraja-Sa'dan bible

ROMA 15

¹Iatu kita batta’na sipatuki’ unnala kataananta dio kalanggaranna to langga’ sia da anta patongan misa pa’poraianta.

²Melo ke pantan tapa’pekitananni tu la naposendena padanta tolino tu umpatunna kameloan la umpabatta’ kapatongananta.

³Belanna Kristus duka tae’ Napatongan misa pa’poraianNa, sangadinna susitu disura’, nakua: Iatu pabe’sena tau, tu umbe’seKomi, narampoiMo’.

⁴Belanna mintu’na tu apa disura’ dolomo, disurasammoki’ la mendadi pangadaran lako kaleta, kumua anna manda’ rannunta diona kama’tanan penaa sia diona pa’pakatana lan mai Sura’ Madatu.

⁵Anna Puang Matua, tu oto’na mintu’ kama’tanan penaa sia pa’pakatana, ungkamaseikomi sangapaoi upa’ ammi pada sanginaa, unturu’ sangka’Na Kristus Yesu,

⁶dikua ammi misa’ penaa sia misa’ kada umpakala’bi’ Puang Matua, tu Ambe’Na Puangta Yesu Kristus.

⁷Iamoto sipaalangkomi bilangan, susi duka Kristus mangkamo umpaalaikomi bilangan anna dipakala’bi’ tu Puang Matua.

⁸Indemi pole tu kadangku kumua: iatu Kristus mangkamo mendadi to ma’kamayana to disunna’, tu belanna kamanapparanNa Puang Matua, kumua anNa arra’i tu pangallu’Na lako nene’ to dolota;

⁹sia anna pakala’bi’i to kapere’ tu Puang Matua belanna kamamaseanNa, susitu disura’ nakua: Iamora bannangna to angku pudiKomi dio lu to kapere’ sia umpopenani pa’pudian umpudi sangamMi.

¹⁰Sia nakua: Parannukomi, e mintu’ to kapere’ sola taunNa Puang Matua.

¹¹Sia nakuapa: Pudimi tu Puang, e mintu’ to kapere’ sia mintu’na bangsa la untendengi.

¹²Sia nakua Yesaya: La bu’tu tu uaka’na Isai, sia Iamotu la bendan umparenta mintu’ to kapere’; Iamo la naposedanan rannu to kapere’.

¹³Denno upa’ anNa Puang Matua, tu oto’na kapa’rannuanan, umponnoikomi mintu’ kaparannuan sia kamarampasan tete dio kapatonganan, anna sakapua-puana rannummi belanna kamatotoranNa Penaa Masallo’.

¹⁴E kamu siulu’ku, aku kalena te kukatappa’i tu diona kamu, kumua kamu duka ponnokomi kamasokanan sia untambuk mintu’ kapaissanan, sia malute dukakomi pada sipakilala.

¹⁵Moi susito, batta’ dukana’ ussurasangkomi, butung umpakilala pole’komi moi natang palambi’, tu belanna pa’kamasean Napa’kamasean Puang Matua lako kaleku,

¹⁶kumua angku dadi to pasumbunganna Kristus Yesu lako to kapere’ la untoe pentoean maindan diona Kareba-kaparannuanNa Puang Matua, anna iatu to kapere’ mendadi pemala’ Naporai Puang Matua, belanna Napemapindanni Penaa Masallo’.

¹⁷Iamoto tete dio Yesu Kristus angku massattuan diona kapekaalukan langngan Puang Matua.

¹⁸Belanna tae’ kubarani umpokadai tu apa, sangadi iapi tu Napogau’na Kristus tu kusumbunganni, la umpadadi to menturu’ tu to kapere’, diona kada sia penggauran;

¹⁹diona kamatotoranna tanda kalle-kallean sia tanda mangnga, tete dio kamatotoranNa Penaa Masallo’, naurunganni tempon dio mai Yerusalem sia tiku lao sae lako Ilirikum upu’mo kupa’peissanan tu Kareba-kaparannuan diona Kristus.

²⁰Na susito mangkamo’ umpa’budai umpa’peissananni tu Kareba-kaparannuan, iamotu dio lu inan tang diniipa ussa’bu’ sanganNa Kristus, kumua da angku umbangun banua dao parandanganna to senga’;

²¹sangadinna susitu disura’, nakua: Iatu to tang umpekarebapi tu diona Ia, la natiro, sia iatu apa tang tamapa talinganna, natandaimo.

²²Ia dukamoto, angku pembudamo tipodo’ la male mati’,

²³apa totemo te tae’mo inan la kunii umpalolang pengkarangangku lan te lili’na sangpiak padang, sia ba’tu pirang-pirang taunmo nanii mamali’ penaangku la male mati’.

²⁴Iake ke’de’na’ lako Spanyol, kurannuan lan kalingkangku la lendu’ mati’, na kamu umparandananna’ tu la kubaanna lako, ke mangkana’ umpaliu penaangku sidi’ ussisolangkomi.

²⁵Apa totemo te la malena’ lako Yerusalem ungkamayai to masallo’.

²⁶Belanna nasituru’imo to Makedonia sia to Akhaya pada urrampunanni doi’ tu mai to masallo’ makario-rio dio Yerusalem.

²⁷Iamoto tu nasituru’i tau iato: ondongpi nainang kaindanan dukai tu tau iato lako to Israel, belanna iake natamaimi to kapere’ tu tang mentolinona, sipato’ duka tu to kapere’ umpa’kamayan barang apanna lako tau iato.

²⁸Iangku mangkamo umpasundunni tu iannato sia umparampo mana’pai buanna sia umpamanassai lako tau iato, la malena’ lako Spanyol unnola mati’ tondokmi.

²⁹Na kuissan kumua iake laona’ mati’, la mati’na umbaa kamauparan ponnoNa Kristus.

³⁰Apa kupakilalakomi, tete dio Puangta Yesu Kristus sia tete dio pa’kaboro’Na Penaa Masallo’, (e kamu siulu’ku), pengkullei umpassambayanganna’ lako Puang Matua,

³¹angku tilendok dio mai to tang mengkaola dio Yudea sia anna alai penaanna to masallo’ tu pa’kamayaku lako Yerusalem,

³²sia angku ma’din umpellambi’ikomi sisola kaparannuan, ke situru’i pa’poraianNa Puang Matua, angku pakatana penaangku ussisolangkomi.

³³Denno upa’ anNa Puang Matua, tu oto’na kamarampasan, urrondongkomi sola nasang. Amin.